產品迷思 : 成份真的代表一切 ?

「某一份報告講呢一隻成分有某一個效果，是否代表

兩隻產品有同一隻成分時，兩隻產品帶黎的效果一樣?」

如果你有睇過我打的野，都知我好鐘意將成分掛在口邊。但事實上，一件護膚品的價值是否單純由成分而來。

首先，我地要了解一件產品的價值係點黎，大約可以由以上元素而成

生產成本 (包括原料、配方、人力資源) + 運作成本 + 廣告費

大家都知一間廠商，佢件護膚品原料就係好便的事。而佢大部分的成本都唔會係原料。
問題黎啦，我地成日見到有人會黎住份報告話

「啦，呢份報告講點點點，呢隻產品有呢隻成分，所以呢一隻產品可以達到乜乜乜功效。」

呢樣野無錯，但點解有時A產品有某一隻成分，B產品有另一隻成分，兩者功效唔同(假設兩者成分配方相同)。大概有三個原因。

1)  原料等級
唔同的原料，的確可以有唔同的效果。但同樣的原料，分別一定有關原料等級事。
主要係可以由產地、萃取方法、收成時期而得知。
先講產地，現時唔少的護膚高級成分，中國都係有生產，例如 : 藍銅胜肽。同美國或者韓國出產的，分別當然大，主要因為技術上的差別。
萃取方法，講化學成分，例如維他命。維他命都有分唔同的萃取，如果係大豆個類產品而成，通常活性會比較低。而天然少少的，例如蜜糖，都有分唔同的品種，例如普通的蜜糖，未過濾的蜜糖，麥蘆卡蜜糖都有唔同的養分係入面。就算係同一種品種的產品，都有等級之分。
咁代表乜，代表住你平價產品根本上唔會有太大空間利用高級原料。
例如乜樣品牌，韓國平價品牌，例如 : Innisfree。
咁係唔係代表貴婦品牌用的原料就一定高級一點。唔一定，只係代表佢可以有更大空間利用更好品質的成分。

2)  配方
當然，成分的搭配，ph的大小都會影響產品的成效，但我地假設左佢地的配方完全相同。
所以上述所指的配方，係指緊攪拌的速度，成分加入次序等等。呢一類我地接觸唔到，但係點樣可以到應用到係你買產品，又係一個好現實的答案，大品牌同西方國家的廠商會比較掌握到技術。



成篇文的重點唔係叫你去買大品牌，而係要同你講，你肯付出的成本好多時都同功效掛勾。如果你話想拎住$100之後想皮膚神奇同明星化完妝一樣，只可以話死心。但好老實，香港好多人都想咁做。

我覺得，學識睇成分，只可以話比你知
1)  呢樣產品致敏、致痘的可能性的高低
2)  產品大致功效
3)  產品原料成本(即係性價比問題)

都係個句，香港大部分連第一步都未做到。
敏感找上你，最終也只是必然的事。

我係一個普通人，無學識，無專業，但對護膚品略有興趣。
http://www.facebook.com/4GO-219338838432480/?fref=nf

產品迷思 : 點樣由廣告或者文宣字眼就知道件產品點組成 (一) ︰ 質感，美白成分

產品迷思 : 點樣由廣告或者文宣字眼就知道件產品點組成

首先你要了解現時護膚品最Hit係咩成分。

廠商鐘意用乜野去呃你。

例如新的Laneige 全新雪漾亮白精華原液升級版
第一步係將廢話刪除 

廣告原文 :
1.  質感清爽，紓緩敏感、泛紅，溫和親膚且顯著  亮白。天然 三白草 精華，抗氧祛黃，擊退暗啞，紓緩敏感泛紅。高濃度 綠茶蛋白 深層滲透肌底，持續將 水份注入黑色素細胞，為美白成分打開水盈管道，從根源抑制色素產生，倍效勻淨膚色。

2.  層層煥發水光肌 先注水，後亮白，抑制肌底黑色素形成，終極亮白基底層。

當無晒廢話就會變成
質感清爽，紓緩敏感、泛紅、亮白、抗氧祛黃
呢個係產品的描述，點樣達到描述，就要睇佢其它野啦

* 質感清爽，紓緩敏感、泛紅 (落返部分的抗敏成分，例如尿囊素、甘草酸鉀、蘆薈)，溫和親膚且顯著亮白。 美白精華為肌膚注入水份(加入補濕成分)，從根源抑制色素產生(美白分兩部分，一係個抑制，一個係打散。即係只做抑制，通常都係維他命C類、植物萃取)，成就幼嫩無暇肌膚。美白精華柔滑肌膚，快速吸收，倍效勻淨膚色(由呢四句見到可能落左酸類，以去角質達到美白--勻淨膚色)。

* 一瓶解決6大美白難題 減褪黑色素/改善膚色不均/增加肌膚通透感/增添水亮光澤/增加肌膚水潤度

首先有咩字眼係特別需要注意 :
例如強調質感 :
水溶性的水精華，廠商好少專登做到好笠身。除非佢主打成熟市場。但廠商好少(我又唔敢話無)單用甘油改變質感。廠商用黎改變質感的主要都係酒精、揮發性矽靈、順滑劑、抗靜電劑等等。呢類對你皮膚唔會有幫助，什至有害。

所以好簡單的歸納，成支野可能
-->支野有補濕，主要For你吸收好D  (除左補濕精華之後都唔洗睇，大部分廠商都會比幾滴甘油、丙二醇你做溶劑同補濕)
-->有美白成分，用邊隻唔知，不過就差咁步打散，即係唔齊全
-->有即時白係因為補濕再加埋有酸類
-->為左令支野無咁易令人敏感，落少少抗敏野 (通常係最唔值得睇的部分 無一支產品應該本身係高致敏性，唔應該因為呢一部分而改變你買唔買的決定)
-->要令支野變質感清爽，落返d質感野(無用成份)


當你睇返咁的歸納，你再對比下其它品牌的產品，就知道大家的配方都無乜分別
用你地最易明的字眼
即係一支b5 gel + vit c serum
另外得閒用下酸類都得

希望你地明點樣自行去選擇產品啦，同埋明我呢堆野講緊咩

成枝產品即刻由神仙位落返黎
下集講一樣更加神奇的描述 : 「自行分配位置、自行修護」

我係一個普通人，無學識，無專業，但對護膚品略有興趣。
http://www.facebook.com/4GO-219338838432480/?fref=nf

產品迷思 ： 卸妝油 乾性皮膚先岩用、卸妝水 油性皮膚岩用、敏感肌都唔驚

最近，我睇左唔少香港Youtuber的影片，我發覺唔少Youtuber真係鳩up當秘笈。
今日先講卸妝油。

首先，你會發覺唔少Youtuber都話自己係極差的皮膚。又話咩敏感肌，用錯少少野就會敏感。其實主要因為呢一班的人「為左大家」不斷試唔同的產品，通常試試下就會試出事。

歸納出佢地對卸妝油有以下的理解。
1)  用完好易出粒粒(暗粒/暗瘡)
2)  好易敏感，但用卸妝水就唔會
3)  油性皮膚唔岩用，因為好笠
4)  佢地好推薦用卸妝水，無論佢咩皮膚都唔驚

首先係了解呢幾樣野係岩係錯之前，了解下化妝品以及卸妝產品的形成。
．大部分化妝品係油溶性
．水同油係mix唔埋
．當水同油係mix唔埋的時候，就要用乳化劑或者界面活性劑去令兩者可以混合
．卸妝油主要由油與乳化劑而成
．你用屋企支植物油(不含乳化劑)都可以落到妝

了解呢幾點，不如睇下佢地講野岩唔岩
1)  用完好易出粒粒
無從判斷。因為要睇入面用乜野油種。
如果用大分子礦物油或者合成脂，通常有機會爆瘡。因為會封閉毛孔(純度不佳的)。
如果用小分子的合成脂(低於500)，就會阻塞毛孔。
通常用呢幾種的卸妝油的確會出粒粒。包括DHC卸妝油。
有人會問 : 如果用植物油咪唔會出粒粒?
非也。植物油都係油，只要用量過多依舊會出粒粒。而有部分的油種係特別易。
包括橄欖油、牛油果油、玫瑰果油等等。
邊一類油無咁易出粒粒，例如荷荷巴油。
所以如果單以產品的形態(水/油)而去判斷係唔岩的。
另外你有冇用錯卸妝油都係問題。
你要乾手乾面將油塗上面，之後按摩溶走彩妝，再用少量的水乳化油脂，最後用大量的水，係大量的水沖走乳化物體。

2)  好易敏感，但卸妝水就唔會
首先，出粒粒唔等同敏感，可以係封閉左毛孔。
要了解水係無可能落到油溶性的彩妝。
呢個時候一定要加界面活性劑、乳化劑令水油混合。
凡增加界面活性劑或乳化劑係一定對皮膚有刺激，只係高與低的問題。
唔係話卸妝油無落，而係卸妝水一定落得更多。
所以敏感時候一定係用「良好配方的卸妝油」好過「卸妝水」。(最好當然用純植物油)
至於經常被Youtuber推介的Bioderma 紅水係咪係於敏感時都岩用。
我唔同意，佢配方上係低敏性，但係皮膚敏感時用界面活性劑係不智的做法。

3)  油性皮膚唔岩用，因為好笠
首先，你係用黎清潔，唔係用黎做面膜。
只要你用岩方法，油分係唔會係你面上面形成笠的感覺。
Recap一次
「你要乾手乾面將油塗上面，之後按摩溶走彩妝，再用少量的水乳化油脂，最後用大量的水，係大量的水沖走乳化物體。」
或者
用海綿落妝，相關方法有人教過，不再重複。
只要你支卸妝油正正常常唔好有封閉毛孔的物質，你只需要做足乳化以及做足沖水，唔會形成笠的感覺。

4)  用卸妝水，無論佢咩皮膚都唔驚
其實小弟極度欣賞呢一種為「大眾」犧牲的諗法。不斷將唔同的野上皮膚。
我自問無咁的能耐。
卸妝水對敏感皮膚始終無咁好，因為需要用更多界面活性劑。



至於有關於點樣為之好的卸妝油
1)   低致痘性的油種
2)   乳化劑非高危害
3)   落足Vitamin E 做防腐就足夠
呢到以後先再詳細講。

所以唔好再亂咁信某一部分「真心為大眾付出一切」的分享啦。

我係一個普通人，無學識，無專業，但對護膚品略有興趣。
http://www.facebook.com/4GO-219338838432480/?fref=nf

產品迷思 — 清潔 同時 護膚 ？

產品迷思 — 清潔 同時 護膚 ？

唔少清潔產品都有加大量的護膚成分，例如維他命C、果酸等等的成分。但事實上清潔用品係唔係真係可以做到護膚？

事實上，我地唔會將清潔用品放上面太耐，一分鐘左右都盡晒啦。之後我地會做沖水、乳化等等唔同的步驟。係呢一分鐘入面，係唔會有大量的護膚成分被你皮膚吸收，大部分都被水沖走。而清潔產品經常性加的保濕成分，只係比你係洗完面無咁乾，形成溫和的假象，當然亦有產品真係溫和。

點解唔應該將清潔產品放上面太耐，係因為常見的清潔產品有大量的界面活性劑，佢地並唔係通常泡沬磨擦先會去走油脂，事實上由呢一類的界面活性劑放上面一刻已經開始運作，混合油脂，人的皮膚有一重天然的油脂，過量的清潔會令佢地「受傷」。所以我亦唔建議將坊間流傳的洗面奶、某一隻賣成三百大元的皂上面三分鐘先洗，並唔係一個好的方法。

另外經常有人係賣手工皂時，將油脂的護膚功效形容成使用呢一個手工皂的功效。
要理解呢一樣野係岩定錯，首先要知道油脂的組成。油脂係由唔同的脂肪酸再加埋少量的微量元素、維他命等等。
但事實上，冷製皂的油脂大部分都被鹼形成皂化作用，油脂大部分的脂肪酸已經皂化，只有少量的護膚成分。而冷製法可以增加一個過程，叫「超脂」，大約係指係皂化過程完成後增加油分，呢個時候由於皂化完成，無鹼去做皂化工作。油脂的養分得以保存。
而熱製法當中，油脂的養分大部分都會被高溫瓦解，所以廠商會增加添加物，例如珍珠、花瓣去吸引消費者同埋增加產品的吸引力。
但無論你超脂增加左幾特別的成分，熱製法的添加法有幾特別，你都只係一分鐘內洗走。

所以，唔需要買咁特別的清潔產品，只需溫和，去脂力岩你就足夠。

產品迷思 - 手工皂 = 溫和天然 ?

產品迷思 — 手工皂 = 溫和天然 ?

我地經常性聽到手工皂代表的係溫和，幫助好多人脫離濕疹的魔掌。但事實上係唔係所有人都岩用手工皂，手工皂又係唔係咁溫和無刺激呢。

首先要知道手工皂點黎。手工皂由一種化學反應—皂化反應而成，將強鹼（例如：氫氧化鉀、氫氧化鈉）與油脂混合，形成皂。另外亦有水作為溶劑作用，將鹼性物質溶掉。

香港的手工皂一般用冷製法（主要）及熱製法。但無論手工皂用乜方法製都好，佢的清潔原理都係因為油脂入面的脂肪酸（例如：月桂酸、肉荳蔻酸）形成的皂去做清潔。

而冷製手工皂一開始完成入模的時候係唔可以即刻用，因為過鹼，所以必須等佢放置係到超過二個星期或以上先可以真正拎出黎使用（視乎配方而定）。所以有部分黑心商人，打住天然、媽媽做的手工皂為旗號，將未成熟的皂賣出去係好缺德的事。

進入正題。冷製手工皂成熟後，Ph值通常為弱鹼性，係呢個時候主要就有爭議，用弱鹼性的洗面產品係唔係一件好事。

以下係我的睇法。

大家都經常聽到好多化妝品配方師唔同意使用肥皂、手工皂洗面，我地唔好去懷疑佢地係唔係出於自身品牌利益先講出呢種說話。大部分配方師主要驚鹼性皂品會傷害弱酸性的皮膚。但事實上皮膚係可以自動調節酸鹼值，而成熟的皂大部分都係弱鹼性，並唔會令皮膚過分的傷害底下，清走多餘油脂，加上手工皂有甘油成分，可以做少少保濕。但大品牌的皂好多都係強鹼性(Ph9-10)、抽走左皂化而成的甘油、加入香精等等刺激成分。所以好多配方師都唔會同意買皂。

所以你真係要買一個皂，就唔好買添加刺激的人工香精，起泡劑。

但手工皂係唔係真係人人都岩？頭先都講過皮膚可以自行調節酸鹼能力，但係濕疹發作，敏感發作的時候，皮膚的自行調節的能力基本上唔見晒，呢一個時候要求皮膚自行調節有點兒難。什至，作為去脂的皂、或者係一般洗面產品作為去脂的界面活性劑本身都會對皮膚做成刺激。本身油脂亦唔係太過多，實在唔建議再用任何起泡成分或大量乳化劑（洗面奶、洗面膏）上面，理應用清洗以撥水方式清潔，減少磨擦。

所以手工皂唔係人人岩，中性至油性皮膚可以使用，乾性皮膚要選擇較「溫和」的手工皂，而敏感、濕疹發作時，真係唔大建議用手工皂洗面。

我係一個普通人，無學識，無專業，但對護膚品略有興趣。
http://www.facebook.com/4GO-219338838432480/?fref=nf