Toner Review : Timeless Skin Care Spray - HA MATRIXYL 3000™ W/ CUCUMBER SPRAY

Toner ，係護膚程序上算係一個可有可無的角色，佢作用唔大，但基於有人鐘意使用Toner，我搵左其中一隻牌子的4支簡單的Toner作Review。

首先落定義，係我眼中咩叫爽膚水/化妝水。
(1)  盡量少大分子護膚成分/增稠成分 : 儘管呢一類成分可以帶黎滋潤 (對乾肌而言) 的感覺，好似有一層野係皮膚上面保護住你，但有一派認為有可能阻礙後續護膚成分吸收。我個人認為，減少係前期護膚程序使用過於厚重的產品係比較好，原因係當你第一支已經咁厚重，打落後面使用的份量就會減少 (過於滋潤=>皮膚唔舒服 OR 爆瘡)。係皮膚吸收同負擔有限下，應該盡量將無益成分減少，提高返有益成分的吸收。

(2)  少無益成分 : 以我認知上，一般平價什至部分貴價爽膚水都好鐘意單以Glycol (不論係丙二醇、丁二醇、甘油或者雙丙甘醇) 做補濕成分。事實上呢個並非問題，但呢類成分 (除甘油) 只有短暫的吸濕效果、亦吸唔到太多濕。佢只可以提供大量水分 (爽膚水噴好多下) 加輕量吸濕成分，而其它無作為的成分應該減少，例如PEG、香精、色素等。

(3)  吸濕多元 : 應多以天然補濕因子或良好吸濕成分作為爽膚水主要吸濕成分，咁先可以做到「提供水分」及「吸住水分」。

下面係Timeless Skin Care出的Spray，HA MATRIXYL 3000™ W/ CUCUMBER SPRAY。

Water, Aloe Barbadensis, Sodium Hyaluronate, Glycerin, Calcium Pantothenate, Matrixyl 3000, Cucumber Extract, Phenoxyethanol.

我地先講下佢的吸濕元素。

主要提及吸濕元素為Aloe Barbadensis
Aloe Barbadensis係指緊蘆薈。蘆薈本身有唔同的多醣體、胺基酸等等的良好吸濕元素。可見呢隻成分提供左小分子的補濕同大分子的補源。而蘆薈本身亦有其它功效，包括抗氧化 (建基於多酚、類黃酮等作用)、平滑皮膚 (建基於滋潤皮膚、部分萃取手法的蘆薈有較強的抗菌功效)的作用。

Sodium Hyaluronate 係指緊透明質酸。透明質酸係天然補濕因子的一種，為大分子。現時護膚品界用的透明質酸，即使幾細都好，亦難以穿透角質層。佢只可以提供角質層外的吸濕鎖水功效。

Glycerin 係指甘油。甘油好平，但同時功效好大。甘油作為天然補濕因子的一員，有一定程度的吸濕能力、同時亦可以舒緩敏感。

Calcium Pantothenate 係維他命B5。維他命B5有吸濕的功效，但並唔算太強。

Cucumber Extract 係小黃瓜萃取。小黃瓜本身有豐富的礦物質、咖啡酸等物質，所以有補水同埋抗氧化的作用。

可見，係補水吸濕方面，呢支爽膚水做我唔錯，唔預期有好滋潤舒緩的感覺，但亦確確實實提供天然補濕因子類的成分，為皮膚吸濕補水。

而佢亦另外加入Matrixyl 3000。
呢隻係比較出名的抗老胜肽成分，所有胜肽我比較鐘意呢隻做抗老。
問題在於，成分落得太少，而當初做呢隻胜肽係基於3%左右。
係成個成分表上，透明質酸代表1%成分分界線，排後過透明質酸基本上可以判為低於1%。
而少於1%Matrixyl 3000我本人認為效果有限。

呢支Toner，無咩多餘成分，亦有多元化吸濕，透明質酸亦唔多。
比較適合油性皮膚使用，乾性皮膚當然亦可使用，但可能需要另外再搵滋潤的油分面霜封鎖。

價錢大約$150/120ml。

純水相補濕精華推介 — Marine Hyaluronics by The Ordinary

一支純水的、好的補濕精華應該由咩組成，點樣組成，我地可以參考下 下列產品。

Aqua (Water), Glycerin, Algae Extract, Pseudoalteromonas Exopolysaccharides, Pseudoalteromonas Ferment Extract, Ahnfeltia Concinna Extract, Arginine, Glycine, Alanine, Serine, Valine, Isoleucine, Proline, Threonine, Histidine, Phenylalanine, Aspartic Acid, PCA, Sodium PCA, Sodium Lactate, Salicylic Acid, Citric Acid, Propanediol, Dimethyl Isosorbide, Ethoxydiglycol, Polysorbate 20, Potassium Sorbate, Sodium Salicylate, Sodium Benzoate, Hexylene Glycol, 1,2-Hexanediol, Phenoxyethanol, Caprylyl Glycol.

($85/30g)

產品純水相，由唔同的補濕成分組成。
我地可以先由防腐系統睇起。

產品比較顯眼的防腐劑主要由
「Potassium Sorbate」、「Sodium Benzoate」、「Phenoxyethanol」三項傳純防腐劑組成。
三種都係比較安全，已經做過唔同的毒理測試或者做過唔同的人體試驗分析報告。三種的防腐劑本身亦唔需要落得多，相信佢地亦唔落得多，主因係佢產品PH<5 、 用左唔同的醇類防腐 及 產品本身存有不同吸濕成分 提高左防腐劑的效能。
所以唔顯眼的防腐劑就係由多元醇類，例如排第二位的Glycerin(甘油/丙三醇)、末位的Caprylyl Glycol(辛甘醇)等等。呢一類多數係大廠幫你複配好的防腐劑，所以唔太需要擔心防腐問題。


而入戲肉就係補濕成分。
產品的大分子由 Pseudoalteromonas Exopolysaccharides (HYADISINE® marine ingredient)。

係廠商的Presentation入面，呢隻成分係用黎取代透明質酸，同時亦有「海洋科技」的賣點。由於年紀的增長，皮膚會產生較少透明質酸，形成乾同相關紋路，所以同時有抗老的效果。
我唔反對呢一隻成分可以做到同透明質酸相關的功效，廠商都有做過研究，係人體試驗中，10%的HYADISINE®可以係20日內(每日使用2次)令到皮膚比對照組高出37.2%補水度。1%HYADISINE®使用20日後可以減少皮膚粗糙度約37%。

誠實而言，呢一隻成分係廠商報告下打羸非常多唔同有關透明質酸補水度的報告。儘管如此，透明質酸的強效係「皮膚天然存在」及「本身有一定程度的補濕能力」。換言之，即係低敏強補濕。當然，呢隻HYADISINE®可唔可以替代透明質酸大分子補濕的位子，我認為可以。

不過有另一樣要注意，HYADISINE®呢一隻成分係Solution黎，簡單黎講，即係100%HYADISINE®入面只有1%Pseudoalteromonas Exopolysaccharides。係The Ordinary配方上，呢個特點暗示左係呢隻成分打後的所有成分不會高於1%，如果佢用法根據廠商建議晒最高濃度(10%)，Pseudoalteromonas Exopolysaccharides不超過0.1% (注:1%以下的成分可不根據濃度排列)。




大分子合格，小分子補濕又如何?
天然補濕因子由唔同的元素組成，上網搵唔難，我將比較常見的列出黎。

氨基酸(Amino Acids)、PCA、乳酸(Lactate)、醣(Sugars)、尿素(Urea)、離子(Ions)。
係常用的護膚品補濕成分中，盡量搵多D呢類成分做補濕。好耐以前我提過要由先由小分子同大分子的補濕成分區分，另外要盡量複配天然補濕因子(N.M.F)為主。

係呢支成分下列幾項小分子補濕。

Algae Extract // Ahnfeltia Concinna Extract : 海藻萃取，早幾年好搶手的護膚成分。護膚品有好多唔同的海藻，但一般都能夠提供礦物質 (離子) 及 多醣 (醣) 做補濕。

Arginine//Glycine//Alanine//Serine//Valine//Isoleucine//Proline//Threonine//Histidine//Phenylalanine// Aspartic Acid :  氨基酸類補濕(氨基酸)。氨基酸本身佔最多份量(~40%)的天然補濕因子，而且部分氨基酸有抗敏抗老的功能。但注意，加得多的氨基酸好易令到產品過於厚重，所以一般唔會落得多過產品總量的1%。而多數咁多種氨基酸都會係原料供應商配比你。The Ordinary用的似乎係PRODEW® 500。此成分為天然補濕因子。

Sodium PCA // PCA : PCA納//PCA(PCA)係一般常用的天然補濕因子中吸水能力最高的一隻。PRODEW® 500本身都有提供呢一隻成分，根據返The Ordinary提供的資料，使用量不超過1%。即使係咁，但佢只要有落就可以幫手吸濕。此成分為天然補濕因子。



Sodium Lactate : 乳酸鈉，乳酸類(Lactate)補濕。常用的天然補濕因子，吸濕能力比PCA納弱少少，但依舊比甘油強。PRODEW® 500本身都有提供呢一隻成分，根據返The Ordinary提供的資料，使用量不超過1%。即使係咁，但佢只要有落就可以幫手吸濕。此成分為天然補濕因子。

Glycerin : 甘油 (醣/其它)，古典補濕成分，好平但極為有效。係傳統補濕配方必備元素。此成分為天然補濕因子。

當然仲有唔同的醇類補濕，但用量較少而且功效相近，就不再多提。

可能會有人好奇點解會有水楊酸，其實佢應該係由一隻叫Antarcticine的商品入面的防腐劑，佢入面的活性成分就係產品入面的Pseudoalteromonas Ferment Extract。而呢一隻係醣蛋白。我無咩研究呢一隻成分，但佢有做in vivo實驗，對於皮膚補濕度有一定作用，可見佢有助補濕。但對於老化問題上，佢只有In virto實驗，所以佢有可能協助解決部分老化問題，但需要再觀察。

小總結 : 產品有齊大分子補濕同小分子補濕，而小分子補濕都算多元化，但小分子補濕的含量除左甘油、植物萃取、氨基酸，其它都比一般使用量少。呢個算係其中一個缺點。

而且佢質地唔會太厚 (相比佢另一支的HA+B5)，第一係佢產品本身都有寫，第二係佢本身吸濕成分除左甘油之外濃度唔高。但質地唔厚唔代表補濕功能差，亦唔好追永個種好似有層野張住你的補濕精華。最重要係你有吸收到天然補濕因子，因為佢除左補濕，好多都可以修護皮膚，維持角質層的健康。最重要係你知道有野幫你吸緊水，再用油封住就可以。
所以乾肌未必會太喜歡個種唔厚重的質感。

如果要將佢呢支海洋補濕精華用直白的文字表達

就係一支

「大分子補濕+用甘油氨基酸離子做小分子補濕的補濕精華」

The Herb Farm — 簡介三隻真係天然的面霜

我成日話面霜假天然，賣天然但完全唔天然，咁到底係我心目中咩叫天然呢?

首先要明白天然唔代表最好，天然亦唔代表唔敏感，天然唔代表有成效。

 相反呢天然野亦可以好大機會敏感，亦同時無化學野咁多毒理測試。

ROSE FACE CREAM

Aqua (Purified Water), Prunus Dulcis (Sweet Almond) Oil, Glycerin (Vegetable Glycerin), Glyceryl Stearate, Sodium Stearoyl Lactylate, Oenothera Biennis (Evening Primrose) Oil, Alkanna Tinctoria Root (Alkanet) in Prunus Dulcis (Sweet Almond) Oil, Simmondsia Chinensis (Jojoba) Seed Oil, Cetearyl Alcohol, Butyrospermum Parkii (Organic Shea Butter), Sodium Levulinate, Sodium Anisate, Organic Aloe Barbadensis Leaf Powder 200x, Rosa Damascena (Rose) Absolute Oil, Citric Acid


呢支係主打滋潤的面霜，可預見油脂可能會比較重。
乳化劑選用的係比較天然，始終係ECOCERT用的。分別係Glyceryl Stearate 、 Sodium Stearoyl Lactylate 及Cetearyl Alcohol。Cetearyl Alcohol本身有增稠的效果，可以提供較厚重(對油肌)或者叫較滋潤(對乾肌)的感覺。而大家可能比較注意的係Glyceryl Stearate。你上去查COSDNA，你會發覺佢話「用量過多會有致敏風險」。呢句說話我係同意的(「用量過多會有致敏風險」)，因為除左水之外，大部分護膚品原料都係比率高，致敏風險高。重點在於幾多%，而研究話比我地知，呢隻成分做過測試。100%用於兔仔眼部、兔仔皮膚、並無引起敏感或輕微敏感(mildly irritating or non-irritating)。係豬的皮膚並無敏感。同時係人的皮膚都無引起敏感。基本上無人會走去100%用呢隻成分，所以可以唔洗擔心。當然怕的有好多其它ECOCERT乳化劑比你選擇。

水性補濕方面，缺乏大分子補濕及天然補濕因子。產品單以甘油、蘆薈處理水性補濕，再加以小量植物萃取協助。明顯較難照顧水性補濕的要求。

油性保濕方面。甜杏仁油、月見草油、荷荷巴油、乳木果脂係佢地主要用作保濕的原料。植物油本身含有比較豐富的脂肪酸，亦可以補充皮膚保濕用的三酸甘油酯，但始終缺乏多元化手段。對於一般油性或者中性皮膚係無咩問題，但乾性皮膚需要注意增加多少少多元化的保濕。例如分子酊、角鯊烯個一類。

植物萃取方面，佢選用左紫朱草。紫朱草係一隻含有pyrrolizidine alkaloids的植物。而pyrrolizidine alkaloids如果係不飽和會有危險，佢的代謝物會對肝有損害。而紫朱草算係有濃度比較高的pyrrolizidine alkaloids。用法上需要注意唔好太長期規律性使用，BB大肚婆都唔好用。

ROSEHIP FACE CREAM

Aqua (Purified Water), Glycerin (Vegetable Glycerin), Prunus Dulcis (Sweet Almond) Oil, Rosa Canina (Organic Rosehip) Fruit Oil, Glyceryl Stearate, Sodium Stearoyl Lactylate, Simmondsia Chinensis (Jojoba) Seed Oil, Cetearyl Alcohol, Butyrospermum Parkii (Organic Shea Butter), Althea Officinalis (Marshmallow Root) Extract, Daucus Carota Sativa (Carrot) Seed Oil, Sodium Levulinate, Sodium Anisate, Organic Aloe Barbadensis Leaf Powder 200x, Citrus Aurantium Amara (Bitter Orange), Anthemis Nobilis (Chamomile) Oil,  Citrus Aurantium Dulcis (Orange) Peel Essential Oils.Citric Acid

呢支係主打幫你保濕的面霜，應該係主打適中保濕，比係中性肌左右的人使用。

先就乳化劑黎睇，乳化劑使用的都係算比較天然的選擇，ECOCERT的產品係可以選用。防腐劑使用的係「Sodium Levulinate+ Sodium Anisate」的選擇。都係可以使用係標示無防腐劑的產品入面當防腐劑咁用。

基本標準睇完，可以睇下佢保濕是否如此好。

水性補濕方面，天然補濕因子比較缺乏。產品排第二位的係甘油，單隻份量應該唔少。甘油係一種小分子的天然補濕因子，而天然補濕因子(NMF)係皮膚經過一系列的反應後產生於角質層用於吸水的一堆成分。常見有尿素、透明質酸、甘油、胺基酸等等。補濕結構最好有細有大，佢比較缺大分子的天然補濕因子，即係透明質酸類，同時小分子的亦唔足夠，只有甘油一項。而係植物類上，有提供蘆薈呢一項補濕成分。蘆薈有多醣體，可以補濕。但總結黎講，明顯種類唔多，整體份量唔多，係濕度較低凡環境需要注意呢一部分要補足。

油性保濕方面，以植物油為主，不過不失。產品使用甜杏仁油、玫瑰果油、荷荷巴油、乳木果脂為主軸油脂組合，油脂除左荷荷巴油大部分比較厚身。四者可以分別咁提供飽和同不飽和脂肪酸。但缺乏比較多元種類的保濕成分，例如Squalene(角鯊烯)、Lecithin (卵磷脂) 、Ceramide (分子酊) 等呢類成分。單純以脂肪酸 // 三酸甘油酯去做保濕未必可以好全面咁做野，始終好多時皮膚需要的係多面，而唔係專精。

植物萃取方面，佢加入左好多唔同的植物成分，抗氧化的能力會強左。

比較少見的係Althea Officinalis，佢主要用黎做保濕，因為佢入面有種粘液，你可以幻想類似蘆薈個種粘液。

玫瑰果油廠商自己聲稱可以美白，我唔否認，但亦唔需要過分吹捧。的確係植物油的選項上，玫瑰果油係比較知名的美白油脂。係不同種類美白成分黎講，有好多比佢更天然、同時亦有更多比佢更快速有效 (維他命C、傳明酸、Chromabright等等)，而係油脂選擇上，本身植物油本身存在的多酚 (含量唔算特別多，但存在) 係美白的其中一類元素。如果單純講及植物油的脂肪酸係唔係可以美白，唔否認，有係豬仔研究過，原來Omega 6 亞油酸 (Linoleic Acid)有助令皮膚更新速度加快，形成類似果酸水楊酸類的美白作用。但亞油酸本身存在於好多的植物油當中，包括玫瑰果油、葵花籽油 (平好多清爽好多) 、 月見草油 等等等等。玫瑰果油係唔係一種必須的美白油脂呢，當然佢的好處就係有人幫你做過研究，但缺點就係要比多兩至三倍的錢。

總括黎講，呢支算係一支比較穩陣的面霜，不過不失。

什至係價錢的考慮下，The Ordinary支面霜做得比佢出色。TO防腐劑上佢的確無咁天然，亦無咁多植物油。但單純的三酸甘油酯應該足夠一般無咩保濕需求的皮膚單純作保濕使用 (係唔係好矛盾) ，當然佢缺點係少左堆植物內的養分，但你喜唔喜歡用我阻唔到你。

RADIANT FACE CREAM

Aqua (Purified Water), Coryllus Avellana (Hazelnut) Oil, Cetearyl Olivate, Sorbitan Olivate, Ribes Nigrum (Blackcurrant) Oil, Glycerin (Organic Vegetable Glycerin), Symphytum Officinalis (Comfrey Leaf), Echinacea PurpureaVitis Vinifera Seed (Grape), Achinidia Chinensis (Kiwifruit)  Extracts, Butyrospermum Parkii (Organic Shea Butter), Citrus Bioflavanoids, Flower Essence, Parfum (Essential Oils), Olea Europea (Olive) Fruit Oil, Sodium Levulinate, Sodium Anisate, Totarol, Organic Aloe Barbadensis Leaf Powder 200x, Citric Acid

呢支係主打抗氧化的面霜。當然唔係所有抗氧化係同一個Level當中，佢用的並唔係最頂級的抗氧化，我個人叫佢做二級原料，有作用，但絕對唔係我地要拎個荷巴出黎比錢買的原因 (抗氧化) 。

先就乳化劑黎講，佢用的乳化劑係比較天然的，係Ecocert的產品係絕對可以用無問題。再睇防腐劑，佢選用的防腐劑同樣係比較天然的，Totarol係天然防腐劑的選項，同時亦有抗氧化、消減暗瘡等功效。研究的報告指出，約0.000039%已經係最小抑菌濃度(對引發暗瘡的細菌)，而係0.005%濃度下，約60分鐘可以消減暗瘡細菌約98%。呢隻原料我會叫佢一級原料，因為佢係用植物某特定成分研究，發現佢有效，專登用技術拎佢地出黎單獨使用。呢類成分快速見效，濃度低，多數穩定，係應該拎荷巴比錢買的野。而填補Totarol防腐缺憾的就係「Sodium Levulinate+Sodium Anisate」，呢隻係比較新型的防腐劑，都係可以標示「不含防腐劑」的防腐劑。

再睇返一支面霜的基礎功能 — 補濕保濕。

係水性方面明顯比較缺乏。產品主要以甘油、蘆薈作為水性補濕原料。甘油係天然補濕因子的一種，好平但好有效，隨住周圍環境的水分而改變其保濕程度。係天氣比較乾無咩水分的地方，甘油的補濕能力會比較弱。蘆薈係有效的補濕成分，原因係蘆薈本身有多醣體。多醣體係一個統稱，基本上我地會話佢有補濕的效果。而佢用的係Aloe Barbadensis Leaf Powder 200x。呢隻份基本上所有蘆薈其它所有功能都會消失晒，只會留下補濕。而佢的優點係，用量少已經好足夠，因為佢1g=200g蘆薈汁。總結黎講，缺乏水性補濕因子，特別係天然補濕因子，同時亦缺乏大分子補濕劑，例如透明質酸。

係油性保濕方面，佢做得不過不失。產品的植物油種類算多，佢有榛果油、黑加侖油、乳木果脂、橄欖油。主要比脂肪酸同三酸甘油酯比你。榛果油作為主要油分，主要提供單元不飽和脂肪酸。黑加侖油主要提供多元不飽和脂肪酸，而佢的組成亦比較似月見草油或者琉璃苣油，都有比較多的GLA，一種抗發炎的omega 6。而後兩者乳木果脂、橄欖油的量比較少，乳木果有飽和脂肪酸，而橄欖油有單元不飽和脂肪酸。四種植物油有抗氧化的能力，但絕對唔係廣告所講咩好豐富的維他命或者好多 多酚。維他命你隨便搵一支維他命主打精華都多過呢堆植物油，而多酚類你直接買堆真係做多酚起家的成分就得，無記錯美國有間廠專做橄欖多酚，好正。佢比起最強個類提取型抗氧化成分當然弱，但比合成脂絕對好。

油性保濕缺點方面，佢主要都係得脂肪酸類保濕，但對於其它油性保濕成分絕對唔足夠。例如膽固醇//植物固醇、角鯊烯同分子酊呢一類。所以單純用植物油用油性保濕的面霜有個做點，就係乾肌係冬天會覺得唔足夠。而油肌就睇你本身油成點。

係額外成分之中，佢加左好多植物萃取，包括紫草、提子、奇異果呢一類。

基本上可以預見佢添加得還可以。因為佢用的乳化劑係Olivem® 1000，一般使用如果無額外的脂肪醇(XXX Alcohol)或者膠輔助，使用上會大約係10%樓下游走。而Sorbitan Olivate係隻乳化劑入面大約佔唔夠40%，即係話佢後面排的大約會係3-4%樓下。你話3%好多，但肯定無可能全部都會咁多。假設佢真係用咁多，咁真係恭喜晒。佢抗氧化的能力的確會係不俗，量大取勝。

但由於甘油的排行仲低過Sorbitan Olivate，我地可以預見佢真係無成分表見咁多。植物萃取係護膚品上主要係將佢放入溶劑，之後經過時間、熱力等因素協助，其活性成分溶入溶劑 (水、甘油、多元醇 等)，而一般萃取出黎有濃度之分 (當然技術的高低亦會確定左佢本身濃度) 。呢到只有水同埋甘油作為溶劑。假設佢係以甘油作為溶劑。4%以下的甘油要有3隻的植物萃取。假設每一隻植物萃取有40%甘油，20%植萃，40%水 (一般做法)，3隻植物萃取計埋只有大約2%，每隻有0.6%。

0.6%做唔做到好多野，其實可以接受，但無人證實到 (呢個都係唔少植萃上唔到大台原因) 。
一般上，提子萃取可以抗氧化、美白。原因在於佢有兒茶素、花青素呢一類多酚。多酚本身可以抗氧化美白 (已於上述)，消除自由基傷害。
奇異果本身有少量維他命、胺基酸類，存有其活性成分各自功效 (換言之即係無特別功效) 。

值得注意係Comfrey(紫草/康復利)

對於呢隻成分係引起過風波，有隻牌子叫Burt's Bee 有隻膏係有紫草呢一隻成分，本身佢無寫2歲以下禁用，事後被發現就急急腳寫返上去。原因係如果你係有準備懷孕的打算，或者已經有BB打算比佢用呢隻成分，一定要停手。因為會對個BB//大人係有不良影響，不過BB比較嚴重，紫草或者叫康復利入面有比較多有損害性的pyrrolizidine alkaloids。2歲樓下絕對係禁用成分。所以天然唔代表好，你真係要用燕麥或者金盞花會比較岩BB。康復力本身用黎抗過敏，對傷口癒合有良好作用。

個人建議，短期用唔係BB或者大肚婆其實係可以，始終紫草係有佢的功效。
長期用需考慮Comfrey的問題 (當護膚品日常非常規律性使用)，咁抗敏上有金盞花洋甘菊等選擇，的確可以選擇其它。

總結黎講，我覺得你喜歡賣天然的面霜，其實RoseHIP Face Cream係一個不錯的選擇。(記得係有HIP個隻!)

註 :

(1) PAs (Pyrrolizidine Alkaloids) 只有不飽和類先會有風險。
(2) 唔係每一隻植物PAs的濃度都一樣。例如康復力、琉璃苣 (不等同琉璃苣籽!) 同中國用的紫草根 濃度已經差好遠。紫草根係非常非常低PAs (不過孕婦同BB都唔太建議用)。
(3) 長期當飯食落肚的PAs先會有極度嚴重的後果。
(4) 短期突發使用其實無咩問題。

點評 左旋維C精華(1) : Obagi 左旋維他命C精華

因為我唔係好確定我搵到的所有成分表係正確，或者國家的版本不同而導致有增減成分。我只係搵到佢主要架構存在的配方比你地參考。

Propylene Glycol, Water, L-Ascorbic Acid, Alcohol, Ascorbyl Glucoside, Ethoxydiglycol, Phenoxyethanol, Sorbitol, Sodium Hyaluronate, Zinc Chloride, Calcium Hydroxide, Fragrance







首先，左旋維C的護膚品配方絕對係大同小異。大家都係參考以「溶劑//助滲」+「水」+「左旋C」為基礎配方。基本上個架構大家都係咁做，所以大家做到的野就差不多，其它多出黎的成分就係各自修行的問題。

Obagi係屬於手多的範例。
由於左旋C對於配方需求大，需要助滲多、PH低的基本要求。產品必定需求加入比較大量的溶劑，我理解。
產品選用Alcohol, Propylene Glycol同Ethoxydiglycol作為輔助助滲。先不論選材上優劣，係如此大量溶劑底下存有香精的配方代表所有容易引發刺激的成分更容易滲入皮膚。換言之刺激成分會更容易引發刺激，且傷害更大。咁佢有香精，就會有呢個問題。
Propylene Glycol的使用，你可以自行選擇喜唔喜歡呢隻成分。個人而言，我認為Propylene Glycol有可能引發刺激，而Propanediol會係比較好的使擇且用途上可大部分Replace。

Ascorbyl Glucoside係AA2G，值得注意係，AA2G最佳保存的PH範圍同左旋C並唔相同，所以使用上，如果Ascorbyl Glucoside係佢地計落去成支產品的維他命C的量，咁佢的效果會打折，原因係氧化的可能性會增加。

另一樣野需要注意係，Propylene Glycol的排行比水更前，換言之係預計上，佢比水的量更多，使用質感上會有種滑的感覺，但亦有會有人覺得好黏。

至於補濕成分，有大分子的透明質酸，亦有小分子的Sorbitol同埋Propylene Glycol的多元醇類。算係最基礎的補濕結構。

簡單總結一下 :
1.  助滲多，所有成分的滲透快加高，左旋維C可以發揮更大效果，同時香精會更易引發刺激。

2.  防腐優。苯氧乙醇算係現行上唔叫「天然防腐劑」下安全到爆炸的防腐劑 (1%樓下)。而由於大量的多元醇都會令防腐系統效能提升，算係輔助配方同時減少用防腐。

3.  基礎補濕。無咩NMF(天然補濕因子)。得一隻透明質酸，但算有大小分子結構，可以接受。

4.  我見到係COSDNA上日本版有植物萃取 (?) 唔知真定假。但係如果只係得左旋C+水+溶劑，我覺得咁的價錢，我見到由HKD $400至到1000 /30g都有。是否值得，自行理解。

5.  所有美白產品並唔會日日用一定會比昨日白，去到某一個位就完架啦。

是咁的 — 我由七月開始試左肌斷食兩個月 (中) — 肌斷食提出的理念正確嗎?

肌斷食的理念底下，有極之多的副Concept Support，形成成個肌斷食框架。
今日想同大家傾下肌斷食某部分有少少古怪的Concept 。


手工皂天然嗎 ?

無論係唔係肌斷食理念下，坊間都好多時認為一般洗面產品唔夠天然，

亦有好多化學野，所以用皂就係「Perfect池」。

我地可以先了解下我地一般用的洗面產品同 洗面皂 係設計上到底有咩分別先。

一般用的洗面產品的結構可以拆分為下列幾項 :

水 + 界面活性劑 + 防腐劑 +

色素香味 (可有可無) + 油 (可有可無) + 增稠劑 (可有可無) + 補濕成分  (可有可無) + 

活性成分  (可有可無)

你可以睇到，哇。界面活性劑，睇落去已經好化學，而且又有防腐劑。咁一定好化學，對皮膚好傷啦。不如又睇下一舊洗面皂可以點做

洗面皂的結構可以拆分為下列幾項 :

普通冷制/熱制 : 水 + 鹼 + 油 + 

色素香味 (可有可無) +  防腐劑/抗氧化劑 (可有可無) + 活性成分 (可有可無)

而有一類皂係將一般用的洗面產品用某類成分變成固體咁解，但佢本質都係一般用的洗面產品，此類不談 (因為唔係肌斷食所推崇的產品)

理論上，無論一般用的洗面產品 OR 洗面皂，你都可以加垃圾成分去支撐使用感覺，包括香精，增稠質地改變成分。

所以單純用因為坊間洗面產品有落好多「色素、香精」去攻擊坊間洗面產品係完全站不住腳。

再下一個層次，防腐劑。

防腐劑問題在於邊呢 ?

係肌斷食的Concept下，防腐劑會令到擾亂皮膚，破壞皮膚。

首先呢，即使你用清水洗面，清水都會滲入皮膚，皮膚本身的細胞含水量都會一下子上升，你擾亂皮膚 ; 你用毛巾/紙巾抹面係強行用物理性的方式去除表面老廢角質，你擾亂皮膚 ; 對唔住，你唔用防曬產品，紫外線射入皮膚引發炎症反應，你擾亂皮膚。

所以根本上並唔可以用「擾亂皮膚」去解決「為何有防腐劑的產品就是差?」呢一個問題。

所以，下一步我地要問的係「防腐劑係點樣，防腐劑會出事嗎?」

我可以答你，「防腐劑係有害防腐劑係出事」係完全正確的。因為100%濃度的防腐劑基本上99%會引致Irritation。

但現實護膚品唔會咁做，舊時代產物的防腐劑大部分有做毒理測試。

你話怕MIT，MI，Parabens呢類防腐劑? 唔緊要有大量其它防腐劑選擇。亦有大量新式防腐劑，用緊植物本身的抗菌力量做防腐。

所以重點唔係有冇用防腐劑，而係防腐劑的選擇同用量是否恰當。同樣道理，你一舊皂本身都可以加大量化學物質，我一支洗面產品可以過到Ecocert，並唔係任何情況，什至大部分情況下皂都唔夠洗面產品好。

-Coming Soon-

是咁的 — 我由七月開始試左肌斷食兩個月 (上)

是咁的，一直以黎呢，我都知坊間好多有趣的理論好吸引人。
各家各門各派的理論有佢的特點同值得學習的地方，當然引人詬病的地方亦有。
我自己對於肌戒毒、肌斷食呢兩個比較正路的理論都有少少興趣。
前者我以前有推廣過少少的概念，但係你地唔BY，咁就放棄左。

而肌斷食呢個理論我個人認為有正確的地方，但係唔係真係講到咁神奇呢 ?
事源小弟的兼職，我無辦法做到半年或者一年的時間完全唔使用任何護膚品，包括防曬。
我最多做到兩個月，所以就當分享經驗比你聽。

有幾項資料比你地有個底先 —
1)  係我未用過護膚品時期的皮膚
好似係「中性+T位油性皮膚」、額頭，太陽穴有暗粒
無色斑問題，亦無咩皮膚問題。唯有冬天右邊面眼皮下顴骨位下有會甩皮情況。
同埋個時乜都唔識，外油內乾呀︴補水出油呢D我完全唔知有無呢類野

2)  有用護膚品時期 —
有用維A、維B、維C (睇個期有冇人買) 、部分酵素去角質、水楊酸(自行試用同客講返)等產品
好少用面霜產品
有用護膚品個期面兩邊叫做中性皮膚 + T位油脂減少左
額頭，太陽穴有暗粒，但數量減少左，同時有經歷過爆發期，部分粉刺係代謝時期比較明顯凸左出黎

-----------------------------------------------------------------------------------

我的肌斷食係
1)  不用任何洗面產品、爽膚、精華、面霜、防曬
連同任何凡士林、花水、植物油、精油、皂都無用
毛巾都無用，單純朝早清水洗面、夜晚清水洗面，事後印乾
應該係最完整的肌斷食 ?
2)  我有幾日破左戒，因為個日要中午出去買野曬到太陽，我頂唔順用左防曬，連同個晚用有洗面乳洗走。

-----------------------------------------------------------------------------------

經歷 :

初期  (7月頭至7月底)
-  本人係個段時期壓力巨大，所以生有發炎的瘡未必關肌斷食事，但暗粒就應該有關
-  暗粒不斷增生，特別係太陽穴，連同下巴都生左好多發炎瘡
-  由於有暗瘡生左，本人有時都手多，加上易留印，留左好多印係下巴、額頭到
-  皮膚兩頰「感覺上」比無使用任何產品覺得乾，同時油脂分泌「感覺上」多左
-  鼻時有敏感狀態發生 (內乾外油)

中期 (8月初至8月中)
-  壓力好返好多，情緒尚算正面
-  暗粒不斷生完退退完生 ， 但整體黎講係比無使用護膚品個期差不多，但係比我有使用護膚品個期多，特別係眉尾對上，一堆暗粒粉刺
-  皮膚兩頰外出後會比較易泛紅，因為通常都係係太陽最曬個段時間外出
(利申無用防曬)
-  印無退，部份轉返淡啡印、部份紅印
-  鼻時有敏感狀態發生 (內乾外油)
-  乾的感覺就無乜，算係習慣左
-  皮膚比以往粗糙
-  黑頭多左

後期 (8月中至呢幾日)
-  壓力退晒，情緒幾正面
-  暗粒情況無變
-  印無變
-  兩頰無變，都係會泛紅，而且泛紅情況更加唔穩定
-  皮膚一樣粗糙
-  黑頭多左
-  鼻頭有類似甩皮情況，向外擴展到鼻翼，油脂感覺泛鼻表面 (唔識點形容) ，而對上係咁的情況
係我有一期用過「椰子+橄欖+芝麻」油配方做洗面先係咁，而我個期有住宿舍，我好記得個時行過有間賣香薰的公司話我「同學你敏感緊」，之後仲幫我搽aloe vera gel，話我好快會好返，但我想講我用完都無好。

-----------------------------------------------------------------------------------

感想 :
兩個月絕對唔係肌斷食的要求

但我只可以講 「我好後悔」

暗粒呢類其實我就無咩所謂，因為其實我性別係男，油脂就一定會出，T位油唔出奇
咁生呢類暗粒好正常 少左我已經OK

最煩係由於我平時有用維A (大約一年)
維A一用你日頭唔用防曬就好Q傷的
如果我個日有事要出去，咁個日就一定比較紅
無事/5-6點先出門口就無事

同時 鼻甩皮係我無預想過的情況
呢個都好煩 有排搞

-----------------------------------------------------------------------------------

小總結 :

我從來對於肌斷食的態度就係
佢只係一個程序 意義上同你皮膚敏感緊時期醫生同你講最好乜都唔用一樣
有時有人講話暗瘡生左好多 之後肌斷食先好返
嗯，我只可以話你好彩
的確，你可以唔談論荷爾蒙、年齡、個人習慣的因素去講肌斷食好，我唔評論呢樣野。

最後我再重申，
1)  「皮膚敏感緊時期醫生同你講最好乜都唔用一樣」
2)  唔好信咩韓國10個step美肌護膚步驟，好多時3-4支都好夠
就係我係肌斷食得到的啟示

萬事先由水油起 — The Ordinary 補濕保濕篇

係坊間，將補水同鎖水視為第一任務，雖則我個人唔同意，但令皮膚有水分、有油分的確係幾重要的。咁我地先由點樣可以做好一個補濕鎖水先。

係「正統」上，無一個完全好客觀同科學的定義點先叫完整的補濕系統或者鎖水系統，所以其實好睇個人睇法同埋個人理解。

我個人理解係咁的，
(1)  係唔同的膚質所需要的水、油都唔同，
一般而言，油性皮膚唔需要過多的油性成分 ; 相反，乾的要多D。
(2)  能夠溶於水的成分好多，但一般而言，比較好的我會以「天然存在」、「非PEG變性」。而呢類成分大多有多重功效，唔一定單係補濕，所以呢，吸收多少少都可接受。

油性保濕分 (乾就多好，油就少好)
A)  細胞間脂質 :
分子酊 (常見啦) 、 脂肪酸 (存在於植物油為主) 、 膽固醇 (比較少見、植物固醇係植物油較少) 、 磷脂質 (常見係卵磷脂)
B)  皮脂腺 :
角鯊烯 (近年大熱) 、 三酸甘油酯 (植物油或者人工合成都有) 、蠟脂 (面部護膚品比較少見)、膽固醇 (比較少見、植物固醇係植物油較少)

水性補濕因子太多啦，我個人喜好的主要係 —
甘油、PCA納、尿素(好野黎，唔明點解坊間D人唔鐘意佢)、透明質酸、維B5、氨基酸 等等等等
主要問題係現時好多古怪的補濕成分，例如用甘油變出黎的，透明質酸變出黎的，我個人唔建議用，原因係 :
1)  一般黎講，唔太多人缺水性補濕。通常係極涷，冷氣位就會，但係一般用上面幾隻用足量就得。
2)  補濕因子比較好的就係有太多比較低刺激性或者叫做簡單的成分，好多都可以係皮膚搵得返類似的野。何必用一隻皮膚唔識的野?

係The Ordinary 入面，主要有以下幾隻可以作為補濕保濕

Hyaluronic Acid 2% + B5

Aqua (Water), Sodium Hyaluronate, Sodium Hyaluronate Crosspolymer, Panthenol, Ahnfeltia Concinna Extract, Glycerin, Pentylene Glycol, Propanediol, Polyacrylate Crosspolymer-6, PPG-26-Buteth-26, PEG-40 Hydrogenated Castor Oil, Trisodium Ethylenediamine Disuccinate, Citric Acid, Ethoxydiglycol, Caprylyl Glycol, Hexylene Glycol, Ethylhexylglycerin, Phenoxyethanol, Chlorphenesin

不得不讚呢隻牌子好食得中大眾心理。係現行大眾眼前，認識、覺得最正的2種補濕成分 (B5、HA)都係最賣得的，所以佢地拎左出黎做主打。

先由主要成分講起，佢2%的HA係由原型透明質酸(Sodium Hyaluronate)同透明質酸交聯聚合物(Sodium Hyaluronate Crosspolymer)組成。
一般黎講，產品含1%透明質酸已經好足夠，2%其實有少少過多。係使用上必須要確保皮膚係夠濕夠多水先好用上面，同時亦唔好用咁多。個人意見黎講，我本人唔太喜歡Sodium Hyaluronate Crosspolymer呢一類成分。呢隻成分主打可以更保濕、更多元化。原因在於佢將透明質酸的粒子聯合堆一齊，形成更密的鎖水膜。問題在於，點解我地要使用透明質酸。唔係因為佢可以吸1000倍水分，亦唔係因為佢係咩大分子補濕，而係佢天然存在於皮膚上，佢的致敏性基本上係零。老實講，你要吸得更多水，有好多成分例如由大豆提煉的某一隻補濕成分廠商講到去到5000倍。重點不在於吸幾多水，而係佢的特質。
當然佢唔會話用落即係敏感爛面之後皮膚受傷，但個人取向上，我比較希望佢使用最簡單個隻透明質酸。

而可以見到排落去係B5，一般黎講，廠商都會建議1%或以上，老實講呢就係呢到落得有點兒少，什至可能唔夠1%，換言之呢到所講的B5我會視為有微效，但明顯噱頭居多。

再排落去有一大堆Glycol (多元醇類) ，多元醇有吸水效果，但效果什弱，係呢到主要做滲透、防腐的效果。但補濕成分基本上唔需要做到滲透，好多時角質層做好就夠。

問題在於多餘物質。對於一支透明質酸+B5精華，好明顯再加膠，增稠劑係極度無謂的做法。原因在於2%的透明質酸基本上用完起膠情況已經好嚴重，再加埋增稠只會令到佢更加容易出擦子膠碎。另外就係PEG-40 Hydrogenated Castor Oil，係呢到其實唔需要加，一佢唔係主打油溶性成分，亦無油溶成分要由佢溶左佢入水 ; 二佢落得唔多，要有油性的補濕又唔太夠 ; 三係呢類變性油口頭掛植物名，其實就完全唔係植物油，所以植物油的優點係唔會有。對於呢類野只係滑順的用途，對皮膚其實無任何正面護膚用途，係呢個配方中亦唔係必要存在。

再傾落去係PH值問題，對於呢到PH值我存在好奇，點解要存有PH7-7.5的Range。唔否認皮膚有自行緩沖作用，但無可否認PH4.5-6.0左右的護膚品係比較對皮膚友善。而且我相信壓低PH亦都唔係一件難事。

總結黎講只係一支透明質酸精華，B5、甘油呢類大路成分明顯落得唔足夠。
(悄悄話 : B5基本上係現時流行配方的基礎成分黎)

再落去係

Natural Moisturizing Factors + HA

Aqua (Water), Caprylic/Capric Triglyceride, Cetyl Alcohol, Propanediol, Stearyl Alcohol, Glycerin, Sodium Hyaluronate, Arginine, Aspartic Acid, Glycine, Alanine, Serine, Valine, Isoleucine, Proline, Threonine, Histidine, Phenylalanine, Glucose, Maltose, Fructose, Trehalose, Sodium PCA, PCA, Sodium Lactate, Urea, Allantoin, Linoleic Acid, Oleic Acid, Phytosteryl Canola Glycerides, Palmitic Acid, Stearic Acid, Lecithin, Triolein, Tocopherol, Carbomer, Isoceteth-20, Polysorbate 60, Sodium Chloride, Citric Acid, Trisodium Ethylenediamine Disuccinate, Pentylene Glycol, Triethanolamine, Sodium Hydroxide, Phenoxyethanol, Chlorphenesin.

先講到最高原則，我個人反對使用Triethanolamine，因為佢係動物實驗出過事，當然濃度、用係人體、用係皮膚講法唔同，呢個係個人取態。但其實係呢到PH=6.5-7.0 我相信唔需要落咁多鹼劑，什至用部分補濕成分佢的天然PH值已經可以向上調至合理水平。
再睇返落去，產品選用的油分由三酸甘油酯為主，呢類Cream，我個人叫做Basic Cream，即係得保濕成分的Cream。咁唔係一件壞事，因為的確係咸魚清菜個人喜愛。
對於油肌黎講，因為明顯的就係佢主要成分唔太多油相保濕，而油肌的確唔需要咁多，對油肌係好事。當然實際用落要睇你皮膚受到幾高量的三酸甘油酯。
但對於乾肌黎講，單純的三酸甘油酯配方係唔足夠的，你需要搵更多元化的油相保濕，變相你又要買多一支有比較多元化油相的產品 (例如植物油、角鯊烯)。
水性補濕黎講，呢到比較多氨基酸，氨基酸絕對係好好的小分子補濕成分，可以見到佢補全返佢Hyaluronic Acid 2% + B5的問題，但係都係落得唔夠，特別係B5。而Sodium PCA呢一類落得比較少，但基於佢的特質，落得唔多我明的，因為鹽類產品永遠都係乳化增稠的天敵。

換言之，呢一支係一支單一化的面霜。對於油肌黎講無乜問題，如果單純想做下保濕。但由於油肌本身就唔洗太過保濕，自行分泌的天然油脂好多時已經足夠，只需要少量額外的脂肪酸或者有益的油溶性物質已經提供到良好的保濕，係使用上理應盡量減少。

對於乾肌黎講，單純的三酸甘油酯加少量的Lecithin係唔足夠做油性保濕，廠商利用乳化劑將質感改變，對於皮膚長期乾的朋友，係用個一下會有良好的保濕「感覺」，但對於長期或者持久少少的保濕成效我存有疑問。不過，人就好犯賤的，大家係保濕上都係追求感覺，咁唔否認佢最終會有良好感覺，始終Cetyl Alcohol、Stearyl Alcohol 呢類配方做左咁多年。但係比較極端的環境，盡量自己加返支油 (角鯊烯+脂肪酸+固醇) 或者 自己諗方法睇下點樣加重油分比例。



我明白好多人睇完會有一個諗法，佢咁平，要求唔好咁高。
好老實，我要求已經降低左，但我覺得連B5、甘油呢類基本上平到痴線的成分都唔肯落，走去落明星成分而且唔需要咁多的野，係唔係對得住消費者先?