四季防曬攻防戰 — 防曬粉，一次解清

夏天用物理防曬，只會得出好辛苦的諗法。
笠、油、爆瘡。

所以有人想用防曬粉。
係之前我都講過，我係唔建議用防曬粉

防曬粉當防曬?

防曬粉的好處係清爽，但問題係防曬粉的用量太低，好難用到產品所標示的用量。

但女士用於補妝所用係可以。

FYR : http://4goskincare.blogspot.hk/2016/06/blog-post.html

不如就講下點解。

• 防曬的標準用量係2mg/cm2 
• 即係一塊面連頸大約一次要用0.8g-1.3g左右

講到呢到，你根本無可能一次用到0.8g-1.3g

1g的粉上面應該會好厚粉

什至你平時都唔會用到 (包括我) ，所以點解抗氧化個類產品咁重要。

另外仲有一個問題，係健康問題。

粉類產品有一個問題，就係佢用的時候d粉會周街飄。

現時，納米技術咁流行，好多廠商都會將氧化鋅同二氧化鈦打到好細。

本身係普通lotion/cream的產品，物理防曬粉就唔會周街飛，你唔會吸收肺到。

但用防曬粉周街飛，就存有機會吸收。

氧化鋅同二氧化鈦外用絕對無問題，但吸收就有機會引致呼吸道刺激，什至增加癌的機會。

當然，要吸收之後無被人體咳返出黎再係身體有一連串反應的機會絕對唔大，但小心d好。

記住外用無問題，真正問題在於周街飛的納米級防曬粉被人體吸入。

產品推介 — Paula's Choice Earth Sourced Perfectly Natural Cleansing Gel 抵用洗面gel

一支清潔產品最重要應該有四項重點

(1)  清潔能力、界面活性劑的刺激性
(2)  補濕/保濕元素
(3)  價錢
(4)  額外護膚成分

Source : http://www.paulaschoice.com/shop/skin-care-categories/cleansers/_/Earth-Sourced-Perfectly-Natural-Cleansing-Gel

同大家講返少少正確的知識
成日聽到「洗面奶係比洗面gel溫和」
其實就唔一定的 對於洗面奶同gel什至cream最大的分別只係油分的增減
落油分最少排到最多應該係 gel<奶<cream
而油分係洗面產品的作用只係比返你少少的保濕感
如果一隻產品的界面活性劑(洗走油的成分)係極刺激，你落油分比佢依舊都會刺激，只不過係係傷口上面用層油去cover
油分真正作用係比保濕感，咁可以用作區分邊一類人用邊一劑型的產品
一般而言，缺油的就用奶、多油就直接用gel

(1)  清潔能力、界面活性劑的刺激性 (Above Average)
你可能見到佢好似好多界面活性劑
但通常多唔代表刺激，可能、講緊可能只係佢每樣落好少
Decyl Glucoside
Sodium Cocoamphoacetate
Lauryl Glucoside
Coco-Glucoside
Sodium Cocoyl Glutamate
佢大約落左幾種界面活性劑，
重點係佢大部分都係椰子萃取而成。
講過，天然而成的界面活性劑都係化學物質、化學野。
不過一般都比較溫和。佢的清潔力都好足夠。

(2)  補濕或保濕成分 (Average)
都係落返甘油、蘆薈個一類做褕濕舒敏
佢無落油分，洗完會比較少油感
可以落返少少天然補濕因子

(3)  價錢
USD $17 = 6.7oz
大約等同 HKD $140 = 200ml
算係幾抵用，不過同佢個洗面奶比
當然差少少
但同香港比 我諗無乜邊隻做到咁平咁溫和同埋有用

(4)  額外護膚成分
無，所以價格可以壓縮到平少少

所以我十分之推介呢隻比多油肌用
(出暗瘡不等同多油肌)

產品「推介」 — Paula's Choice Skin Balancing Oil-Reducing Cleanser 抵用洗面奶 $200/480ml

一支清潔產品最重要應該有四項重點

(1)  清潔能力、界面活性劑的刺激性
(2)  補濕/保濕元素
(3)  價錢
(4)  額外護膚成分

Source : http://www.paulaschoice.com/shop/skin-care-categories/cleansers/_/Skin-Balancing-Oil-Reducing-Cleanser

(1)  清潔能力、界面活性劑的刺激性(Above Average)

Sodium Cocoyl Isethionate
通過一連串化學途徑由椰子油形成的界面活性劑
要記住，儘管由椰子油而黎，但唔代表佢係天然
任何市面上的清潔產品都同天然扯唔上關係，包括Handmade Soap
因為任何你地用緊的清潔產品都會經過化學程序而黎
呢一隻的界面活性劑的清潔力不俗，而且比較溫和

Sodium Lauroamphoacetate
溫和洗面奶常見的界面活性劑

-->  總結 : 溫和，有一定清潔力

(2)  補濕/保濕元素  (Average)
呢一支有甘油、有葵花籽油，提供一定的保濕/補濕能力。
另外亦有加入蘆薈水做抗敏補濕。
當然，如果佢可以加入Vitamin B5 或者 天然補濕因子更好

(3)  價錢 (Excellent)
USD $25 / 16oz 大支裝 (~HKD $ 200 / 480ml)
USD $17 / 8oz 細支裝 (~HKD $130 / 240ml)

我諗香港無一支洗面產品可以做到咁大支
同時亦無任何有害物質
你係萬寧屈臣氏都絕對搵唔到

(4)  額外護膚成分
無加入，係一件好事。
因為有加入代表價格會高好多。
問題係一分鐘的洗面係無乜可能吸收到多的護膚成分
當然，你有經濟能力的，你鐘意買一支成千銀但得個六十毫升的洗面都可以
我就唔會咁選擇

總結 :
平、靚、正

四季防曬攻防戰 — 點評數項物理防曬 (一) Resist Super-Light Wrinkle Defense SPF 30 From Paula's Choice

點評要有準則，防曬的準則大可以分為三項至四項
(一)  有效防曬成分
(二)  抗氧化劑的使用
(三)  用家感受
(四)  包裝設計 (呢一項係指保存抗氧化物的技術，唔係指靚唔靚)


Resist Super-Light Wrinkle Defense SPF 30 From Paula's Choice US$32/2oz (~HKD$250/60ml)

Source : http://www.paulaschoice.com/shop/skin-care-categories/sun-protection/_/Resist-Super-Light-Daily-Wrinkle-Defense-SPF-30

(一)  有效防曬成分 (Above Average)
呢一支產品用左13% Zinc Oxide 做物理防曬，絕對算係比較高的比例。如果你睇返部分都聲稱自己有SPF30的防曬，落去物理防曬成分可能只係得4-5%。(例如COOLA)
事實上，我自己認為如果Zinc Oxide為主軸的防曬，10-15%絕對係可接受。

(二)  抗氧化劑的使用 (Excellent)
Paula's Choice呢一隻牌子係抗氧化方面絕對做得非常之好。
Resveratrol 
認住呢隻成分，絕對係居家必備良物。
Resveratrol 呢一隻成分係一隻不錯的抗氧化成分
同時都係一隻非常好的美白成分。
而且用量只需要1%就可以達到佢的效果
Quercetin 
抗氧化物。減低自由基形成。
佢的重點係減低炎症活躍程度(特別係被UV照射過後)
Epigallocatechin Gallate(EGCG)
通常存在於綠茶萃取中，但綠茶有幾多EGCG就未必知道。
佢亦都係一隻非常好的抗氧化劑
防止因UV而做成的細胞死亡、DNA損傷、發紅。
即係有抗UVA同UVB的功能
Tetrahexyldecyl Ascorbate 
維他命C的衍生物，對PH的要求不高，可與Vitmain b3一齊用
又係抗UV的好手
不過係呢到落得唔多，好難發揮有淡斑效果
Haematococcus Pluvialis Extract
內有蝦紅素。蝦紅素非常良好抗UVA功能。
Punica Granatum (Pomegranate) Extract
內在大約40% Ellagic acid
仍當然有抗氧化功能，但重點係佢有協同效應，將所以材料的功能再提升

(三)  用家感受
呢一間公司當然係用左好多唔同的化學物質去令你感受到「良好質感」
包括不同的合成脂、矽靈。呢一類野當然少用為妙。
但係防曬係呢一方面做得唔好的確好難用落手，所以我認為對於防曬，重點係事後清潔功夫。定期做下深層清潔，另外要用卸妝產品去卸走，唔好單用清潔用品。
以我判斷，佢應該唔會比你極度厚重的感覺，但一定有，因為佢係物理防曬。物理防曬係一定會令到個一支防曬變笠。
另外，佢顏色唔係白色，因為防止有變得更加白的情況。

(四)  包裝
可以接受，因為無用太大的開口令成分 (特別係抗氧化成分) 氧化。


好處總結
(1)  足夠防曬，用Zinc Oxide
(2)  強力抗氧化
(3)  價錢合理
(4)  質感合理

壞處總結
(1)  大量合成脂、溶劑、乳化劑、矽靈。比較容易爆瘡的皮膚需要注意用量。
(2)  購買困難 (不過美國個邊成日做discount)

* 我覺得可以試下

探討 — 三個級別的行動保持皮膚原貌 (本人的護膚框架)

愛美之心，人皆有之。唔同人買護膚品係為左唔同的目的，包括睇到廣告想買、見到包裝想買、睇到打手推介想買，好老實，唔多人係知自己要咩，唔知自己應該要咩。多數人都係個種心態見廣告的標示言係乜就信。儘管香港有商品說明條例，但可以走的位太多，廣告不可盡信。

護膚品的成效永遠只係得三樣野睇到
「成分、配方、包裝」

以下講的野係人人都岩睇，人人都岩用，而且係人人都知的野，我只係將成個脈絡打一次。
我形容為三個級別 (單講外在條件，內在條件我無相關的生物知識)

第一級別，就係你地都用緊的用護膚品，但呢個級別係人人都應該要做 — 抗光傷害。
不談不可改變的因素(年紀、基因等)及內在因素(飲食、運動、嗜好)，皮膚的主要傷害都係紫外線。紫外線會穿透皮膚的角質層，直入你的真皮層，傷害你的細胞等等，引發自由基的傷害。所以護膚第一步，亦係人人都要做，就係防止光傷害的形響擴大。
你可以做的當然係用防曬，咁呢樣係人都知。
另一點抗光傷害就係抗氧化，呢一到的抗氧化當然係指抗因自由基而形成的破壞。
配方上黎講，係唔計算廠商成本呢，基本上要加幾種抗氧化劑
我地大體可以分為
抗UVA、抗UVB、抗糖化、抗羰基化、防止膠原蛋白及彈力蛋白改變 等等

簡單黎講，你護膚品最基礎的原料應該係圍繞住呢幾項而走，你做唔到呢幾項，基本上你用幾多「胜肽」、「DNA修護因子」(題外話 : DNA可以外用修服，世界就唔會有咁多基因病)、「Pitera」都係多舊魚。
你唔用呢一堆抗氧化的確係呢一刻唔會有咩問題，但光傷害係累積，十年後就見真功夫。
順帶一題，我幾肯定香港可以直接去專櫃或者開架品牌無一隻可以做到上面所講的抗氧化，大多都係落幾隻就算數。大家好自為之。(有興趣可以自行搵下Paula's Choice的產品，佢地基本上做齊晒)
但大家又唔洗驚的，有都好過無，以我所見，你係萬寧所買的「肌研」、「Bioderma」個類就一定無。一般牌子都會落少少植物萃取。通常個隻植物要對住強光的通通常常都會有抗氧化。

第二級別係改變。
呢一個級別一般的護膚品點都可以做到，你有暗瘡問題，咪買支暗瘡精華 ; 你有脫皮問題，咪買支補濕產品。現實黎講，你只要唔係年少無知，最終都可以搵到一支岩你的。點樣加快個進度就係睇有效成分，例如你知道vitamin b5可以補濕，你就買支有b5的補濕。
另一樣要做就係了解你皮膚係呢10年、20年會有咩變化而搵定一隻產品去幫你唔好咁快變(即延遲皮膚變老)，除左上述所講的防曬抗氧化，就係搵d功能成分。
即係你地成日聽的Pitera，80歲阿婆隻手同20歲一樣個類品牌商業故仔的成分。
你地要面對因老化皮膚而形成的問題，包括鎖水能力差左，皮膚無咁緊緻等等。只要搵返相應的成分就可以令情況得以舒緩。
提供幾個成分可以舒緩必定會出現問題，就係維他命A、B3、C加多一支AHA。
基本上你用一個好配方產品加埋有足夠或者高濃度，上面四隻成分一定幫到你

第三級別係醫學美容。
無任何護膚品可以做到醫學美容的效果。
去到最後一步，有錢咪做下。(本人唔熟醫學美容，咪問我)
你肯付出金錢，大多都可以Keep到皮膚。

上面係我個護膚基礎理論框架，我自己整的買的產品都係根據上面的理論去整。信不信由你。

係我角度你地有乜野行為係唔太好呢

1)  走去買埋個堆活性成分低到阿媽都唔認得的產品

成日都聽到，敏感皮膚唔岩用活性成分太高的產品。事實上係一錯完全錯誤的概念，

活性成分不等於刺激

一支純水劑的產品，活性成分用到99.7%都係一件可以的事。而且皮膚係唔會敏感。
99.7%當然係取巧，將植物精華水當然Aqua用就可以做到，唔太難。
唔講咁極端的例子，不如睇下你手上支產品係唔係得補濕，是但落幾隻有效成分就算。
通常呢類產品的成分大多位置都係分左比堆化學成分(我指緊無用純粹呃你質感吸收的)，呢堆成分對皮膚完全無效，有部分會入毛孔(合成脂)、有部分會刺激皮膚(香料、差乳化系統)、有部分皮膚代謝唔到(廠商用黎代替酒精的溶劑個類)。呢堆先係真正令你皮膚不斷變差的成分。
而因為呢堆野係純粹呃質感，完全無用，但又極影響你下一次買唔買，個個走晒去軍備競賽，真正為消費者的成分五隻手指數得晒。特別係個罐成千銀但得礦物油個一隻La Mer。唔好同我講話你點樣點樣，你未試過好植物油、好精油抗敏能力，係同礦物油唔同級數。
呢個亦係我點解反對用礦物油，唔係因為佢致癌(有一分報告指礦物油會致癌，但完全唔係化妝品級級數的礦物油)，佢會令人爆瘡，而係佢有一隻更加好的替代品，而且仲要好平。

2)   皮膚用太多護膚品唔好
呢一野我絕對同意，但我覺得我的立場同你地唔同。
你地好多時問我呢幾樣產品應該點用，幾時用，有咩要加。通常加完比你，你地都會問一句，「會唔會太多」(利申 : 無任何負面情緒係呢到，純粹想解釋返比你地聽)
你地的多係建基於「支」數，即係用產品的量。
而我的立場係建基於「化學成分」的量，即係頭先所講軍備競賽的成分。
個一堆化學成分先係真正影響皮膚，因為大部分都唔能夠入落角質，你一層一層咁樣放係皮膚表面，咁多化學野係面上，當然唔好用咁多。
所以我建議你地真係要試下無額外添加化學成分的Toner或者Serum，我相信你對護膚會有另一番體驗。(當然啦，有部分打住天然、有機、芳療的護膚品牌子，但支支精華都落三仙膠個類增稠劑，何必呢)
我的另一個立場係，護膚品的原料濃度。大致黎講，濃度高的話，刺激性都比較高，你用太多單一成分又濃度高的話，會出現刺激情況好正常。但係好老實講，成分唔洗錢架?廠商一定唔會落咁多比你。

不如黎下你手上的護膚品，有幾多真係會做到頭先講的第一步抗氧化?
推介三個係抗氧化做到非常好的品牌

1)  Drunk Elephant
呢隻牌子我自己評價十分高，佢價錢亦十分高。
可以批評的地方當然有，就係佢乳化系統用的係一隻比較高刺激性的，另外有比較多矽靈、合成脂。
2)  Paula's Choice
呢隻牌子，我會形容為，佢某幾隻產品的Price Range，絕對搵唔到另一支比佢更加好的產品。
包括 AHA、BHA、防曬、少量精華
但就好鐘意落矽靈、合成脂，我不太喜歡。
3)  幸福肌
台灣一個配方師的品牌，有理念，有實踐。價格中高。
但我相信絕對對得住佢的價錢。
較有問題的地方係，佢購買途徑好難。

當然仲有一隻品牌叫SkinCeuticals，佢的品牌走高端科研路線，佢好多配方都走在最前線。
但我絕對唔建議大家用，一來佢貴到痴線，但市面太多替代品。二來，亦係最重要的原因，佢係Lancome母公司L'Oreal旗下的一間公司，做人要有骨氣!

之後幾篇都係圍住今日第一級別同第二級別講，因為太重要。

我係一個普通人，無學識，無專業，但對護膚品略有興趣。
http://www.facebook.com/4GO-219338838432480/?fref=nf

探討 : 補濕產品是必須品嗎 ?

聽街外人一講護膚品，一定會同你講，
「護膚梗係補好濕先，其它野再慢慢買啦」

第一，護膚第一步一定唔係補濕，一定係抗氧化加買防曬，光傷害先係令皮膚變差的成因。
(FYR :http://4goskincare.blogspot.hk/2016/06/blog-post.html)

第二，就要開始探討補濕產品。
先落定義，下面所講的係專門買一支補濕產品，即補濕爽膚水、補濕精華、補濕面霜

百分之九十九的護膚產品都會落補濕成分。換言之，你即使唔買一支補濕產品，你都會係其他唔同系列的護膚品得到補濕。最基本就有普通的水、甘油。
所以，你如果覺得足夠的濕，足夠的多水，已經就足夠啦，唔洗專登買一支補濕產品。

但如果你用完一般產品都唔夠，當然你係需要補水。點補多點水，買支補濕產品。
不過好多人都有一個誤區就係「補水補水但完全無諗過補油」。

神奇畫家示意圖

(肉色以上係外面，肉色以下係皮膚內 ; 黃色係油 ; 藍色係水)

單純補水只係令到你皮膚係短期內水份充足，但水分係會揮發，無油作為「封閉」皮膚表面水分的話只會令到水分揮發得快，補完水等同無補。

所以買晒補濕產品但皮膚仲係好乾的話，先試試補油。

所以得出結論，無需要唔洗買補濕產品，有需要先買。

其實上面都係講緊廢話，下面先係重點。

就算唔買補濕產品，你都要補濕。

1)  補濕係一種你地比較容易按觸的方法令到皮膚更易吸收護膚品的成分

2)  話時話補濕，但其實好多成分都係「多功能」，一樣需要

例如 : 

Vitamin B5 : 除左係吸濕劑，仲可以加速傷口癒合，維持角質層的健康。

天然保濕因子(NMF , Sodium PCA) : 除左係吸濕劑，仲係皮膚的組成元素之一

所以即使你唔用補濕產品，唔需要補濕產品，都需要用有補濕成分的產品。

問題係，應該用邊一種。

我地經常講的透明質酸，係一種好平好普通的大分子補濕。佢除左提供良好的吸濕鎖水，仲可以提供良好的使用感覺 (順滑感覺)。

但其實對於年輕皮膚係唔需要用到咁重本，用一般的中、小分子補濕就可以。

所以大分子 (係角質層外做事) 的補濕成分，等你需要補濕或者皮膚走向成熟的時候先用都未遲。

咁用左有無害，大體上無害，除非你用假貨。

基本護膚知識 — 補唔好濕就會出油 = 呃錢呃人

廠商同BA什至你地問我問題成日都有一句

「我補好濕點解仲係出油」

—  呢一種係無理論基礎的講法

邏輯上，呢一句有個暗示

「當皮膚缺水的時候會出梗加多的油，而皮膚夠水的時候就會無咁多油」

先用常識去解答

上述理論所指 :

皮膚有唔同的情況，我地分油性、中性、乾性。

根據上述理論，皮膚乾性的人就會有最多的油。

所以油的多少係根據水的多少而定

常識 : 

點解會有唔夠水分又唔夠油分。即係「沙漠肌」。

(按道理缺水係特別多油，唔會缺油)

點解有部分多油的皮膚，皮膚會缺水?

(按道理多油的皮膚應該會夠水)

所以上述講法完全應用唔到

事實上，係呢十幾二十年，關於皮膚出油量的研究做左好多。

係呢到同大家講明一個基本邏輯。

如果一件事唔係二元對立，當A(某項事情)被證實了，唔代表B(另一項事)係假。

例如，今日證明左某一項成份有某一項功效，唔代表另一項的成分大家所指的功效係假的。

或者同樣咁講，B呢一項事情係未確定(中性)，已證實正確或錯誤。

講左一堆廢話。有咩用

「皮膚出油關缺水事」同「皮膚出油唔關缺水事」係二元對立的。

所以我地要知有咩研究做過，去證明關唔關事

第一，報告指出，乾性皮膚的人同中性皮膚的人角質含水量不大。

如果係上面的理論，應該係中性皮膚的人比較多水過乾性皮膚。

第二，另一份報告同時指出，表皮的油對於皮脂腺，係一種信號去話比佢知，「要停止分泌啦」。即係話皮脂腺先係決定皮膚油量的因素。

咁有咩因素會影響油性

天生皮脂腺多少、溫度高低、荷爾蒙等等

對不起 大部分也不是你能控制

所以唔好再同我講一句，我皮膚好多油，但我有補好濕架BO。

Source :

Journal of Cosmetic Chemistry, September/October 1993, page 249

Archiv für dermatologische Forschung June 1974, Volume 251, Issue 2, pp 155-164

LANCOME「替代」 — 一大堆又貴又唔尊重人的品牌，如何替換 1 —KIEHL'S

以下提供數隻牌子可替代方案

Kiehl's 呢一個品牌我一直我太推介，但我都明白有人鐘意，不如睇下以下幾個平靚正替代。

(1)  爽膚水系列

佢地的爽膚水的顏色鮮艷，一睇就知落晒色素。
一睇成分表，落的萃取液小過你手頭個支洗面產品。
成80-90%都係水，咁貴。

替代方案 -->
(a)  純露系列
直接買支純露濕Fu，無防腐劑，無香料。日日咁做都無問題，1000 ml 最多都係$400，牌子比較平的有Norfolk，貴少少就Florihana，再貴少少就有Oshadhi同Kobashi
(b)  Meltiva 花水
我唔推介呢一個品牌，因為佢依舊不符合我的護膚理念。
但絕對比Kiehl's 假天然花水黎得好。

(2)  白泥面膜

佢隻白泥面膜一直都咁古惑，加左二氧化鈦令大家以為fu完變白，但其實主要係因為二氧化鈦的調色成效而非真係去角質先變咁白

替代方案 -->
(a)  自己買包高嶺土開水
泥土2份:水1份，永興$30有找

(3)  維他命c產品
出面的維他命C產品多的是，我一直推介直接用維他命C粉直接買返黎，之後以維他命C份量1:水劑(例如花水)份量4。直接用。唔鐘意咁做，大家方案

替代方案 -->
(a)  Paula's Choice C15 Booster
平靚正，呢間公間出的精華不錯，又有15%的Vitamin C，仲有Ferulic Acid 做協同效應。

我係一個普通人，無學識，無專業，但對護膚品略有興趣。
http://www.facebook.com/4GO-219338838432480/?fref=nf

基本護膚知識 — 四季防曬攻防戰

護膚品最值得投資一定係防曬。基本人人都要買。

重要的野我唔想講三次，但你想護膚之前，唔該先用左防曬先。

先了解防曬係做乜野先。
防曬就係防止光傷害，我地所指的係防止紫外線的傷害。

紫外線有三種

UVA、UVB、UVC

UVC : 係傷害最強個種，但被臭氧層所擋。現時引起大家對UVC的關注，係臭氧層開始穿左個大窿。

UVB  : 波長280~315 ，對皮膚的傷害最易見到係皮膚會出現曬傷的情況出現，例如紅、出水泡等等，但UVB有機會係一塊玻璃就反射到(只係有機會)

UVA : 波長315~400，但仲有分UVA1（340~400）、UVA2（320~340），係可以穿過玻璃入你皮膚真皮層，變黑、老化都可以因為UVA而引起。

所以我地防的主要係UVA及UVB


新手入門，防曬成分有乜野。

防曬有兩種，分別係化學防曬以及物理化曬。

化學防曬可以話係一種吸收劑，佢會入到皮膚到，係紫外線進入皮膚後，佢地就會吸收紫外線。
但化學防曬比較煩，佢有一大堆的成分可以防到唔同波長的UV。
但問題係化學防曬有部分的成分比較唔穩定，受到陽光的暴曬會失去佢的效用。
但放心，如果唔係台灣或者韓國一大堆不知名的牌子，通常做化學防曬的大公司都會令到支防曬有效。
提供幾個比較出名，而且較多人使用的化學防曬成分
Avobenzone : 防UVA1
Oxybenzone : 防所有UVB及UVA2
Dioxybenzone : 防UVB及UVA2
Mexoryl SX : 防UVA2

化學防曬的好處係可以做到清爽的質感，而且成本可以平好多
但壞處係比較容易引起敏感。我個人係對某部分的化學防曬成分敏感。而且需要等30分鐘先有效。

而物理防曬主要有兩種成分Zinc Oxide (氧化鋅)、Titianium Dioxide(二氧化鈦)
佢好似一塊鏡咁反射走UV。
首先Zinc Oxide係最優先選擇的成分，佢可以防到UVB、UVA1、UVA2
但Titianium Dioxide只可以防到UVB、UVA2
不過Titianium Dioxide係防UVB的能力的確係會比Zinc Oxide 好

物理防曬的好處係佢只係在皮膚表面上運作，唔會滲入皮膚或身體，敏感可能性較低
而物理防曬就一定會比化學防曬笠，即使現時用到納米技術，佢都依舊比一般化學防曬笠
我個人推介用Zinc Oxide就夠，因為UVB的確唔咁驚，一般人出出入入的地方都有野擋住，就算係沙灘上，只要努力補返防曬，Zinc Oxide都有能力擋住UVB，而且只要Zinc Oxide含量高，一樣有好好的防曬能力

知道有咩成分防到曬，就要知產品的標示

經常睇到SPF、PA。
首先SPF係指你會唔會曬傷，大約將指數乘大10倍就係佢理論上可以防到曬傷的時間(針對黃種人)。
例如SPF30即係指有300 ( 30 X 10 ) 分鐘的防曬傷。老實講，我就唔太著重的，因為防曬如果你用到Zinc Oxide 15%以上，基本上SPF都有30。SPF係計算UVB上面係重要的指標，但係計算UVA上面比較含糊，什至不清楚。

所以日本設定左一個指標叫PA，，用作計算量度防UVA的程度，一般而言現時發展到最高4個+。
普通人建議最少用兩個+ (即PA++)
1個+係延遲2倍曬黑
2個+係延遲4-8倍曬黑
3個+係延遲8-16倍曬黑
4個+係延遲16倍以上曬黑

而歐洲都設定左一個睇UVA的指標，叫PPD
PPD 2-4叫輕度防曬
PPD 4-6叫中度防曬
PPD 6-8叫高度防曬
普通人建議最少用到PPD >4

資料性睇完，係時候睇配方。

一支好的防曬應該要設計三項

(1)  防曬能力
一般而言，我地都建議用高系數防曬，因為一般人用防曬一定用得唔足，因為需要每平方公分兩毫克(每一個1 cm乖以1 cm的方格有2mg的防曬)，諗返你地平時一支30-50ml的防曬可以用幾耐，一個月?如果日日用(30g/1個月)，每一日都係用1g，咁可能都差不多。但防曬建議每兩個鐘就補一次，所以防曬絕對係好貴的一項護膚投資

(2)  防曬未能完全阻擋UV後引發的自由基破壞
要做好呢一個部分，就係要抗自由基，即抗氧化。一支防曬一定要加入不同的抗氧化成分，確保減低uv進入皮膚對皮膚的傷害。而你平時用的精華都需要有抗氧化，總之用多少少都唔驚。

(3)  用家感受
即係爽身同笠身，香港潮濕又熱，唔少人對物理防曬都唔太鐘意。
即使係配方上點處理都好，都好難做到比一般化學防曬爽身。
但大家要注意的係佢點樣形成爽身的方法，
我自己對防曬的要求反而係最低，剔除左我自己覺得有爭議的，我接受防曬內加入矽靈、合成脂等等(酒精唔接受)。因為防曬的太差好容易做成唔想用。

以下係我對某類問題的睇法

(1)  化學防曬一定唔好用，因為會致癌
我諗法係化學防曬的確係比較容易引起敏感，但致癌比較難推斷到(用於防曬產品中，非食落肚)，但一般都建議返年紀細同孕婦個一類人士用返物理化曬，因為物理化曬唔會入皮膚，化學防曬會進入皮膚經身體的循環系統再排出

(2)  化妝當防曬?
首先，單純用化妝產品當防曬我係唔同意，好多化妝產品的防曬成分含量奇低，而且你地用上去的量絕對做唔到產品標示所需的用量。
但如果你本身用左防曬產品，而化妝品中又有化曬我係同意的，因為可以當多一層保護。
當然化妝品的成分安全又係另一個問題，呢到不作討論。

(3)  防曬粉當防曬
防曬粉的好處係清爽，但問題係防曬粉的用量太低，好難用到產品所標示的用量。但女士用於補妝所用係可以。

(4)  納米級物理防曬的問題 : 致癌、進入皮膚
首先，即使係物理化曬，佢無咁危險係基於佢唔會進入皮膚。現時有人擔心佢進入皮膚，因為現時有好多納米技術，將分子打到好細，怕會進入皮膚。
問題所在係基於會不會進入皮膚。
現時並沒有報告指會進入皮膚，而且有報告指不會進入皮膚。
但Titianium Dioxide呢一種成分係進入身體後的確係有爭議。所以用Zinc Oxide就ok啦。

(5)  用物理防曬需唔需要卸妝
要，我認為防曬的本質其實係化妝的一種

(6)  邊一種天氣唔使用防曬
每一日都要用防曬，無論咩天氣，因為紫外線個名就係我地睇唔到，佢係紫色外的光線，所以叫紫外線，你唔會睇到佢對人的傷害

(7)  物理性混合化學性的防曬問題
當然，用唔同的途徑防曬係好事，先反射，有不足就用吸收劑(化學防曬成分)。
但請自己考慮返對化學反曬的反應，有冇敏感或刺激，同埋接唔接受到有成分經身體再出返黎。
但通常混合的結果好多時都係物理化曬唔夠多，化學防曬都唔夠多。
建議check清楚有有冇足夠的防曬成分

最後，防曬同埋Vitamin A係我最後會係外間買的護膚產品
暫時而言，我用過Synergie Skin的防曬
將會買的係Drunk Elephant 同 Suntegrity 的防曬
唔好再問我用邊隻啦 :D


呀 仲有一點好重要
係室內有陽光會入到黎理論上都係要用防曬
(實際上我認為你個人無一面對住個窗可以自行選擇會唔會用)
同埋兩小時要補用一次

產品「推介」 : Paula's Choice Resist 10% Niacinamide Booster — 值得一試︰美白抗氧化抗敏補濕

Water (Aqua), Niacinamide (vitamin B3, barrier preservation/pore size reduction), Acetyl Glucosamine (skin conditioning agent), Ascorbyl Glucoside (vitamin C/antioxidant), Butylene Glycol (slip agent), Phospholipids, Sodium Hyaluronate (skin-identical ingredients), Allantoin, Boerhavia Diffusa Root Extract (soothing agents), Glycerin (skin-identical ingredient), Dipotassium Glycyrrhizate, Glycyrrhiza Glabra (Licorice) Root Extract (soothing agents/melanin inhibitors), Ubiquinone, Epigallocatechin Gallate (antioxidants), Beta-Glucan (soothing agent/antioxidant), Panthenol (skin conditioning agent), Canosine, Genistein (antioxidants), Citric Acid, Sodium Citrate (stabilizers), Sodium Hydroxide (pH adjuster), Xanthin Gum (thickener), Disodium EDTA (chelating agent), Ethylhexylglycerin, Phenoxyethanol (preservatives)

Source : http://www.paulaschoice.com/shop/collections/Resist-Anti-Aging/treatments/_/Resist-Ten-Percent-Niacinamide-Booster


在我角度而言，呢支野真係無任何有害成分

咁不如打下配方組合，比大家留意下點樣搵下係成分上配合完可以令到產品成效更高

1)  Vitamin B3 (Niacinamide) + NAG (Acetyl Glucosamine)

點樣令到大家皮膚好都知(美白、補濕、控油、去黃、消炎)
NAG由主要都係增加下Collagen生產，補下濕，加快皮膚傷口癒合，皮膚有多D彈性，加快皮膚更新，仲可以令色素沉澱的問題減輕，重點係佢當同VB3一齊用，會出現協同效應，令佢的效果更加好。

==>  對暗瘡皮膚有奇效

2)  Antioxidants + Sunscreen

皮膚會變老變黑，主要因為紫外線UVA同UVB。大部分人用防曬都未必用到產品所標示的用量。咁唯有搵下抗氧化物幫手。
抗氧化物係乜野?先了解下自由基。
自由基就好似一個好仆街的細路。佢唔會乖乖地坐係到(不穩定)，佢會周圍搶人個玩具(搶其它物質的電子)，比佢搶個個無玩具，又會搶其他人的玩具玩。咁就係老化的過程。
當UVA同UVB射落皮膚，防曬(假設你有用)會幫你阻擋或分解大部分的UVB同UVA(理論上，如果你係用得足夠的量)，但亦有部分會紫外線入到你的皮膚，呢個時間就會引起相關反應，自由基會產生，抗氧化物就會係到幫到你防止(氧化還原原理)。但抗氧化係接觸到空氣之後會慢慢消失，即係由你打開產品個下開始，所以你地開左支抗氧化產品應該盡快用晒。
順帶一提，無自由基人係會死，佢有幫助維持你身體健康的作用，身體的荷爾蒙會幫手平衡，所以唔想咁快老，都係個幾句老生常談，均衡飲食，多做運動，


講完一大輪野，呢件產品點解好，係因為夠全方位
A)  美白、抗氧化
首先美白的問題只係同黑色素玩遊戲。我地不如簡單了解下黑色素的機制先。
成個過程好簡單，就係
1)  自由基入到你皮膚  (用防曬加抗氧化物解決)
2)  刺激「酪胺酸酶」<--大部分的美白成分都係防止有野刺激到
3)  刺激到上面成野之後，同本身一種叫酪胺酸的野合成左一隻新野叫多巴醌
4)  氧化聚合後形成黑色素
(最簡單的睇法，入面仲有一大堆化學反應)

呢一支產品有大量的抗氧化物(Antioxidants)，防止自由基刺激酪胺酸酶
再利用部分成分減低酪胺酸酶活性(eg. Licorice Root Extract, Vitamin C)

B)  抗敏
Beta-Glucan, Niacinamide, Dipotassium Glycyrrhizate 都係常見的抗敏成分
問題係Beta-Glucan落的份量應該未必足夠，似係幫你抗原料敏感
而Allantoin、Dipotassium Glycyrrhizate本身需要落的量又唔需要特別多

 
C)  補濕
常見透明質酸、Vitamin B3B5、甘油

對於油性、乾性、暗瘡性皮膚有唔小好處
但敏感皮膚先了解自己對10% Vitamin B3頂唔頂得順

價錢係可接受，功效全面，可以一戰