新手上路 — 由程序說起，一個面膜點選擇好

面膜的市場係亞洲地區只可以用「不得了」黎形容。
係了解有咩面膜係有用之前，先了解有咩用先。

面膜當初開發出黎，係想通常封閉原理，表皮溫度提高，令成分同水分更易滲入皮膚。
基於呢種原理，任何成分，只要分子相對較細（<500Dalton），都會更加容易滲入皮膚。
*(有少量成分 >500 都會入到皮膚)

所以任何面膜都要成分優良，否則以各位鍾意敷面膜的程度，好易做成皮膚敏感。
原則上好簡單：
1）防腐劑一定要用，特別係紙面膜，但一定要係好的防腐劑
呢方面可以上cosdna check，唔洗多解。亦都建議check
2)  有冇太多乳化劑
由於你地覺得面膜就一定用完要有即時反應，包括好濕潤，好似直接將水打入皮膚咁，最好再有即時提亮咁。乳化劑的選擇就好重要啦。
通常廠商最後就加一大堆乳化劑，太多乳化劑亦好易令皮膚敏感。
3）價錢
唔好再信埋咩台灣韓國10蚊唔知幾多塊個類
價錢低，成本更低，用料的特級更低。
比你的即時效果更加可怕，有效成分缺乏但有即時效果，自己諗下。
同埋唔好日日玩埋個堆10蚊面膜，我知好多網絡「紅人」好建議咁做，但一定遲早有負面影響。

我地先由功能講咩面膜最有用：

1） 補濕抗敏 ★★★★★/★★★★★
補濕永遠係皮膚好易見效的野，即使你拎蒸餾水敷面都可以即時做到補濕。
補好濕，抗敏都做好一半，另一半就係點樣？就係加返足夠（重點！好多面膜加少少就算）的抗敏成分。

2)  清潔 ★★★★★/★★★★★
乾中油都要用 — 唔代表一定要用泥。亦係好快見到即時反應。

3） 美白 ★★★☆☆/★★★★★
美白係每一日都要做的事（如果想美白），因為防曬加抗氧化唔能夠保護晒成個皮膚，始終會有黑色素刺激左。每一日的美白產品就必須啦，但一定唔係用美白面膜，因為你唔會日日敷美白面膜。不過如果係岩岩曬完要即時抵抗返變黑，用美白面膜係其中一個選擇，但非必須。

4） 抗老 ★☆☆☆☆/★★★★★
抗老面膜係最無用的，因為每一份研究報告都要連續用、日日早晚用14-28日，講緊最少。唔通你日日用? 先唔講防腐劑問題，講左成分問題。
抗老成分，最平應該係植物萃取液，但如果植萃就可以解決老化問題，有兩個可能性
A)  專利成分 — 唔平
B)  一般植萃成分 — 平，效果唔出眾
衍生— 一張面膜又平又抗老 : 真正有用?  一張面膜貴 : 日日用用得起?
假設用得起，防腐劑。
紙面膜 : 用爛面
Gel/Cream Base : 下述


再由面膜形態講

1)  紙面膜

:) 

-->最有利吸收 : 有一層野係上面封住
-->方便
-->符合大眾需要

:(

-->防腐劑
-->一般價錢過平，原料等級及原料使用量成疑

2)  Gel Mask / Cream Mask

:) 

-->可較長時間使用
-->岩油肌(gel) // 乾 (cream)
-->防腐劑可以同一般面霜無咩分別

:(

-->未必有利吸收 (所以點解唔建議用抗老=>當然你加層野係上面就解決問題)



所以係唔係唔建議你用紙面膜呢
大部分程度上 - yes
因為多張紙 的防腐劑要用多好多
佢過到呢關 可接受

產品點評 ： OZ Natural Ocean Mineral Tonic

https://www.oznaturals.com/products/ocean-mineral-tonic
Ocean Mineral Tonic
Ingredients
Full List Of Ingredients:
Water, Hamamelis Virginiana (Witch Hazel) Water, Glycerin, Sodium Hyaluronate, Algae Extract, Aloe Barbadensis Leaf Extract, Panthenol, Glycolic Acid, Montmorillonite, Illite, Kaolin, Beta-Glucan, Vaccinium Oxycoccos Plant Extract, Vaccinium Angustifolium (Blueberry) Fruit Extract, Vaccinium Macrocarpon (Cranberry) Fruit Extract, Lycium Barbarum Fruit Extract, Euterpe Oleracea Fruit Extract, Wheat Amino Acids, Soy Amino Acids, Arginine HCl, Serine, Threonine, Allantoin, Hydrolyzed Vegetable Protein, Maltodextrin, Citric Acid, Propanediol,  Sodium Benzoate, Potassium Sorbate
(張成分表私下問的，有錯係佢打錯)


作為爽膚水，佢有冇做足要做的野？
1）舒緩皮膚洗面後的不適
出色。
內含尿囊素、蘆薈、海藻等舒敏成分。亦有氨基酸類同維他命B5作補濕成分。

2）為皮膚預備下一步的護膚
出色。
內含唔同的補水成分，令角質含水量提高，提高成分滲透率。
亦有利用輕微的果酸（份量唔高），去除老廢角質，提高成分滲透率。

3）作為第一支要用的產品，成分分子量夠唔夠細
平均以下。
內含不少的大分子成分。
包括透明質酸，Beta-Glucan，增稠劑。
未必太有利下一步的護膚程序。

4）產品特色
添加大量舒緩油肌一般出油問題的成分。
包括以金鏤梅水作基底，有高嶺土等等控油成分。
亦有添加不同的植物抗氧化成分。藍莓、海藻、橄欖葉等等。不過種類唔多，同時亦唔係由植物直接提取出黎的成分，即係唔夠好。
所以支爽膚水岩油肌。

=》護膚單純做補濕的人可以試下（不過我唔建議唔做抗氧化）
=》用完爽膚水唔用精華//其它有效成分可以一戰
=》夏天可以用完用極少量清爽Cream/Lotion就當完成護膚

第二支值得睇的牌子😬

對美白產品的誤解 一次解清

我經常性聽到大家對美白產品都有好多的誤解，不如一次講返清楚先

1)  有暗瘡的時候唔好用美白野啦，會比多左養分比暗瘡架

個人睇法 :
要先了解咩叫養分，如果係指某一類的美白成分會引發「油分分泌更多」、「痤瘡細菌生得更多」。呢個我地就要慢慢討論下。

維他命類 :
維他命B3會控制油脂分泌，變相減少痤瘡細菌生長機會，所以反而有助暗瘡
維他命C其實係有促進傷口癒合同埋抗炎的作用，所以反而有助處理暗瘡問題

植物萃取類 :
一般你地睇到的植物萃取都會有抗自由基的功能同抗敏功效都有，同埋一般黎講，植物萃取液落的分量唔會太多，所以對於暗瘡最少都只會無乜影響。

專門的美白成分 :
例如熊果素、傳明酸、麴酸呢類。傳明酸本身係有消炎作用，而熊果素仲有對抗光傷害的能力。最差的麴酸都只係唔建議日間使用。
當然呢個世界有好多其它專利美白成分，但問題在於呢類專利美白成分仲係好新，根本唔會有報告寫話對於暗瘡有不利影響。而商業文獻或者報告大多只會向好方面講。你唔好亦無法斷定佢係對暗瘡有負面影響。

酸類 :
包括壬二酸、果酸、水楊酸同維他命A類產物。 唔好講笑，呢類好多都係皮膚科醫生用黎醫暗瘡的小能手黎。

如果係講美白成分會令皮膚變得好敏感的講法。

呢類通常係建基於維他命C，而且係最原型的左旋維他命C。
而呢類講法又唔會話完全講唔通的。

左旋維C要係比較酸性的環境生存，PH<3.5。而有特定的人，特別係敏感加超乾肌未必係之前未用過左旋C的情況下，一下子用超高比率就直接頂得順。如果頂唔順，可能會引起敏感反應，產生左少量好似暗瘡仔的野，但其實個D係敏感而成的粒粒。

所以真正搞到你爆瘡唔係養分，而係質感。
對於暗瘡皮膚，使用產品的次數一定要精簡，而且要清爽。一定要用返D對於暗瘡有用的成分。如果對暗瘡未必咁有用的成分就暫時唔好用住。
而美白產品的質地如果係水性，都唔代表佢入面無加其它無用的增稠劑或者乳化劑。
如果係CREAM/LOTION更加出事，質地會變左厚身，引發更容易爆瘡的可能性。

總結 : 如果個隻成分係可以踩住兩邊界同時幫美白幫暗瘡，用係無所謂，單純美白或者好少幫到暗瘡就停用。而且質地亦要清爽，減少使用過多增稠劑的物質。

2)  用完美白產品一世唔變黑

個人睇法 :
如果你用緊個類產品，大部分都有殺死黑色素細胞的功效，而且十分強。
安全的美白成分充其量只係想 抑壓黑色素細胞的活動。
而唔安全的美白成分最常見就係類固醇、對苯二酚呢類。
所以識得黑返的美白產品先係安全的美白產品第一準則。

3)  喂，我用左唔知幾日都未白到 // 我用左6個月都白唔到

個人睇法 :
買左件產品好耐都未白到係令到灰心，但亦都唔好無限上綱上線先。
美白最快都要十四日，十四日講緊係商業文獻。
當然如果你成套都係美白或者可以快少少，但真正見到大分別都要等皮膚更新週期，一個月啦。

但如果用左一件產品半年都完全淡唔到丁屎咁多斑或者白少少。
首先要問自己有冇用足防曬。SPF30PA++或以上的物理防曬。
第二要問自己係唔係每一日都有用美白產品。
第三先問自己的膚色本身係唔係同大脾內側差唔多色。
記住，就算唔同色，都唔代表你白到，只係代表你比較大機會白到。
因為佢地膚色的分別係一個皮薄，亦受到紫外線的傷害十幾二十三十年啦。
而佢一個有受到紫外線傷害，但絕對細好多。
如果完完全全過到關但無乜幫到手，就算啦，換產品。

4)  即時白的產品

個人睇法 :
即時白有幾種。
一)  落左D色素、閃粉或者珍珠粉。呢類洗走就無。特別要留意有冇用二氧化鈦或者氧化鋅，呢類係會令到皮膚即時變白的礦物粉黎，係要用落妝產品落走佢架。
而珍珠粉，如果大家有Follow我賣野個邊都見我唔用珍珠粉。你可能心諗，下珍珠粉，無所謂啦咁傳統天然的野。原因係因為珍珠粉的市場極奇混亂，係唔係真?定係假的?
即係係真，入面的重金屬有冇超標?
二)  補濕淨白。即係角質層補夠濕，反射睇落去好左白左，幾個鐘內打回原狀。
三)  激素。呢個唔多講，總之唔應該出現係護膚品。

新手上路 — 由程序說起，一支精華產品應該點擇好 ? (三) 美白—下

其實有好多成分都可以美白，我只可提出部分我認識同常見的。

(1)  抵抗發炎類
首先要知道發炎同埋變黑的關係，當發炎出現的時候，例如暗瘡、濕疹個類，黑色素細胞就會被刺激產生一大堆黑色素，之後就變成炎症後的色素沉澱，所以長期使用抗炎抗敏產品係有效防止變黑。

• 植物萃取液 及 由植物提取而成的成分

例如 : 甘草、金盞花、洋甘菊、雷公根(積雪草/崩大碗)、蘆薈、柳樹類 等等
註 : 無論佢有無助美白都好，呢類二線植物原材料多吸收都唔係咩壞事黎的 (一般黎講)

(2)  抑制酪氨酸酶類
呢到基本上有一大堆成分可以做到，我就唔列咁多出黎

• 植物萃取類

甘草、桑類、大茴香、牡丹皮、熊果、石榴 、檸檬等

• 高貴版美白成分

維他命C 、 胜肽、果酸、壬二酸、熊果素、麴酸、傳明酸、Chromabright R

(3)  協助角質代謝

• 酸類

果酸、水楊酸、杏仁酸

• 非酸類

酵素、泥類、磨砂

(4)  阻止黑色素細胞將黑色素小體向角質層移動

• 維他命B3

(粗體係我個人喜好的美白成分，因為使用限制少同時有好多功能)

當然世界上有好多可以做到美白的成分，上面係比較常見。

但其實常見的，唔代表差，只在乎廠商幾有心機做個件產品。
同時，基本上你見開個D，好過你D完全未見過的產品，因為通常常見代表研究比較充足。
一支行銷產品大部分都係拎一隻成分做箭頭包裝，底個層就係用常見的成分做真正的功效。

新手上路 — 由程序說起，一支精華產品應該點擇好 ? (三) 美白—上

今日黎到美白，美白分好多步。但無論點都好，

美白一定要用

足夠份量最少係spf30pa++的防曬。

成個變黑就係三個步驟。
(最傳統最簡單的美白產品，再新少少的都有另外少少機制)


如果連呢三個步驟都解決唔到就真係唔好叫做專做美白精華
(1)  有因素刺激一種會黑色素細胞活躍的酶—「酪氨酸酶」。
(2)  個隻酶產生左會催生黑色素形成。
(3)  黑色素產生之後會慢慢由你皮膚比較底層浮上去你皮膚較表層。

所以傳統上，只要落左三隻成分就可以做到美白。
A)  防止酪氨酸酶形成 — 防曬 + 有美白功效的植物萃取液+維他命C類產物
B)  還原黑色素顏色 — 維他命C
C)  加速皮膚更新令黑色素脫落 — 去角質類產物。

只要做到呢三步已經係一支好基本的美白程序。

所以買美白產品 維他命C 一定要有，其它我唔理你加咩入去。
但記得注意，維他命C添加的份量係非常重要。如果佢排到好後 (係成分表入面) 或者係防腐劑後面，基本上我地唔洗當佢存在。

而其它乜野麴酸、熊果素、壬二酸或者傳明酸只係一堆附加價值，而唔係主要價值。

佢有加，正，但如果無高活性的維他命C底下係缺乏左最重要的美白元素。

而比較新的機制就係有兩種。

(1)  防止黑色素向上層移 — 維他命B3

(2)  阻止黑色素細胞刺激素同黑色素細胞產生出黎 — Undecylenoyl Phenylalanine

上面隻B3唔多講，市場上一堆佢的解釋，總之佢就係防止由底層的過多分泌的黑色素浮上面，唔浮上面的時候佢就會慢慢自動因為皮膚自然更新而消失。
而第二隻就比較新的Idea，成分都好少見。
因為黑色素要成功分泌，佢就要有D野刺激佢。
最先就係紫外線射入皮膚，皮膚的a-MSH就會同黑色素細胞上面有隻物質一齊合併刺激黑色素細胞做野。所以只要可以阻止埋呢一步就得。


所以你買美白的底線就係
(1)  高濃度維他命C (Ascorbic Acid >10% // 其它維他命C衍生物>2%)
(2)  植物萃取液—有效抗炎及美白
(3)  麴酸、熊果素、壬二酸或者傳明酸個類有係好事，但只係令到精華素正少少
(4)  維他命B3//Undecylenoyl Phenylalanine如果存在係好事，始終B3係一隻多功能成分
(5)  平時D去角質步驟可以做，但不要過量

咁有冇簡單的成分表比你地參考，下集先，想偷懶 :D

新手上路 — 由程序說起，一支精華產品應該點擇好 ? (二) 補濕

係睇呢篇文之前，請先了解小弟對補濕的睇法。
(1)  補濕產品唔係必需，但補濕成分係必需。
(2)  補濕係好重要，但保濕更加唔可以缺少
(此文只講補濕)

係買產品之前，大家對補濕產品的期望係咩呢 ?
係用完支補濕精華之後白半度?
係用完支補濕精華之後會令到皮膚好似注射唔知幾多cc的水分?
係用完支補濕精華好似皮膚飽滿左?

我一直都講，一定要了解 或者我比較鐘意叫 正視你的要求。

好，係了解補濕可以做到咩之前一定要了解一支好補濕產品係點構成。

(1)  分子大小
補濕產品只係角質層的遊戲，講白D，就係你唔好期望佢大部分的成分有咩好特殊的功效，因為根本入唔到去基底層做野。
好的補濕產品要有唔同分子大小的成分。睇下圖就得

黃色線係指皮膚的角質層。
所謂分子大就係指係角質層外(圖片上面)的成分。
分子細就係入到去角質層的成分(菱形)。




而通常分子大的成分都係用黎鎖水多，但我地都放佢係補濕，純粹因為出面產品係咁分。



(2)  不同的補濕成分
有好多種補濕成分架，如果一支補濕精華可以包左大部分的補濕成分就得。

所以只要有唔同大細，唔同成分就得。
下面我提供一個簡單的表比你地參考下。

• 透明質酸  (分子大、天然保濕因子)

註 : 無論點用生物科技分割，現時都無法滲入皮膚

• r-PGA  (分子大)

註 : 有部分廠商話佢可以吸5000倍水分，即係比透明質酸勁5倍。其實吸幾多係無用，因為透明質酸的優勢係皮膚基本無敏感的可能性。

• 增稠劑 (分子大)

註 : 例如三仙膠、共聚物(Copolymer)呢類，係無任何護膚，但可以呃到你地有一種幾保濕的感覺，一般無乜害。

• 維他命B5 (分子細、維他命補濕類)

註 : 大家成日聽的B5 Gel的主要成分，但單單得b5係做唔到幾強的補濕架，所以唔好本末倒置，最好唔記得左你係要補濕唔係要買b5返黎玩。
註 : 有助維持角質層健康，幫助傷口癒合。有人話有消炎作用。

• 尿素(Urea) (分子細、天然保濕因子)

註 : 你敏感個時醫生成日都會開尿素Cream比你，所以尿素係好野，個名係差d咁解。

• 咯烷酮羧酸鈉(Sodium PCA) (分子細、天然保濕因子)

註 : 會令你感覺好補濕。

• 甘油/丙三醇 (Glycerol) (分子細、天然保濕因子、多元醇)

註 : 無特別，但必須。

• 丙二醇、丁二醇等多元醇類補濕(分子細、多元醇)

註 : 唔需要因佢而買。個人唔建議使用1,2丙二醇。

• 氨基酸(分子細、天然保濕因子)

註 : 多數會搞到支產品厚身左，但皮膚會幾補濕，同埋有部分氨基酸會有助增生膠原蛋白。

• 植物萃取類補濕(分子細、植物類補濕劑)

註 : 常見 蘆薈、海藻、青瓜、金盞花等，值得買，因為通常有其它功效。

所以你買個時就要執
==>  分子大+分子細
==>  唔同類型的補濕劑 (天然補濕因子要盡量多、多元醇隨便)
==>  減少用增稠劑的成分

新手上路 — 由程序說起，一支精華產品應該點擇好 ? (一) 抗老

香港人好鐘意用精華，因為覺得精華可以改變到好多野。
咁好老實，護膚品可以做到的野都係個咁。

今日先由抗老講起。

抗老呢兩個字好空泛，無可能我推一支野出黎，將佢個名Set就抗老精華就叫抗老。

首先要了解老化係點形成。

主要原因係因為紫外線的因素。紫外線係形成光老化的主要原因。所以抗老的第一步就係對抗光傷害。
-->  產品 : 防曬 + 抗氧化
第二原因係發炎。所謂的發炎可能基於防曬+抗氧化未能完全保護你塊面，有部分的紫外線進入左皮膚引發自由基的傷害。所以晚間要做的修復就係處理自由基
-->  產品 : 抗氧化

所以最基本的抗老就係「抗氧化」，你因乜野原因護膚都好，抗氧化絕對係第一樣要買的產品。咁抗氧化產品點叫後就之後再講。

之後就係「解決」老化而形成的問題，包括乾、真皮層變薄、角質層變厚、老化紋、皮膚彈性。

乾唔難解決，就係搵支補濕。呢個下幾集會講。

真皮層變薄。
現時最好的成分就係維他命A做真皮層變厚。所以抗老就要執一支有維他命A的產品。
(所謂最好係有大量研究+實證)
角質層變厚。
無辦法，隨住人老化的新陳代謝同埋紫外線對皮膚的傷害，角層質會較慢咁代謝，所以角質層問題搵一支果酸，唔使太高比率，6%-10%平日用。
老化紋
老化紋又係因為紫外線的問題，長年的紫外線傷害的累積，真皮層的膠原蛋白可能打結，萎縮等等，老化紋就出黎。
對於呢類問題，現時的護膚品方案主要係預防+舒緩。
預防=抗氧化
舒緩=維他命A+維他命C+胜肽
維他命A可以減淡紋就唔洗講。
維他命C可以促進膠原蛋白合成，可以令膠原蛋白增生，都可以舒緩紋的問題。
胜肽先記住一隻成分 Matrixyl
呢隻係最多研究指出可以解決紋的問題。

所以最基本的抗老好簡單

抗氧化精華

維他命A

維他命C

AHA

如果支產品係正正常常，有改變係一定。
真正的抗老係好簡單，但睇你對佢有咩期望啦，想令你妙手回春咁就無乜可能。

特發文章 : 轉季點算好，乾肌油肌點處理

轉季了，天然開始轉涼了，點算好。

一支花水一支油可以解決大部分問題。

對於一般人開始有乾同甩皮，大家可以試下 :

你地平時會FU完花水先走去用精華 (一般黎講)  或者 用完精華先FU花水

ANYWAY，現家試下咁做。
將精華用晒，最後一支係補濕精華。

之後拎隻碗出黎，將花水同油同放入隻碗，用你的方法攪佢兩攪。
即刻拎D面膜紙或者用你的方法將D水同油整上面。

同平時一樣時間就好拎返落黎。

之後唔該瘋狂同你塊面按摩到表面陣水散發晒

就用面霜 或者油 每次少少咁將佢APPLY上面

例如我每日用一大勾的面霜，你將佢分三次用上面。

但對於油肌要注意，你地如果無乜甩皮或者乾的位就唔洗做咁密，可能一星期一次或者乾到出聲唔得先做。如果唔係會爆瘡。

至於油的份量要幾多?
Well，我打左咁耐文仲唔知我的答案，梗係根據自己的喜好啦，一開始由1滴試起。
就算乾肌都唔使日日做，正如你都唔使日日fu mask，因為其實如果平時有用開好的補濕精華就唔會有咁大問題。

如果係乾肌點算，係fu mask之前用少少補濕精華打底。

至於呢個方法係唔係有玫瑰痤瘡個類都用得?
係自己睇路，點解咁講。
其實方法係無錯，亦無問題。
而係對於玫瑰痤瘡類人士，盡量唔好用咁油的野，同時亦唔好用太多難以揮發的水。
咁花水同油的比例岩的情況下，其實玫瑰痤瘡最好唔好搞咁多係咁摔面的動作。
所以唔建議做摔面動作，輕輕印返好佢之後上面霜，用幾多就自己睇路。

新手上路 — 由程序說起，一支爽膚產品應該點擇好 ?

第二集，講爽膚。

洗完面之後係唔係一定要用爽膚水呢 ?
其實呢個無既定答案。我個人就建議如果係一支做到佢功能的爽膚水可以用，做唔到可以唔用。

咁爽膚水的功能係咩呢?
就係令

「岩岩洗完面乾同受到刺激的皮膚回復正常」

「準備接下來的護膚步驟」

咁事實上，最簡單最平的做法就係
補濕。因為補濕就可以做齊上面兩個要求

點補濕? 加甘油、丁二醇(多元醇類)。呢類係令皮膚最平的方法令到皮膚補濕，處理乾的問題，同時亦有少許令皮膚鎮靜。

但事實上係唔夠架，朝頭早個一次的爽膚水程序仲可以咁樣過得去。
但對於夜晚，由於皮膚受到紫外線的傷害，皮膚係處於一個發炎狀態，仲要係洗面的時候強行洗走油脂，皮膚更加需要更加多的抗敏野。

所以，一支爽膚水應該有抗敏成分。
最簡單應該係植物萃取液，一般的植物萃取液都有抗氧化的功效，咁抗氧化一般都可以處理因為自由基而形成發炎問題。
而有唔少的植物萃取都可以有抗敏。
例如金盞花、洋甘菊呢類，相信唔使我多講。

所以作為一支爽膚水的底線就係上述

「多元醇 + 植物萃取」

再進一步，廠商會用唔同的方式滿足唔同的需求。

例如 : 乾肌要補濕，所以落增稠劑。又或者落部分可以同時做到乳化同埋潤膚增稠的成分。
但事實上作為爽膚水，佢係應該準備下一護膚步驟，我個人認為咁樣只係阻住下一隻產品的吸收。
所以我一直唔建議係爽膚用太厚身的產品，即使係乾肌。
有人會問，咁乾肌唔用厚身野唔夠潤會好唔舒服。
咁好現實，你係用個下之後點都會有一段因為你拍左D水上面先感到的水感。
拍到咁上下，其實你本身就應該進入精華/面霜的步驟，而唔係係到等等等等等等到所有水都乾晒 (其實係你摸上去無左個種水感，唔係指真係乾晒)。

咁爽膚水加美白呀個類野有冇用?
我個人睇法，理論上可以做到。但實際上出面的廠商做唔做到呢。
我諗都係睇返價錢啦，價錢貴咪可以加多D原料。價錢平咪用補濕做即時淨白。
[廣告]我自己支爽膚水都因為價格限制，只可以盡量落2隻抗敏美白+B3+同B3協助美白的野[/廣告]。我地呢類手造護膚品一般黎講都無咁多其它成本 (廣告)落的原料都咁有限制，咁你諗下出面大牌子可以落到幾多。
唔係話唔得，不過一定唔係一般人負擔得起的Price Range。
什至係超高價都唔代表有呢類美白成分，什至比得多。

新手上路 — 由程序說起，一支洗面產品應該點擇好 ?

跟住落去，我地一連幾集都會由你護膚步驟，每一個步驟會用到的產品，同你講乜野先會搵呢類產品的真正條件。
[之後就開始動工三級保養架構—對抗、功能、醫美(不過我唔會打醫美，因為唔熟)]

第一集，先講洗面產品。

洗面產品 (無論邊隻洗面產品都好) 想做到的野就係用界面活性劑將皮膚表面的油脂帶走。

咁首先乜野係界面活性劑，諗下諗屋企的洗潔精就得。

平時你屋企食完飯之後，D碗碗碟碟底一定有D油污，呢個時候你加D洗潔精就可以將D油污帶走。

哇，一聽落去咪好似用洗潔精洗面 ?

呢個就係選擇第一個要點，搵個好的界面活性劑。

OK，大家唔會想記成分，因為呢樣係我做。不過都記住少少野。

--> 不要使用SLS ， 因為去脂力較高。

--> 唔識D界面活性劑唔緊要，記住「氨基酸提取」同「椰子提取」。因為呢兩隻界面活性劑係比較溫和。咁係唔係代表其它唔溫和，唔係，只不過係呢兩種通常比較溫和。不過都好取決於用的份量有幾多同埋有冇落其它界面活性劑。

咁大家唔識成分，就會開始有D方法，例如用後感覺。

OK，所以廠商就開始用D新方法令你地覺得好舒服。

最簡單就係落補濕成分。

因為大眾想要的感覺就係洗面唔緊唔乾。

所以廠商就會落大量的補濕成分去欺騙你的感覺，

「即使我去脂力幾高都好，我落一大堆補濕成分去令你覺得唔乾」

(吸水令皮膚好似好多水)。

破解方式好簡單，就係沖多多的水。

水可以沖走面上的界面活性劑同埋其它成分，只要不停沖水，就可以沖走假象。

所以你應該搵一日測試下你皮膚對個隻洗面產品頂唔頂得順下面講的條件。

所以正確黎講洗後感覺唔係要好潤，而係你唔好再好緊繃的感覺，好似成塊面就快縮埋一舊，乾係正常。

吓，點解一定會乾，你平時感覺到潤，除左因為水，仲因為油。

你最表面個層唔單止係污糟野，亦有你皮膚的天然屏障—油脂。

而界面活性劑係無智能，唔識分邊類係污糟野、邊類係油，咁咪一炮過洗走。

所以洗面完覺得比平時乾係正常，但乾到緊繃就出事。

常見有關洗面問題 :

(一)  聽講清水洗面洗唔乾淨，係唔係?

清水洗面對於敏感、乾肌黎講係無問題。因為溫度較高的水比溫度較低的水更有效洗走油脂。而你地好怕個類污糟野其實一般用水都洗得走。

我唔係叫你去用熱水，我係叫你用暖水。

對於洗面產品比較多需求的人通常應該係油肌同埋有化妝的人士。

前者的清潔油脂方面水未必夠力帶走，而後者係防止有任何妝容未能因卸妝產品洗走。

(二)  聽講有隻新的清面產品拎埋認證，又唔知加埋邊隻成分，可以去到暗瘡同暗瘡印。

好耐之前我都講過，係洗面產品落一大堆有效成分係想推高價格。

而值得睇的有效成分只有抗敏同補濕。

好多廠商話自己有能力幫你去暗瘡去瘡印，原因係基於佢地落左某一隻成分，

而個隻成分係普通產品使用上係有效做到上面所講的功能，例如維他命B3。

但問題係洗面個一分鐘成分係進入唔到幾多係皮膚入面，仲要一分鐘後用水沖走，沖走唔單止係界面活性劑，仲係你的荷包。

(三)  PH5.5係唔係好重要?

唔係，不過如果同樣係相同的界面活性劑，相同的補濕抗敏成分，相同的溶劑等等。唯一唔同只係PH值的話，咁PH5.5係比較好。

我意思係 PH5.5只係其中一個衡量的指標，而佢亦唔應該比界面活性劑的選擇先考慮。

(四)  特別的位置要用特別的清洗產品?

唔係，但重點係你本身界面活性劑的選擇。

如果本身個件產品的界面活性劑的比例高、選擇差，做成的去脂力極強係會令到某類敏感少少的部位容易產生問題。

所以一切都係睇界面活性劑，而唔係廠商宣稱的成分。

下一集，講爽膚水。

眼部問題 (下) — 油脂、紋

今日繼續講黑眼圈問題。

出現係區域三主要有兩個問題

1） 紋
呢到所指的紋有兩種。
首先係老化紋。老化固然關基因事，但光傷害都係非常重要的一環。
平時要顧埋抗氧化同防曬做預防，即使老化紋已形成都會有幫助。
而對於形成左的老化紋，現時對老化紋最有研究證明的係維他命A，當然，呢隻野用上面好易敏感，更何況係眼。如果用唔到維他命A，使用胜肽就非常重要啦。
咁有邊幾種胜肽好D?
現家研究得比較多的係係Matrixyl同copper peptide（後面個隻仲有疑問）。
前者多數唔會有廠商做多比你，後者有樣野好重要。
每日吸收copper peptide的ppm係有限，過量會令到皮膚受到接近不可逆轉的傷害，包括皮膚鬆弛，老化。
當然有人話邊有人會做過量！？現家出面有種風氣，假設上限係3000ppm，大部分廠商為左吸引人買會整到somehow 2500ppm ，如果每日用幾次有咁多ppm的野（通常3次），無人知道會唔會做成負面影響，而重點係傷左就無辦法還原。
唔係唔用得藍銅胜肽，但個人建議用的ppm低d，寧願用2次。
而Matrixyl就比較安全，而佢都比較出眾。佢公司資助的研究報告就形容係逆齡的成分，主要歸功於修復真皮層。
再者係乾紋，乾紋唔難解決。補好濕鎖好水就得。如果搵到岩的補濕產品，亦唔需要用眼部專用補濕。對於老化令到皮膚鎖水能力差的人，一般只要針對分子酊同鯊烯就得。前者產品周街都係，B3長遠增生+分子酊短期保濕。後者亦都唔難買，貴與平咁解。
亦有D產品可以增生透明質酸，例如胜肽同異構寡醣。

2）油脂問題
由於眼的獨特性，眼霜好易用得唔均勻令眼霜集中左係眼頭部位，出現凹凹凸凸的粒粒。咁油脂問題就要交比酸解決，但有人無辦法係眼附近用酸，什至泥都唔用得。市面上有D非酸類去角質（我唔係講緊磨沙同個類垃圾擦子膠碎），或者可以試下。

位置四會出現的係表情紋及老化紋

老化紋都係個句，防曬+抗氧化+處理膠原蛋白成分。

之後講表情紋。呢種紋係指當面部出現表情動作先會明顯出現的紋。由於呢種紋係肌肉的問題，護膚品幫助唔大。主要都係通過膠同埋胜肽。

前者已經講過，後者係通過阻斷神經傳遞肌肉收縮訊息，使到肌肉無咁容易有太多動作。所以有類botox之稱，當然，無可能有botox功效，但叫有d效。

眼部問題 (上) — 提神、黑眼圈

經常有人問我有冇辦法解決眼部問題，但眼部問題實在太多、太複雜，我決定拆開幾日慢慢講。今日先講提神問題同埋黑眼圈問題。

一號位 : 提神

先講提神的問題，眼部唔夠神主要係「1號位」的問題。

眼部要有神，最基本係要夠大，眼夠精靈。

咁眼入面精唔精靈本身就唔關護膚品事，係你天生同有冇滴眼藥水的問題。

下一步睇隻眼變大，醫學美容係講緊通過提眼，開眼角呢類方法令到眼變大，護膚品係無乜辦法令到佢可以變得有神。

唯一護膚品可以做的係通過收緊機制，令到「1號位」拉一拉，無咁容易睇落去好似無神的狀態。

點做到收緊機制，兩種方法 : 膠同埋胜肽。

膠就係護膚品加入大量的膠，令皮膚拉緊，洗走就無。咁通常膠都唔會有害的，唯一會比較易出擦子膠碎，我個人建議如果要買呢類野產品，最好買放係Cream的，唔好放係Serum。但無選擇之下就算啦。

當然，眼底黑眼圈同埋紋都會影響神態，之後再討論。

二號位 : 黑眼圈

黑眼圈成因好多，但大體可以分做

=> 色素型黑眼圈
通常都係關遺傳同黑色素事，小部分因為卸妝唔乾淨或者係因為皮膚病而引發的色素沉澱。
係護膚品上面盡做的領域係「防曬+美白」
防曬最緊要當然係用物理防曬，SPF30及PA++的。面部的防曬係可以用係眼到(如果成分係正常)。
美白都係通過抑制酪胺酪胺酸酶個類野，無乜特別，面部美白產品用上去就得。
一般都係維他命C、傳明酸、維他命B3、去角質呢類。
而色素型黑眼圈大部分都係啡啡地色。
有另一點要注意，眼部皮膚比面部皮膚更易出事，原因係皮薄。皮薄令到皮膚更容易出現炎症狀態
所以總結黎講，唔需要為色素型黑眼圈買眼部產品，但如果產品本身想解決係下面所講的問題，而色素型黑眼圈只係附加價值，就另外講法。當然分量要自己調節。

=> 血管問題型黑眼圈
成因好多，包括鼻敏感、訓唔夠呢類比較常見。

好似上圖咁，血管的血流得唔通，所以搞到好似有種瘀血咁。
(有興趣知深入少少你可以私底下問，但太過深我都係唔識。 :D)
咁好老實的，護膚品係無可能解決沿頭問題，最多都係改善下。
對付呢類型黑眼圈，主要係以加快返血液循環為主。
常見的係維他命K、咖啡因(咖啡萃取都會有同樣效果)。
天然上的選擇有永久花呢一類純露或者精油，而山金車(植物黎，有出植物油)都對呢類黑眼圈有幫助。
而係科研上面，有好多大公司都出左幾隻有關於眼部的胜肽或者成分複合物。
而黑眼圈有幾隻比較出名「Eyeseryl」(胜肽)、「蛋白混合物」(成分混合)。
當然，佢地個份研究報告就寫到咁。

而呢一種黑眼圈就一定要買針對眼部的產品，因為呢類成分大多唔會出現係面部產品。

而呢一個黑眼圈亦係眼部產品的生存價值最高個項，有關紋或者其它野只係附加價值，記得分清主次。

-上集完-

產品跟咩次序用?

通常街外的人都會同你講
首先爽膚，之後用精華，之後再Cream。最好再加多支肌底液，冬天再加多幾滴精華油，再係最後個時加個睡眠面膜。

先不理會呢類產品需唔需要用，亦唔理有冇用。當產品的種類、品種愈出愈多，我地應該點跟住排序呢。

第一，我地先理解點解要「先爽膚，再精華，後面霜」呢一種廠商建議使用程序。
爽膚水的功能其實不大，大部分都係想處理你皮膚清潔後的不適問題，包括乾同埋面部極度緊個種感覺。而呢兩隻感覺全部來自於清潔產品中的界面活性劑清洗油脂的結果。
所以爽膚水要做的係補濕同抗敏。
而補濕同抗敏的成分大部分分子都比較細。例如甘油、多元醇、尿素呢一類成分。
當皮膚完全鎮淨後，先叫真正進入護膚程序，所以就會用精華素同面霜。
而精華素大多都會比面霜薄，成分的分子亦都比較細，同埋油分比較較少、什至無，所以精華素會放係面霜前。
而面霜通常會有油分 (即使標上零油分，都會加返矽靈)，而油分的作用係防止水分流失，咁就可以防止頭先用上面的護膚品的水分流失。

好，了解完我地可以得出一個結論，所論爽膚、精華、面霜只係有兩個原則。

先水後油、先薄後厚。

先小分子後大分子。

所以如果你地睇明白上面兩句，就會明白，爽膚水唔一定要洗完面用，精華素唔一定係爽膚水後用，特別係呢個時代產品開始亂咁舞。
例如 :

比較兩件產品，我地好容易見到產品一比產品二成分簡單，亦無落任何多餘的增稠劑。所以一般黎講，產品一應該先過產品二用。
但其實，產品一係一支精華，產品二係一支爽膚水。
即係係BA教的概念，應該先用二後用一。
所以唔好盡信任何理念，自己先Check Check成分。
就算完全懶的，唔該都試上手感覺下邊隻比較薄。

好啦，知道基本的兩個概念，之後就知道下唔同功能性的產品應該點用比較好。
原則好簡單 : 「真皮到表皮」

例如，抗老的產品好多都關膠原蛋白事，而佢係存在係皮膚的真皮層。
例如，補濕產品好多只係要提高角質含水量，大部分關皮膚角質層事。

所以應該要先用抗老，再用補濕。特別係精華類了解返呢類野。
簡單黎講「抗老，美白，暗瘡，補濕」係最基本的次序。

所以如果你本身係肯去查下成分，絕對可以將自己的產品放係岩的位置。

所以肌底液點放?
因為佢通常係通過改變極性同埋令角質層更為濕潤2，令後續成分更加吸收，所以要係有效成分前。
所以係放係精華素之前，因為精華素係有效成分最多 (理應)。
所以睡眠面膜點放?
因為佢極為厚身，所以一定要放最後。

用酸攻略 : 其實只要運用得宜 ， 人人都可以用酸

皮膚一般的更新周期係28日，但總有原因令到皮膚角質層的脫落唔正常。
咁樣形成的問題包括 皮膚暗淡、暗瘡等等的問題。

而好多人對酸都有一種誤解，我地首先了解左現時有咩流行的酸性產品(皮膚科用藥不作討論)。

果酸 (AHA) —
果酸有好多種唔同的世代、水溶性。而分別在於分子量的大小。分子量大，代表較難進入到皮膚深層，反之亦然。
值得留意的係，大部分果酸產品係「接近」無上限添加。並非指產品可以出現70%果酸，而係一般家用產品去到20%都可以。

水楊酸(BHA) —
其實水楊酸都有另一種形態係中性，但現時仲未普及，原料成本亦非常貴。所以大家都仲係用緊一般的水楊酸。水楊酸的特性係脂溶性，可以深入毛孔清理。
值得留意的係，水楊酸係大部分的國家係有法例規管，都幾嚴。

杏仁酸(唔識英文簡稱) —
杏仁酸係新時代的產物，水油兩溶。分子量比果酸大。所以佢原料比較溫和。
同樣地，由於法例係無可能追得上新時代產物，呢隻酸係無任何法例規管。

=>有法例規管有咩咁重要
無法例的規管，代表大家可以進行軍備競賽，不斷出更高比率的酸。例如20%的果酸。
現實的係，任何酸都需要用溶劑去將酸溶入產品先會發揮更好的功效。
簡單黎講，即係話皮膚除左要接受更高比率的酸而形成的刺激外，更加要接受溶劑過高而形成的刺激。
係唔係好難明呢。例子咁講 :
甘油係一種好常見的成分(補濕、溶劑)，但如果一件產品有50%的甘油，用上面，99%會有刺激感。
所以溶劑的使用從來都係需要去衡量。
特別係台灣，酸類產品直頭可以用混亂黎形容。
杏仁酸可以出到25%。我只可以話，無事係你皮膚耐受性好。

=>新時代的產物好唔好
事實上，呢個係個人的取態。我個人就認為杏仁酸係配方、文獻同法規上都未跟得上。係未能夠保障到消費者的安全。而且，杏仁酸當中的機制其實係有點比上不足比下有餘。等陣再講。

咁三隻酸應該點樣選擇

AHA : 對抗光老化 // BHA : 對抗暗瘡黑頭 // 杏仁酸 : ???
杏仁酸絕對無大家諗到咁好。

首先我地理解我地用酸想做咩。
(1)  處理暗瘡、黑頭
A酸當然強，當佢係皮膚科用藥，我地唔討論。
而護膚品當中，水楊酸的特性比較有趣。由於佢脂溶性，同時有消炎的功能。
即係可以處理係毛孔內的發炎同油脂角質問題。
呢樣野AHA可唔可以做到 — 唔得。
杏仁酸做唔做到 — 一半半，角質問題可以解決，但佢的消炎功能其實未有好確定性的資料講出黎。

(2)  美白
所謂的美白，第一步當然係指將平時個種老廢暗淡無光的角質去除。呢樣三隻酸都可以做到。水楊酸因為法例限制問題成效未必咁高。而下一步係有冇方法有效去除，因為果酸的選擇，可以選擇比較細分子的果酸，令到去除角質的功能更好。

(3)  抵抗光老化
紫外線會入到真皮層令到膠原蛋白出現問題，包括打結、萎縮。而果酸係現時最有野支持可以入到真皮層令到膠原蛋白增生 (當然濃度要高，要去醫生到做)。而杏仁酸??無人知。

咁就有人會話，反正我都係家用，拎個中中等等咪得。
問題係係與其用個中中等等，點解唔用一個二合一(AHA+BHA)的產品 拎晒兩邊最有效的長處?

所以我一直唔支持人用杏仁酸。

咁我地講下常見對酸的誤解

誤解一 : 酸會令皮膚變薄，將來皮膚好薄就好易敏感。
正解 : 酸的確會令「角質層」變薄，但有機會令「真皮層」變厚。
而皮膚薄易敏感係基於成分會更易滲透到皮膚較底層，變相令有效同「有害」的成分同時更易進入皮膚。變成咁敏感。
簡單黎講，係你支產品有問題，唔係果酸水楊酸有問題，從來都唔會話「反正產品得一兩隻差野所以無咩所謂啦」

誤解二 : 酸有光敏感，朝早唔用得
正解 : 的確，皮膚角質層厚，對於紫外線的抵抗力係會比較高。
但問題係我地從來唔應該將皮膚直接暴露於陽光中。所以呢個問題係打稻草人，因為我地係朝早不嬲都要用足夠的防曬。有防曬，自然唔存在光敏感問題。

誤解三 : 敏感皮膚、玫瑰痤瘡係唔可以用呢類化學野酸去角質，用天然的黃糖就得啦
正解 : 呢個係D賣天然護膚品的商家講出黎的大話。
第一，天然去角質唔係得物理性去角質，同時亦有酵素去角質等等化學野，所以天然從來唔等於「無化學」。
第二，物理性去角質的危險性其實都唔小。物理性去角質要睇磨沙粒子的形狀、大小。我自己認為無一粒黃糖係一般天然護膚品廠商可以做到純圓型。就算真係有純圓型 (荷荷巴珠)，亦都非常容易傷皮膚 ，其原因在於你難以控制皮膚磨沙時的力道對於敏感地方的傷害。
所以物理性去角質係不可控，而酸類去角質你可以控制濃度，配方。呢個先係去角質最重要的地方。
對於敏感皮膚同玫瑰痤瘡係絕對可以去角質，問題係次數，用量同埋點用。呢個之後再講。

誤解四 : 見到成效就瘋狂用，反正無乜敏感反應
正解 : 皮膚如果對酸第一日就有敏感反應，咁你濃度一定太高。但濃度唔高唔低個種，通常都要一段時間先反映，特別係皮膚本身無去開角質的人。所以記得要遵守返等陣講的原則。

誤解五 : 用酸用到一定比率一排好似無咩效，所以要不斷用高D
正解 : 用一個比率一段時間，只代表你可以選擇用更高比率，並不代表必需或者用更高比率係好事。皮膚點解用一樣產品一排好似無咩效，代表住個隻產品最多只可以比到你咁多功效。例如5%的Vitamin C，用一排可能會白少少，但一定去到一個時期就會停，因為5%只可以做咁多野。但代唔代表無效，絕對唔係。而你放棄用維他命C之後，皮膚就會失去左額外補充呢個成分的機會，變返黑，所以你遲下再用返就會好似有效返，純粹係習慣同反差問題。
常見解決方法就係提高比率或者用更高效的成分。後者不談。前者係護膚品常見的兩難。高比率代表高效，但一隻原料的比率高，代表佢刺激性都高。配方就係要平衡二者。但酸類的刺激性絕對係痴線式增長，所以我唔建議用咁高比率的酸，除非你係皮膚科做。


好啦，入正題，點用酸。

首先，任何去角質都係一種傷害皮膚的做法。呢個係無得講。
所以係去角質的前同後都要加入特別的保養程序。
原則好簡單 : 「由少至多、由油至乾」

由少至多係指 用量同次數。

好多人用去角質都好心急，其實要慢慢令皮膚接受到酸的比率。
次數要由少到多，例如8%的AHA由一星期一次去到四日一次，但幾時先開始轉換次數頻率呢?我建議比皮膚適應最少七次至十次以上。最少都一個月。但就算點都好，但唔好超過得太過份。例如兩日一次8%AHA。
用量要由少到多。單單張化妝綿吸走幾多酸類產品都差好遠，用一滴同用一毫升都差好遠。
先用少D的酸，之後慢慢再加到合適份量。
用的方法要由油到乾。先針對皮膚最唔受刺激的部位，通常都係額頭、鼻頭，最後個少少先用到係皮膚比較弱的部分，例如兩邊面頰到上唇。呢個原則係講緊將D酸類產品放係化妝綿到用。至於個類去角質面膜就比較難控制到呢樣野。不過都要遵守由少至多。

至於係酸類程序前，一定要補濕，用返D天然補濕因子的產品、維持角質層健康的產品。
而事後亦都要防止酸類引致的即時反應的產品，即係抗敏消炎，例如純露。

呢個係最基本的原則，但對於敏感個類皮膚，應該點做。

首先，比率一定唔可以高，水楊酸0.5%-1%、果酸5%-6%算係最溫和的酸。
其次，發緊敏感或者其它皮膚問題唔可以用。
再者，一定要用水楊酸。因為水楊酸有消炎的效果。
另外，次數一定要少。平常人可能6日用1次，你12日至18日先用1次。
(可能你會話咁樣有用咩，我答你一定有)

酸其實已經係護膚品的極限黎，通常酸解決唔到的問題，你都係乖乖地去睇皮膚科。

暗瘡大解構，談說護膚品可達至的極限

青春期的人，中年期的人，通通都有可能有暗瘡。分別只係機會的大小。

通常暗瘡一出，周圍的人都會叫你洗乾淨塊面，另外再叫你用下護膚品。

但通常無啦啦開始爆發暗瘡的人好多連護膚品都未接觸過，結果就去萬寧、屈臣氏比唔同的sales 推介好多唔同的產品，包括暗瘡膏、一大堆面霜。最後通常就走上不歸路，爆得更加多。


而我的建議係，如果唔太熟成分，唔太知護膚品的成效，都係乖乖地睇西醫。係有少少傷身，不過成功的機率都高的。

而今日呢篇文係希望話比無論識定唔識護膚品的人，護膚品最多可以幫助到你乜野，而佢的極限亦係乜野。

暗瘡皮膚選擇護膚品係有原則的。

1)  質地必須薄身
對於暗瘡皮膚黎講，用唔爽身的產品係好容易令你皮膚好似有層野咁。
一件產品的質地係唔會無端端的變成笠或者爽的。
先講爽身，爽身其實本應係一件水劑產品最應該達至的狀態，需要留意的係有冇落酒精令到產品的質感改變。如果係岩岩開始學買產品的，可以留意下有冇以下成分 (通常產品係會有一個Ingredient List可以比你參考 =>包裝上/產品外面張貼紙上面)。
1)  Ethanol or ethyl alcohol,
2)  Denatured alcohol
3)  Methanol
4)  Isopropyl alcohol
5)  SD alcohol
6)  Alcohol
而一個本身就係爽身的產品變笠身只有兩個方法，第一係改變用的乳化劑 ，第二係加返少少唔同的原料令到產品質地改變。
先講第一項。
水同油本身係無可能長期完美混合一齊，呢個時候就要借助物質將兩者混合，形成油包住水(W/O)或者水包住油(O/W)的。
市面上的靚的乳化劑係由世界幾間龍頭廠的廠商做出黎的。乳化劑通過混合唔同種類的會得出唔同的質感。
不過放心，唔多廠商會咁做，因為成本好貴、研發的時間亦唔短。
就算會咁做，大部分都會手痕去加返D原料令質地改變。而大部分呢類原料係對皮膚無利處，只會係皮膚表面上面形成一層野。唔洗去睇成分，但係要試，一定要唔笠身。
(點試 : 用上手，之後慢慢按摩到吸收，之後行返10分鐘先，10分鐘後的感覺大概係你平時用的感覺 =>不過通常係冷氣地方都會乾爽D，請自行加返少少笠的感覺係腦海中幻想返實際情況)

2)  減少油分，增加水分
呢樣野係指用買的產品唔好係Lotion / Cream狀
比較多少少純Gel妝什至係一滴滴水形態的產品

Lotion/Cream

Gel

好啦，知道基本的原則就要理解下暗瘡形成的原因。

正常人的皮膚係左一圖示。

但因為唔同的原因 (荷爾蒙、天氣等等)令到有一日你的①「油脂分泌增多」。

本身油脂不斷分泌都無事，但同時你的②「角質又塞住d油脂」

毛孔內的油脂分泌左但出唔到黎，就會形成你地講的白頭粉刺，當③「發炎的時候，就會開始爆發暗瘡」。

而令你發炎個隻菌，我地叫做P . Acne (Propionibacterium acnes)。呢隻菌係生活係油脂到。

所以解決暗瘡就要從呢三部分解決。

包括①減少油脂分泌，令②油脂唔好比角質塞住同埋③殺死令你發炎隻菌

一般黎講，係無產品同時做晒三個步驟。

就算有，因為成本問題都唔會落幾隻成分去對付同一個問題。

而現實黎講市面的護膚品最難做到係①減少油脂分泌。

而如果你有暗瘡問題，依舊得過且過，等運到睇幾時買到岩的產品而唔係由成分入手。咁我就真係祝你好運。

市面上你唔洗經醫生買最有效最快手的成分一定係Benzoyl Peroxide

由於P . Acne係極度怕氧氣的，所以只要長期令佢係空氣當中，一般的暗瘡問題都會自然退卻。而Benzoyl Peroxide作用就係入到毛孔，放出大量氧氣令P . Acne死晒。

OXY係香港開架產品含Benzoyl Peroxide的表表者

講到呢隻Benzoyl Peroxide好似好勁咁，但事實上佢會令你皮膚發紅、脫皮、極度乾燥。一般黎講係要用大量的輔助產品去抵抗副作用。

所以一般黎講，我地係唔會建議未試過其它產品的人去直接試Benzoyl Peroxide。

咁唔用Benzoyl Peroxide，用乜野呢。

基本上要解決暗瘡，普通護膚品層面上必須要三個問題都解決。

①減少油脂分泌

一定要認得以下幾隻成分

Niacinamide (維他命B3) : 控油成分
Zinc PCA : 控油成分
呢2隻係市面上最常見而且係極度溫和仲要係有效的控油成分
FYR : http://4goskincare.blogspot.hk/2016/07/blog-post_9.html

②油脂唔好比角質塞住
係呢到大家先要理解角質的重要性。
角質層係保護我地的重要工具，有好多刺激物都會被角質層擋住。
換言之，無左角質層，就好似你屋企開左個大門，由得人出出入入。
所以唔好諗住、千萬不要因為暗瘡而瘋狂去角質。
如果你真係因為暗瘡而瘋狂去角質，係會變成極度難對付問題，變左皮膚受傷+暗瘡發炎問題。到時可能幾年都未必搞到好。

咁要點算呢，聽到去角質，可能成日聽到話要做美容院個D果酸換膚。
我個人係唔建議係無專業醫生情況下做咁高比率的果酸。
就算唔去做美容院，你都可能想自己買果酸返黎用。例如萬寧好出名個隻N字頭的果酸。
不過我都係唔建議用果酸。

我個人建議用Beta Hydroxy Acid (BHA) 水楊酸。
而水楊酸的比率一定要控制係2%或以下，同時大過0.5% (通常會標明)。
使用次數必須要控制。2%用量一開頭最多3-4日一次。呢個係我嚴重警告。
就算之後，最好都唔好超過兩日一次。
如果0.5%的話，可以直接使2日1次或者1日1次
FYR : http://4goskincare.blogspot.hk/2016/07/skin-perfecting-2-bha-liquid-exfoliant.html
同時水楊酸都有抗發炎，殺死P . Acne的功效。同時可以解決問題三。

③殺死令你發炎隻菌
呢到實在有太多好的成分可以做到，包括抗生素個類。
護膚品可以做到的包括壬二酸(Azelaic Acid)、不同的植物萃取 (太多啦，你隨意搵下都有可能係)。呢方面反而唔需要咁擔心。

其實上面d成分好多都係多功能，所以基本上你搵齊晒所有成分係同一個產品入面。呢個就會係護膚品最大可達至的功能。
如果用完無乜變化，請睇醫生。

對於天然產品愛好者黎講，可以有以下選擇
純露 : 真正薰衣草、德國洋甘菊、茶樹 等
植物油 : 沙棘果油、君子樹油、琉璃苣油 等
精油 : 百里香、檸檬茶樹、薰衣草、綠花百千層 等
(註 : 使用精油請諮詢專業芳療師)

有人會問，「吓，用油，咪會爆更加多的瘡」
事實上有機野生冷壓天然治療級的油係有大量的物質令到你皮膚消炎殺菌同促進皮膚更新。
同埋植物油抗氧化係非常之強，而抗氧化係對抗暗瘡其中一個非常重要的要素。

對比起化妝品業的油脂(礦物油、合成脂)，佢地同樣係油，但化妝品業的油脂係無營養價值，但我頭先的油係有營養價值。
而油分係護膚程序入面不可或缺的一部分，用於減少經皮水分流失。
經皮水分流失係令你皮膚容易變乾的原因之一，皮膚變乾又會令到你暗瘡問題惡化。
所以你需要搵一個控制配方油分比率比較好的產品。

聽完好多，你可能問，產品推介呢。
與其比我呃多兩錢重，不如學下成分，令到你自己識得去搵唔同的抗痘產品。

當然你可以試下用下美國有d產品係專做出黎抗暗瘡系列。
例如 Proactiv//The Exposed Skincare//MURAD//MAX CLARITY
我只係提供返呢類專做暗瘡護理的skincare品牌 唔代表真係有限(我無試過)同埋唔刺激(內有Benzoyl Peroxide)
你可以自己考慮下

同時有少少措施係必須做的
1)  防曬 + 抗氧化
對於暗瘡皮膚黎講，發炎係必然的過程。而紫外光就係發炎的其中一個來源。所以呢兩項必須要做

2)  清潔
清潔係唔會令到你暗瘡問題變好，只會令你的暗瘡唔變差。
仲要係良好的清潔產品先會唔變差。如果係刺激性高的產品，係好容易令到你發炎。
發炎 => 暗瘡 => 無限Loop
FYR : http://4goskincare.blogspot.hk/2016/06/paulas-choice-earth-sourced-perfectly.html

3)  抗發炎
防曬同抗氧化係防止發炎問題產生。但現實係無可能完全防晒所有紫外光同污染產生的發炎問題。同時你暗瘡皮膚都係發緊炎的情況，良好的抗發炎產品亦係必須的。

最好，如果發現無好轉，請不要諱疾忌醫。

總結 :
(1)  防曬、抗氧化、良好清潔、抗發炎產品係必須的，但只會令你情況不會惡化
(2)  控油、加快角質代謝、殺P.Acne 係永遠的三步曲，搵齊一隻產品做晒三步
(3)  爽身、低油分的產品係必要條件
(4)  幾個星期都無改變，即係護膚品係幫唔到你，請睇醫生
       (前提係你用齊晒唔同成分的護膚品)

https://www.facebook.com/4GO-219338838432480/?ref=aymt_homepage_panel

夏日控油篇 — 減慢出油時間

香港係一個又濕又熱的地方，油脂一分泌出黎就好辛苦，好似有一堆野笠住返面。

所以有好多人都想搵控油產品。

不過要先面對一個現實，油脂分泌係基於皮脂腹，係天生的。

所有護膚品的控油手法都只係 「暫時性」 ，而且成效不高，頂盡都係幫你拖長出油時間一倍。

先講返少少常識，一，補濕好唔等於唔出油。因為補濕同出油無直接關係。
(fyr : http://4goskincare.blogspot.hk/2016/06/blog-post_13.html)

二，護膚品良好的控油的手法得四種。
1)  減低油分形成機率
2)  短暫收縮毛孔
3)  吸油
4)  整乾皮膚 (乾爽感覺)


1)  減低油分形成機率
油分形成的原因同「5-alpha reductase」的關係好大。
人會出油的原因係基於二氫睪固酮(DHT)，因為呢隻成分會刺激出油。而佢形成的主因就係因為有5-α還原酶(5-alpha reductase)。再推前一步，5-alpha reductase係需要有睪酮(Testosterone)一齊做野先會形成DHT。
一般黎講，護膚品可以做的就係控制5-alpha reductase的活性。

2)  短暫收縮毛孔
毛孔其實就係油脂分泌的出口，短暫咁收縮毛孔可以短暫咁減少油脂分泌。

3)  吸油
主要體驗係化妝品上，不過護膚品都有呢類成分。係利用一類可以吸收的粉狀溶入產品。當皮膚出油的時候，就可以吸左佢。

4)  整乾皮膚
主要體驗係低PH值的產品同埋少少成分可以收乾你皮膚水分。

大致上可以分為呢4類，你當然可以搵到其它方法，但主體都係呢4種。
問題黎啦，講到好似好勁咁，但其實都係好短暫的效果，但有總好過無。
以下簡介少少有助的成分。

控制5-alpha reductase的活性
1)  綠茶萃取物中的Epigallocatechin Gallate (EGCG) : 聲稱減少油分分泌三成至五成
2)  維他命B3 : 護膚品界的平價但高效成分
3) Zinc PCA : 有即時效果，但效果唔好預有咩咁出眾


短暫收縮毛孔
1)  酒精 (不建議使用)
2)  橙花純露
3)  金鏤梅純露
4)  薄荷純露 (非薄荷腦或薄荷香精)
4)  *榛果油

吸油
1)  蜜粉
2)  高嶺土
3)  **吸油紙

整乾皮膚
1)  硫磺 (不建議使用)
2)  左旋維他命C
3)  BHA (不要為了控油而用BHA整乾皮膚，會令容易皮膚變得敏感[去角質過多])

上面都係簡介下有咩成分可以控油，當然仲有好多。
相信大家都會有問題關於

A)  *榛果油可以控油? 用油控油
的確可以，因為榛果油有輕微的收歛作用。當然效果唔會太大，但絕對好過用垃圾油脂。

B)  **吸油紙唔係會用得多，人分泌油的能力會更加勁咩?
正確講法應該係 :
人分泌油的能力取決於天氣、荷爾蒙、天生的皮脂腺多少。
一張係皮膚表面做野的紙可以改變到你的荷爾蒙同埋係皮膚下的皮脂腺，你都咪話唔犀利。
吸油紙只係將你皮膚表面的油脂吸走，短暫可以令到表面已經出左黎的油脂減少。
但由於外在環境(溫度、天氣)同內在因素(荷爾蒙、天生的皮脂腺)無任何改變，皮膚會出返係上述因素影響下的油分，即係大約你頭先未吸油之前的感覺。
所以吸油紙係治標，不過佢係良好的治標。
咁吸油紙會唔會改變你荷爾蒙、天生的皮脂腺等等? 唔洗我答掛。
咁吸油紙係唔係好似開神壇咁令到風雲變色，雷電交加等等? 咁就要睇下你的信仰啦。

講咁耐，有冇產品推介下。
我只可以話，香港大部分的護膚品都只係用酒精去做成清涼感覺。好少少就用吸油的粉放係乳液或者面霜到。
至於用下控油成分? 基本上比多兩隻你都偷笑。

當然，我自己就推介用純露，因為方便、易用、無害。

產品點評 : Skin Perfecting 2% BHA Liquid Exfoliant 「同一價錢，無人可敵」 暗瘡、黑頭、粉刺 再見

成分表 :


Water, Methylpropanediol , Butylene Glycol, Salicylic Acid , Polysorbate 20 , Camellia Oleifera Leaf Extract , Sodium Hydroxide , Tetrasodium EDTA

Source :
http://www.paulaschoice.com/shop/skin-care-categories/aha-and-bha-exfoliants/_/Skin-Perfecting-Two-Percent-BHA-Liquid-Exfoliant/?=






去角質產品分物理性去角質同化學性去角質。
物理性去角質以磨沙、捽擦子膠為主，但大多對皮膚的傷害性什高。
主因在於磨沙粒子並非圓滑，而捽擦子膠的方法會大量磨皮膚，容易做成面部紋的問題。

而化學性防曬主要以AHA、BHA為主 (亦有杏仁酸等其它酸類，但對於此類酸並非有大量的研究作支持)

今日介紹BHA，BHA的特別之處係佢可以進入毛孔清理油脂。而AHA係唔可以。
換言之，BHA係主理油性皮膚為主的問題 (因油脂分泌過多而產生的問題 : 暗瘡、暗粒、黑頭、粉刺)。
咁係唔係乾性唔用得? 非也，乾性皮膚都可以有呢類問題，你都可以照用。

而現實的係，市面上都好多BHA產品，或者酸性去角質產品。點解呢隻可以係$300內有120ml的容量的產品拎冠軍。

一)  成分簡單
成支產品冇落酒精助溶。好多酸性產品驚死酒精過期，將佢地廠入面的酒精加到十幾個巴仙。呢樣係完全唔需要。而呢支產品亦落返相應的抗敏成分，防止引起敏感。
你數得出成支產品連十隻成分都冇，相信係現家呢個世道都好難搵酸性產品咁少成分。

二)  良好使用助滲劑，增強效率但減低敏感機會
2%的BHA係好低的比率，但如果加左助滲劑就可以將功效提高，但因BHA而敏感機會不變。
所謂助滲劑係指通過唔同的手法，將成分更容易進入到佢的工作地帶 (更深入的皮膚層)。
點解要用，第一就當然係成本。加助滲劑，就可以將1%成分發揮到2%的功效(純粹例子，數字係假設)，落少D成分都可以達到廠商要的功效。
第二就係成效。將同一隻成分加入更多，就會更容易敏感。如果要減少敏感機會但又要達到功效，就落一個可控制範圍的原料加助滲劑，達到效果。


不過用酸類產品一定要搵到自己岩的次數
一星期七次?一星期十四次?一星期兩次?
你要自己搵到你自己用到酸類產品，同時唔會引起敏感反應。
無計要自己試，唯一可以講就係「 由少用到多」

亦有好多人會用用下爆瘡。
一般黎講，用酸類產品前一定要補好濕。
補完濕，但都出瘡，有兩個情況。
一係敏感，請減少次數。
二係過渡期，有大部分人用完都會爆左少少瘡。
當然安全起見，爆瘡就先減少使用次數先，另外開始用個排用定抗敏產品。

註 :
(1)  酸性BHA產品不能與Vitamin B3 一同使用
(2)  用任何去角質產品後，必定要使用SPF 30 PA++ 以上系數的防曬

https://www.facebook.com/4GO-219338838432480/?ref=aymt_homepage_panel

護膚技巧 : 談「吸收」(上)

護膚品最緊要係「吸收養份」，唔吸收就無用。
但係吸收一道學問高深，我都係略懂皮毛，我只係講返我知道的比你地。

皮膚表面有層角質層，控制住有咩成分可以吸到、有咩唔得。
一般而言，係皮膚無大傷口的情況下，成分的分子大小大過500的話基本上都吸收無望，
所以唔需要理會大過分子量500的成分，佢地唔會點吸收到，佢自己會係皮膚表面做野 (包括常見的透明質酸、大分子增稠劑、膠原蛋白)。

所以你要針對吸收的就只會係細過500的分子，護膚品最貴的成分就係呢堆 (當然大分子都有佢的作用)，包括維他命，小胜肽，美白成分，酸性產品等等。

先了解有咩常見錯誤理念。

1)  一塗抹上去幾秒就無左感覺，好似吸收晒咁
錯誤。
護膚成分無可能幾秒「吸收」晒，係需要時間。如果幾秒就可以吸收晒，所有廠商都會開發有護膚成分的洗面產品，因為洗面產品有成分鐘，照計應該吸收左一百幾十萬次。
所以，個一種吸收晒的感覺只係護膚品入面多餘的成分蒸發，或者係用左D質感改變成分，做成揮發感覺。

2)  拍打爽膚水更有效吸收
「正確」，但唔應該咁做。
拍打爽膚水的用途就好似你一巴一巴車埋去塊面到，打到塊面紅晒熱晒，刺激皮膚吸收。
其實只需要用手按壓住，等皮膚有種熱熱地的感覺已經可以。唔洗一巴巴車埋自己塊面的。

都市傳說 : 點解SASA、卓悅個一到買的產品好似無咁有效 ?

經常睇到有人講，係莎莎卓悅買個類護膚品、香水總係效果差少少。

其實原因好簡單，就係貨源問題同埋時間問題。

貨源問題大家都清楚，就係仍地的貨源未必係廠商專門為香港製造的。
好多國際大牌子都會將產品入面的成分改一改以調節到岩個一個國家的國民岩用。
例如，近赤道的國家溫度都會比較熱，相對油脂分泌會高左。佢地對於控制油脂分泌的產品會更有需求。如果貨源唔係專登比香港顧客，入面成分的用途就未必咁岩。形成比較無效。


第二個問題先係重點，係時間問題。
有去過呢類公司買野都知，佢地總有D貨係就過期、好似封晒麈咁。
其實未過期就唔會有乜負面影響，但99%唔會得出正面影響。
因為成分的活性會隨住時間而消失。
特別係維他命、抗氧化物同埋部分美白成分 (都夠啦，你地都係買呢堆喳)。
時間流逝，佢地活性都會消失。由呢類成分一放落水入面，就會開始計時，一般黎講半年至一年已經消失得七七八八 (室溫下，高溫更快)。但大部分護膚品保質期都係三年，咁你諗下你係買緊護膚品，定係買緊蒸餾水、乳化劑加合成脂用。一般黎講，專櫃的產品的貨源都會比較新。

最後一句，除非係無水無油產品，如果唔係盡量少買以下包裝的產品。

呢類罐裝產品，係最容易令產品變質加上令活性成分流失。

特別係你地買左一大堆產品開左少少又放左係到用唔晒。

再拎返出黎就由護膚品變蒸餾水、乳化劑加合成脂。

四季防曬攻防戰 — 防曬粉，一次解清

夏天用物理防曬，只會得出好辛苦的諗法。
笠、油、爆瘡。

所以有人想用防曬粉。
係之前我都講過，我係唔建議用防曬粉

防曬粉當防曬?

防曬粉的好處係清爽，但問題係防曬粉的用量太低，好難用到產品所標示的用量。

但女士用於補妝所用係可以。

FYR : http://4goskincare.blogspot.hk/2016/06/blog-post.html

不如就講下點解。

• 防曬的標準用量係2mg/cm2 
• 即係一塊面連頸大約一次要用0.8g-1.3g左右

講到呢到，你根本無可能一次用到0.8g-1.3g

1g的粉上面應該會好厚粉

什至你平時都唔會用到 (包括我) ，所以點解抗氧化個類產品咁重要。

另外仲有一個問題，係健康問題。

粉類產品有一個問題，就係佢用的時候d粉會周街飄。

現時，納米技術咁流行，好多廠商都會將氧化鋅同二氧化鈦打到好細。

本身係普通lotion/cream的產品，物理防曬粉就唔會周街飛，你唔會吸收肺到。

但用防曬粉周街飛，就存有機會吸收。

氧化鋅同二氧化鈦外用絕對無問題，但吸收就有機會引致呼吸道刺激，什至增加癌的機會。

當然，要吸收之後無被人體咳返出黎再係身體有一連串反應的機會絕對唔大，但小心d好。

記住外用無問題，真正問題在於周街飛的納米級防曬粉被人體吸入。

產品推介 — Paula's Choice Earth Sourced Perfectly Natural Cleansing Gel 抵用洗面gel

一支清潔產品最重要應該有四項重點

(1)  清潔能力、界面活性劑的刺激性
(2)  補濕/保濕元素
(3)  價錢
(4)  額外護膚成分

Source : http://www.paulaschoice.com/shop/skin-care-categories/cleansers/_/Earth-Sourced-Perfectly-Natural-Cleansing-Gel

同大家講返少少正確的知識
成日聽到「洗面奶係比洗面gel溫和」
其實就唔一定的 對於洗面奶同gel什至cream最大的分別只係油分的增減
落油分最少排到最多應該係 gel<奶<cream
而油分係洗面產品的作用只係比返你少少的保濕感
如果一隻產品的界面活性劑(洗走油的成分)係極刺激，你落油分比佢依舊都會刺激，只不過係係傷口上面用層油去cover
油分真正作用係比保濕感，咁可以用作區分邊一類人用邊一劑型的產品
一般而言，缺油的就用奶、多油就直接用gel

(1)  清潔能力、界面活性劑的刺激性 (Above Average)
你可能見到佢好似好多界面活性劑
但通常多唔代表刺激，可能、講緊可能只係佢每樣落好少
Decyl Glucoside
Sodium Cocoamphoacetate
Lauryl Glucoside
Coco-Glucoside
Sodium Cocoyl Glutamate
佢大約落左幾種界面活性劑，
重點係佢大部分都係椰子萃取而成。
講過，天然而成的界面活性劑都係化學物質、化學野。
不過一般都比較溫和。佢的清潔力都好足夠。

(2)  補濕或保濕成分 (Average)
都係落返甘油、蘆薈個一類做褕濕舒敏
佢無落油分，洗完會比較少油感
可以落返少少天然補濕因子

(3)  價錢
USD $17 = 6.7oz
大約等同 HKD $140 = 200ml
算係幾抵用，不過同佢個洗面奶比
當然差少少
但同香港比 我諗無乜邊隻做到咁平咁溫和同埋有用

(4)  額外護膚成分
無，所以價格可以壓縮到平少少

所以我十分之推介呢隻比多油肌用
(出暗瘡不等同多油肌)

產品「推介」 — Paula's Choice Skin Balancing Oil-Reducing Cleanser 抵用洗面奶 $200/480ml

一支清潔產品最重要應該有四項重點

(1)  清潔能力、界面活性劑的刺激性
(2)  補濕/保濕元素
(3)  價錢
(4)  額外護膚成分

Source : http://www.paulaschoice.com/shop/skin-care-categories/cleansers/_/Skin-Balancing-Oil-Reducing-Cleanser

(1)  清潔能力、界面活性劑的刺激性(Above Average)

Sodium Cocoyl Isethionate
通過一連串化學途徑由椰子油形成的界面活性劑
要記住，儘管由椰子油而黎，但唔代表佢係天然
任何市面上的清潔產品都同天然扯唔上關係，包括Handmade Soap
因為任何你地用緊的清潔產品都會經過化學程序而黎
呢一隻的界面活性劑的清潔力不俗，而且比較溫和

Sodium Lauroamphoacetate
溫和洗面奶常見的界面活性劑

-->  總結 : 溫和，有一定清潔力

(2)  補濕/保濕元素  (Average)
呢一支有甘油、有葵花籽油，提供一定的保濕/補濕能力。
另外亦有加入蘆薈水做抗敏補濕。
當然，如果佢可以加入Vitamin B5 或者 天然補濕因子更好

(3)  價錢 (Excellent)
USD $25 / 16oz 大支裝 (~HKD $ 200 / 480ml)
USD $17 / 8oz 細支裝 (~HKD $130 / 240ml)

我諗香港無一支洗面產品可以做到咁大支
同時亦無任何有害物質
你係萬寧屈臣氏都絕對搵唔到

(4)  額外護膚成分
無加入，係一件好事。
因為有加入代表價格會高好多。
問題係一分鐘的洗面係無乜可能吸收到多的護膚成分
當然，你有經濟能力的，你鐘意買一支成千銀但得個六十毫升的洗面都可以
我就唔會咁選擇

總結 :
平、靚、正

四季防曬攻防戰 — 點評數項物理防曬 (一) Resist Super-Light Wrinkle Defense SPF 30 From Paula's Choice

點評要有準則，防曬的準則大可以分為三項至四項
(一)  有效防曬成分
(二)  抗氧化劑的使用
(三)  用家感受
(四)  包裝設計 (呢一項係指保存抗氧化物的技術，唔係指靚唔靚)


Resist Super-Light Wrinkle Defense SPF 30 From Paula's Choice US$32/2oz (~HKD$250/60ml)

Source : http://www.paulaschoice.com/shop/skin-care-categories/sun-protection/_/Resist-Super-Light-Daily-Wrinkle-Defense-SPF-30

(一)  有效防曬成分 (Above Average)
呢一支產品用左13% Zinc Oxide 做物理防曬，絕對算係比較高的比例。如果你睇返部分都聲稱自己有SPF30的防曬，落去物理防曬成分可能只係得4-5%。(例如COOLA)
事實上，我自己認為如果Zinc Oxide為主軸的防曬，10-15%絕對係可接受。

(二)  抗氧化劑的使用 (Excellent)
Paula's Choice呢一隻牌子係抗氧化方面絕對做得非常之好。
Resveratrol 
認住呢隻成分，絕對係居家必備良物。
Resveratrol 呢一隻成分係一隻不錯的抗氧化成分
同時都係一隻非常好的美白成分。
而且用量只需要1%就可以達到佢的效果
Quercetin 
抗氧化物。減低自由基形成。
佢的重點係減低炎症活躍程度(特別係被UV照射過後)
Epigallocatechin Gallate(EGCG)
通常存在於綠茶萃取中，但綠茶有幾多EGCG就未必知道。
佢亦都係一隻非常好的抗氧化劑
防止因UV而做成的細胞死亡、DNA損傷、發紅。
即係有抗UVA同UVB的功能
Tetrahexyldecyl Ascorbate 
維他命C的衍生物，對PH的要求不高，可與Vitmain b3一齊用
又係抗UV的好手
不過係呢到落得唔多，好難發揮有淡斑效果
Haematococcus Pluvialis Extract
內有蝦紅素。蝦紅素非常良好抗UVA功能。
Punica Granatum (Pomegranate) Extract
內在大約40% Ellagic acid
仍當然有抗氧化功能，但重點係佢有協同效應，將所以材料的功能再提升

(三)  用家感受
呢一間公司當然係用左好多唔同的化學物質去令你感受到「良好質感」
包括不同的合成脂、矽靈。呢一類野當然少用為妙。
但係防曬係呢一方面做得唔好的確好難用落手，所以我認為對於防曬，重點係事後清潔功夫。定期做下深層清潔，另外要用卸妝產品去卸走，唔好單用清潔用品。
以我判斷，佢應該唔會比你極度厚重的感覺，但一定有，因為佢係物理防曬。物理防曬係一定會令到個一支防曬變笠。
另外，佢顏色唔係白色，因為防止有變得更加白的情況。

(四)  包裝
可以接受，因為無用太大的開口令成分 (特別係抗氧化成分) 氧化。


好處總結
(1)  足夠防曬，用Zinc Oxide
(2)  強力抗氧化
(3)  價錢合理
(4)  質感合理

壞處總結
(1)  大量合成脂、溶劑、乳化劑、矽靈。比較容易爆瘡的皮膚需要注意用量。
(2)  購買困難 (不過美國個邊成日做discount)

* 我覺得可以試下

探討 — 三個級別的行動保持皮膚原貌 (本人的護膚框架)

愛美之心，人皆有之。唔同人買護膚品係為左唔同的目的，包括睇到廣告想買、見到包裝想買、睇到打手推介想買，好老實，唔多人係知自己要咩，唔知自己應該要咩。多數人都係個種心態見廣告的標示言係乜就信。儘管香港有商品說明條例，但可以走的位太多，廣告不可盡信。

護膚品的成效永遠只係得三樣野睇到
「成分、配方、包裝」

以下講的野係人人都岩睇，人人都岩用，而且係人人都知的野，我只係將成個脈絡打一次。
我形容為三個級別 (單講外在條件，內在條件我無相關的生物知識)

第一級別，就係你地都用緊的用護膚品，但呢個級別係人人都應該要做 — 抗光傷害。
不談不可改變的因素(年紀、基因等)及內在因素(飲食、運動、嗜好)，皮膚的主要傷害都係紫外線。紫外線會穿透皮膚的角質層，直入你的真皮層，傷害你的細胞等等，引發自由基的傷害。所以護膚第一步，亦係人人都要做，就係防止光傷害的形響擴大。
你可以做的當然係用防曬，咁呢樣係人都知。
另一點抗光傷害就係抗氧化，呢一到的抗氧化當然係指抗因自由基而形成的破壞。
配方上黎講，係唔計算廠商成本呢，基本上要加幾種抗氧化劑
我地大體可以分為
抗UVA、抗UVB、抗糖化、抗羰基化、防止膠原蛋白及彈力蛋白改變 等等

簡單黎講，你護膚品最基礎的原料應該係圍繞住呢幾項而走，你做唔到呢幾項，基本上你用幾多「胜肽」、「DNA修護因子」(題外話 : DNA可以外用修服，世界就唔會有咁多基因病)、「Pitera」都係多舊魚。
你唔用呢一堆抗氧化的確係呢一刻唔會有咩問題，但光傷害係累積，十年後就見真功夫。
順帶一題，我幾肯定香港可以直接去專櫃或者開架品牌無一隻可以做到上面所講的抗氧化，大多都係落幾隻就算數。大家好自為之。(有興趣可以自行搵下Paula's Choice的產品，佢地基本上做齊晒)
但大家又唔洗驚的，有都好過無，以我所見，你係萬寧所買的「肌研」、「Bioderma」個類就一定無。一般牌子都會落少少植物萃取。通常個隻植物要對住強光的通通常常都會有抗氧化。

第二級別係改變。
呢一個級別一般的護膚品點都可以做到，你有暗瘡問題，咪買支暗瘡精華 ; 你有脫皮問題，咪買支補濕產品。現實黎講，你只要唔係年少無知，最終都可以搵到一支岩你的。點樣加快個進度就係睇有效成分，例如你知道vitamin b5可以補濕，你就買支有b5的補濕。
另一樣要做就係了解你皮膚係呢10年、20年會有咩變化而搵定一隻產品去幫你唔好咁快變(即延遲皮膚變老)，除左上述所講的防曬抗氧化，就係搵d功能成分。
即係你地成日聽的Pitera，80歲阿婆隻手同20歲一樣個類品牌商業故仔的成分。
你地要面對因老化皮膚而形成的問題，包括鎖水能力差左，皮膚無咁緊緻等等。只要搵返相應的成分就可以令情況得以舒緩。
提供幾個成分可以舒緩必定會出現問題，就係維他命A、B3、C加多一支AHA。
基本上你用一個好配方產品加埋有足夠或者高濃度，上面四隻成分一定幫到你

第三級別係醫學美容。
無任何護膚品可以做到醫學美容的效果。
去到最後一步，有錢咪做下。(本人唔熟醫學美容，咪問我)
你肯付出金錢，大多都可以Keep到皮膚。

上面係我個護膚基礎理論框架，我自己整的買的產品都係根據上面的理論去整。信不信由你。

係我角度你地有乜野行為係唔太好呢

1)  走去買埋個堆活性成分低到阿媽都唔認得的產品

成日都聽到，敏感皮膚唔岩用活性成分太高的產品。事實上係一錯完全錯誤的概念，

活性成分不等於刺激

一支純水劑的產品，活性成分用到99.7%都係一件可以的事。而且皮膚係唔會敏感。
99.7%當然係取巧，將植物精華水當然Aqua用就可以做到，唔太難。
唔講咁極端的例子，不如睇下你手上支產品係唔係得補濕，是但落幾隻有效成分就算。
通常呢類產品的成分大多位置都係分左比堆化學成分(我指緊無用純粹呃你質感吸收的)，呢堆成分對皮膚完全無效，有部分會入毛孔(合成脂)、有部分會刺激皮膚(香料、差乳化系統)、有部分皮膚代謝唔到(廠商用黎代替酒精的溶劑個類)。呢堆先係真正令你皮膚不斷變差的成分。
而因為呢堆野係純粹呃質感，完全無用，但又極影響你下一次買唔買，個個走晒去軍備競賽，真正為消費者的成分五隻手指數得晒。特別係個罐成千銀但得礦物油個一隻La Mer。唔好同我講話你點樣點樣，你未試過好植物油、好精油抗敏能力，係同礦物油唔同級數。
呢個亦係我點解反對用礦物油，唔係因為佢致癌(有一分報告指礦物油會致癌，但完全唔係化妝品級級數的礦物油)，佢會令人爆瘡，而係佢有一隻更加好的替代品，而且仲要好平。

2)   皮膚用太多護膚品唔好
呢一野我絕對同意，但我覺得我的立場同你地唔同。
你地好多時問我呢幾樣產品應該點用，幾時用，有咩要加。通常加完比你，你地都會問一句，「會唔會太多」(利申 : 無任何負面情緒係呢到，純粹想解釋返比你地聽)
你地的多係建基於「支」數，即係用產品的量。
而我的立場係建基於「化學成分」的量，即係頭先所講軍備競賽的成分。
個一堆化學成分先係真正影響皮膚，因為大部分都唔能夠入落角質，你一層一層咁樣放係皮膚表面，咁多化學野係面上，當然唔好用咁多。
所以我建議你地真係要試下無額外添加化學成分的Toner或者Serum，我相信你對護膚會有另一番體驗。(當然啦，有部分打住天然、有機、芳療的護膚品牌子，但支支精華都落三仙膠個類增稠劑，何必呢)
我的另一個立場係，護膚品的原料濃度。大致黎講，濃度高的話，刺激性都比較高，你用太多單一成分又濃度高的話，會出現刺激情況好正常。但係好老實講，成分唔洗錢架?廠商一定唔會落咁多比你。

不如黎下你手上的護膚品，有幾多真係會做到頭先講的第一步抗氧化?
推介三個係抗氧化做到非常好的品牌

1)  Drunk Elephant
呢隻牌子我自己評價十分高，佢價錢亦十分高。
可以批評的地方當然有，就係佢乳化系統用的係一隻比較高刺激性的，另外有比較多矽靈、合成脂。
2)  Paula's Choice
呢隻牌子，我會形容為，佢某幾隻產品的Price Range，絕對搵唔到另一支比佢更加好的產品。
包括 AHA、BHA、防曬、少量精華
但就好鐘意落矽靈、合成脂，我不太喜歡。
3)  幸福肌
台灣一個配方師的品牌，有理念，有實踐。價格中高。
但我相信絕對對得住佢的價錢。
較有問題的地方係，佢購買途徑好難。

當然仲有一隻品牌叫SkinCeuticals，佢的品牌走高端科研路線，佢好多配方都走在最前線。
但我絕對唔建議大家用，一來佢貴到痴線，但市面太多替代品。二來，亦係最重要的原因，佢係Lancome母公司L'Oreal旗下的一間公司，做人要有骨氣!

之後幾篇都係圍住今日第一級別同第二級別講，因為太重要。

我係一個普通人，無學識，無專業，但對護膚品略有興趣。
http://www.facebook.com/4GO-219338838432480/?fref=nf

探討 : 補濕產品是必須品嗎 ?

聽街外人一講護膚品，一定會同你講，
「護膚梗係補好濕先，其它野再慢慢買啦」

第一，護膚第一步一定唔係補濕，一定係抗氧化加買防曬，光傷害先係令皮膚變差的成因。
(FYR :http://4goskincare.blogspot.hk/2016/06/blog-post.html)

第二，就要開始探討補濕產品。
先落定義，下面所講的係專門買一支補濕產品，即補濕爽膚水、補濕精華、補濕面霜

百分之九十九的護膚產品都會落補濕成分。換言之，你即使唔買一支補濕產品，你都會係其他唔同系列的護膚品得到補濕。最基本就有普通的水、甘油。
所以，你如果覺得足夠的濕，足夠的多水，已經就足夠啦，唔洗專登買一支補濕產品。

但如果你用完一般產品都唔夠，當然你係需要補水。點補多點水，買支補濕產品。
不過好多人都有一個誤區就係「補水補水但完全無諗過補油」。

神奇畫家示意圖

(肉色以上係外面，肉色以下係皮膚內 ; 黃色係油 ; 藍色係水)

單純補水只係令到你皮膚係短期內水份充足，但水分係會揮發，無油作為「封閉」皮膚表面水分的話只會令到水分揮發得快，補完水等同無補。

所以買晒補濕產品但皮膚仲係好乾的話，先試試補油。

所以得出結論，無需要唔洗買補濕產品，有需要先買。

其實上面都係講緊廢話，下面先係重點。

就算唔買補濕產品，你都要補濕。

1)  補濕係一種你地比較容易按觸的方法令到皮膚更易吸收護膚品的成分

2)  話時話補濕，但其實好多成分都係「多功能」，一樣需要

例如 : 

Vitamin B5 : 除左係吸濕劑，仲可以加速傷口癒合，維持角質層的健康。

天然保濕因子(NMF , Sodium PCA) : 除左係吸濕劑，仲係皮膚的組成元素之一

所以即使你唔用補濕產品，唔需要補濕產品，都需要用有補濕成分的產品。

問題係，應該用邊一種。

我地經常講的透明質酸，係一種好平好普通的大分子補濕。佢除左提供良好的吸濕鎖水，仲可以提供良好的使用感覺 (順滑感覺)。

但其實對於年輕皮膚係唔需要用到咁重本，用一般的中、小分子補濕就可以。

所以大分子 (係角質層外做事) 的補濕成分，等你需要補濕或者皮膚走向成熟的時候先用都未遲。

咁用左有無害，大體上無害，除非你用假貨。

基本護膚知識 — 補唔好濕就會出油 = 呃錢呃人

廠商同BA什至你地問我問題成日都有一句

「我補好濕點解仲係出油」

—  呢一種係無理論基礎的講法

邏輯上，呢一句有個暗示

「當皮膚缺水的時候會出梗加多的油，而皮膚夠水的時候就會無咁多油」

先用常識去解答

上述理論所指 :

皮膚有唔同的情況，我地分油性、中性、乾性。

根據上述理論，皮膚乾性的人就會有最多的油。

所以油的多少係根據水的多少而定

常識 : 

點解會有唔夠水分又唔夠油分。即係「沙漠肌」。

(按道理缺水係特別多油，唔會缺油)

點解有部分多油的皮膚，皮膚會缺水?

(按道理多油的皮膚應該會夠水)

所以上述講法完全應用唔到

事實上，係呢十幾二十年，關於皮膚出油量的研究做左好多。

係呢到同大家講明一個基本邏輯。

如果一件事唔係二元對立，當A(某項事情)被證實了，唔代表B(另一項事)係假。

例如，今日證明左某一項成份有某一項功效，唔代表另一項的成分大家所指的功效係假的。

或者同樣咁講，B呢一項事情係未確定(中性)，已證實正確或錯誤。

講左一堆廢話。有咩用

「皮膚出油關缺水事」同「皮膚出油唔關缺水事」係二元對立的。

所以我地要知有咩研究做過，去證明關唔關事

第一，報告指出，乾性皮膚的人同中性皮膚的人角質含水量不大。

如果係上面的理論，應該係中性皮膚的人比較多水過乾性皮膚。

第二，另一份報告同時指出，表皮的油對於皮脂腺，係一種信號去話比佢知，「要停止分泌啦」。即係話皮脂腺先係決定皮膚油量的因素。

咁有咩因素會影響油性

天生皮脂腺多少、溫度高低、荷爾蒙等等

對不起 大部分也不是你能控制

所以唔好再同我講一句，我皮膚好多油，但我有補好濕架BO。

Source :

Journal of Cosmetic Chemistry, September/October 1993, page 249

Archiv für dermatologische Forschung June 1974, Volume 251, Issue 2, pp 155-164