角質修護面面通 : 都市病? — (1) 六點修護原則

有冇成日覺得皮膚有時無微絲血管? 有時又有?
有冇成日覺得塗抹任何護膚品都會紅? 而你用緊個堆明明之前唔會?
有冇成日覺得生好多不明原因的小紅點? 即使產品無點換?
有冇成日覺得皮膚好易紅，好似好薄，好似好易敏感?
有冇覺得外油內乾?

呢幾個問題基本上係現時都市人常見的護膚問題，
而呢類問題唔一定關角質出問題事，但我地可以先以呢個方向入手。
因為係最容易自己試先。

點解角質會出左問題 ?
原因有好多，包括但不止於 :
過度清潔、過度使用酸類或物理性去角質、過度使用護膚品、天氣濕度改變、年齡的增長、紫外線等等。

所以煩請諸位不要過度去角質，要重新養好煩。

而有部分的皮膚病都會出現角質問題，異位性皮膚炎係其中一個比較常見的皮膚病，同時佢的角質功能係差的。

我地會稱上述現象為皮膚屏障功能受損。

你去睇醫生，佢會比藥你用去解決即時問題，包括抗生素、類固醇等等，幫你退紅殺菌。但更重要係平時日常護膚功作要做好，建立較完整//強壯的皮膚屏障。

問題在於點樣做，有咩成分做到。

要點一 : 水性補濕因子要做好。
之前都提及過，你可以唔買「補濕產品」，但一定要用補濕成分。

皮膚去到屏障受損的時候，細胞間脂質好難同的鎖住水分。
所以適當咁提供額外水分補充，同埋吸濕劑的填充，絕對係一個重要的即時舒緩方法。
而同時，良好的補濕會令角質代謝功能慢慢變返正常。

但謹記，良好不代表比更多更好，亦唔好追求個種水潤飲飽水的假象，好多時會變反效果。
我會建議多少少用「天然補濕因子」同「維他命B5」類的補濕元素，
主因係前者大多同皮膚的天然補濕因子相似，
後者過敏性低，同時亦有部分報告指有效修護角質。

要點二 : 不要過份使用面膜。
即使個面膜成分有幾好，係皮膚屏障功能受損的時候，先暫停使用面膜。
原因係過份的水合作用會令到皮膚角質屏障功能減弱。
更何況，你日日用得的面膜，都唔會貴得去邊，
OEM代工$1-2一包個D，我諗唔到有咩好用地方。

要點三 : 適當使用「細胞間脂質」及  「皮脂腺分泌」成分。
事實上，皮膚唔單止有補水，更要補油。
唔係叫你用好多隻「植物油」混合而成的產品，我係極度反感的，最搞笑係最後會有橄欖油。而係用多類型唔同的油脂成分。

一聽到多類型油分，又聽到細胞間脂質，好多人會諗起分子酊(Ceramide)。
事實上Ceramide係一件極為繁雜的成分，單一使用未必會有效，同時即使混合使用亦未必有效，濃度太低亦未必有效。

所以我個人建議，Ceramide可以使用，但建議複配使用，要同膽固醇(Cholesterol)、三酸甘油酯類(護膚品多使用辛酸/癸酸三酸甘油酯—Caprylic/Capric Triglyceride)使用。

或者用類分子酊的成分，例如植物鞘胺醇、糖脂等等的成分 ; 更好的係使用可以增生Ceramide的成分，例如維他命B3。

而植物油可以用，擔配角鯊烯或角鯊烷。
最好選用有卵磷脂的成分，或者使用卵磷脂作賣點的乳化劑，
單純係貪佢乳化做到同時有卵磷脂。

要點四 : 選用簡單的產品
簡單有二面。

一，唔好用太多添加劑。
包括色素、香料、酒精、賦型劑等皮膚未必需要的成分。

二，唔好用有太多成分的產品，其實無一個好實際的數字劃清界線，
我個人會建議低過15至20種成分的面霜係可以接受
(乳化3種、水、防腐4種、油脂3種，再預留有效成分空間)。
而爽膚水，一般10種以下應該都好足夠預留廠商設計產品。

係呢個時候順便提埋，香料有人問包唔包精油係入面。

先講精油入面提取的單一成分，常見為「檸檬烯」、「芳樟醇」、「薄荷醇」呢類，拜託唔好用，乜鬼冰極、清涼，好多時都係靠呢類產物做，乳化劑而家可以做到的冰涼感仲係好差，就我所知。

至於使用含精油的護膚品，意見有兩種。
芳療師會同你講:「因為精油有的活性成分同時都係刺激物，而植物係好神奇的，精油內的某類成分會降低成支精油的刺激性」。
而部分人會同你講 :「精油含有刺激成分，唔好用。」
而我個人建議，的確精油係有活性元素，而精油都有刺激成分。但重點可以放係精油的元素太多，係最脆弱的時候唔應該用精油係正確，例如濕疹發作個時。去到正常返少少，使不使用由你喜歡。不過你選擇用，我個人唔建議超過1%。

要點五 : 最多三支產品。
唔計你卸妝、清潔。後續步驟最多三支，最好兩支。
包括一支爽膚、一支面霜，而精華亦唔好使用過份刺激的，最好係主打抗氧化。
而卸妝產品唔該唔好用卸妝水，要用都要用配方溫和的。

要點六 : 使用產品時，請溫和。
拜託唔好大力捽，亦唔好用將產品倒落化妝綿用。
好多時係無必要的動作。


亦自己自問自答左幾條可能會聽到的問題比大家參考下。

問題一 : 我油肌，用咁多油溶性成分好怕油。
可以選擇用，有用好過無用(分子丁另計)。
例如用卵磷脂，好多賣天然的廠商出的乳化劑都有佢。
例如用植物鞘胺醇，本身對暗瘡的P.Acne有抑制作用。
例如用維他命B3，本身可以控油。

問題二 : 點樣為之合適補濕，我唔明呀。
好多時你地用的補濕面霜，會帶黎成個皮膚好軟潤、
有輕微的清涼感覺，之後感覺皮膚內有種注水的感覺。

而大部份呢一類感覺係通過「乳化劑、合成脂、增稠劑」形成的感覺。
唔否認呢一類成分有保濕效果，什至有乳化劑會做過TEWL(經皮水分散失)的實驗。
但唔代表佢呢種係「好的保濕」，或者對敏弱肌係好的保濕。

一般黎講，我地唔應該太追求上述感覺，因為要做到好多時都要加不同的成分，
但呢類成分大多對皮膚無作用。
所以敏弱肌，同「天然補濕因子+複合油溶性成分」都已經足夠。

而用幾多，好多時係睇你。
對油肌而言，用量應該係以清爽無負擔感為主。
對乾肌而言，用量就自由好多。

不用水做基底原料，代表出眾 ?

最近呢幾年多左好多天然品牌，部份的品牌為左增加品牌特點，會以非水(Aqua)做基底材料。換句說話黎講，以往我地係第一個成分會見到的係水(Aqua)，佢地搵左好多其它唔同的野去替代。

到底係好定壞 ? 事實上又有冇用呢 ?

我地唔可以一概而論，事實上有好多唔同的問題要問自己。

第一問題 : 唔用水，用乜野代替?

係現行的護膚品上面，我地可以見到大約兩類的成分。

第一類係純露。

純露係蒸餾精油中的副產品。純露本身有一定抗菌能力，如果係「不添加額外原料」及「適當地保存」下，大部分純露都可以存放一年或以上。

假如產品用呢一類成分代替水，的確係可以做到「比水有更多功效」。

第二類係一般植物萃取或者植物汁。

植物汁，常見的係蘆薈，生果汁。廠商會落呢一類汁，原因係大家對呢一類汁熟悉，同時會自行幻想功效。例如，蘆薈會補濕保濕、檸檬可能會美白等等。

當知道有乜野代替後，下一步係會加入邊到，用途有幾大。

第二問題 : 效能

誠如上述，我地唔能夠否認呢一類「汁」比「水」有更多功效。

如果係清潔產品中，例如洗面奶、洗面凝膠個一類。正如我之前寫手工皂個時寫過，係短短不足一分鐘內，將活性成分放上面再洗返走佢。真正可以有加分的只有「補濕向」及「抗敏向」，原因係其它方向的太難於一分鐘深入皮膚。

以蘆薈做基底的作為例子，蘆薈入面有一定份量的多醣體，可以吸濕。係洗面產品中，有保濕會比無保濕好。但我地的吸濕成分並唔需要專登用到汁。

所以我唔建議洗面產品用到「汁」。

如果係爽膚產品，爽膚產品原本基底係水，我地換作有功效的活性「汁」。

第一，爽膚產品使用的量夠多。咁代表住你用的「汁」的量都會多。由於呢一類「汁」大部份的活性元素唔會太多，所以一定要用量補足。放係爽膚水上面，就可以用得夠足量。

第二，爽膚產品的配方，係市面上大部分都係以水為主。爽膚存在的目的，有部分係為左舒緩洗面後油脂缺乏及天然補濕因子的流失引致「乾」的感覺。係傳統配方上會以吸濕劑配以大量的水去舒緩洗面後不適感。但我地用左「汁」之後，好多時汁入面會有舒敏元素或者吸濕元素。所以用得岩的「汁」係可以比「水」有更好效果。

如果係精華產品，精華用的量本身唔會多。所以好簡單，量不足，唔需要特定買用「汁」做底的成分。特別的美白、抗老。用個三四滴精華，之後就算100%都係純露都好，四滴唔會改變你皮膚。咁保濕抗敏類，用個三四滴精華，係有可能改變的，但對比起用普通水，分別不會太大。

如果係面霜產品，其實就睇你用幾多。如果你的用量多，當然可以用到「汁」帶比你的效果，但如果係用的分量同精華素咁少，咁不如慳返錢。

所以總結黎講，如果你係爽膚水 用「汁」的產品，我個人都唔係話太反對。但如果係精華素，我個人建議你慳返錢。

換言之，我個人建議，如果面霜、爽膚水係用「汁」做底，你可以考慮比多少少錢買，但唔代表你比多左的錢同成效成「正比」，什至有冇效都成疑 (特別係檸檬、牛奶個類果汁)。

當然，防腐劑的用量、酸鹼調節劑使用量等等的問題，呢個唔係消費者去擔心的事情。

Toner Review : Timeless Skin Care Spray - HA MATRIXYL 3000™ W/ CUCUMBER SPRAY

Toner ，係護膚程序上算係一個可有可無的角色，佢作用唔大，但基於有人鐘意使用Toner，我搵左其中一隻牌子的4支簡單的Toner作Review。

首先落定義，係我眼中咩叫爽膚水/化妝水。
(1)  盡量少大分子護膚成分/增稠成分 : 儘管呢一類成分可以帶黎滋潤 (對乾肌而言) 的感覺，好似有一層野係皮膚上面保護住你，但有一派認為有可能阻礙後續護膚成分吸收。我個人認為，減少係前期護膚程序使用過於厚重的產品係比較好，原因係當你第一支已經咁厚重，打落後面使用的份量就會減少 (過於滋潤=>皮膚唔舒服 OR 爆瘡)。係皮膚吸收同負擔有限下，應該盡量將無益成分減少，提高返有益成分的吸收。

(2)  少無益成分 : 以我認知上，一般平價什至部分貴價爽膚水都好鐘意單以Glycol (不論係丙二醇、丁二醇、甘油或者雙丙甘醇) 做補濕成分。事實上呢個並非問題，但呢類成分 (除甘油) 只有短暫的吸濕效果、亦吸唔到太多濕。佢只可以提供大量水分 (爽膚水噴好多下) 加輕量吸濕成分，而其它無作為的成分應該減少，例如PEG、香精、色素等。

(3)  吸濕多元 : 應多以天然補濕因子或良好吸濕成分作為爽膚水主要吸濕成分，咁先可以做到「提供水分」及「吸住水分」。

下面係Timeless Skin Care出的Spray，HA MATRIXYL 3000™ W/ CUCUMBER SPRAY。

Water, Aloe Barbadensis, Sodium Hyaluronate, Glycerin, Calcium Pantothenate, Matrixyl 3000, Cucumber Extract, Phenoxyethanol.

我地先講下佢的吸濕元素。

主要提及吸濕元素為Aloe Barbadensis
Aloe Barbadensis係指緊蘆薈。蘆薈本身有唔同的多醣體、胺基酸等等的良好吸濕元素。可見呢隻成分提供左小分子的補濕同大分子的補源。而蘆薈本身亦有其它功效，包括抗氧化 (建基於多酚、類黃酮等作用)、平滑皮膚 (建基於滋潤皮膚、部分萃取手法的蘆薈有較強的抗菌功效)的作用。

Sodium Hyaluronate 係指緊透明質酸。透明質酸係天然補濕因子的一種，為大分子。現時護膚品界用的透明質酸，即使幾細都好，亦難以穿透角質層。佢只可以提供角質層外的吸濕鎖水功效。

Glycerin 係指甘油。甘油好平，但同時功效好大。甘油作為天然補濕因子的一員，有一定程度的吸濕能力、同時亦可以舒緩敏感。

Calcium Pantothenate 係維他命B5。維他命B5有吸濕的功效，但並唔算太強。

Cucumber Extract 係小黃瓜萃取。小黃瓜本身有豐富的礦物質、咖啡酸等物質，所以有補水同埋抗氧化的作用。

可見，係補水吸濕方面，呢支爽膚水做我唔錯，唔預期有好滋潤舒緩的感覺，但亦確確實實提供天然補濕因子類的成分，為皮膚吸濕補水。

而佢亦另外加入Matrixyl 3000。
呢隻係比較出名的抗老胜肽成分，所有胜肽我比較鐘意呢隻做抗老。
問題在於，成分落得太少，而當初做呢隻胜肽係基於3%左右。
係成個成分表上，透明質酸代表1%成分分界線，排後過透明質酸基本上可以判為低於1%。
而少於1%Matrixyl 3000我本人認為效果有限。

呢支Toner，無咩多餘成分，亦有多元化吸濕，透明質酸亦唔多。
比較適合油性皮膚使用，乾性皮膚當然亦可使用，但可能需要另外再搵滋潤的油分面霜封鎖。

價錢大約$150/120ml。

純水相補濕精華推介 — Marine Hyaluronics by The Ordinary

一支純水的、好的補濕精華應該由咩組成，點樣組成，我地可以參考下 下列產品。

Aqua (Water), Glycerin, Algae Extract, Pseudoalteromonas Exopolysaccharides, Pseudoalteromonas Ferment Extract, Ahnfeltia Concinna Extract, Arginine, Glycine, Alanine, Serine, Valine, Isoleucine, Proline, Threonine, Histidine, Phenylalanine, Aspartic Acid, PCA, Sodium PCA, Sodium Lactate, Salicylic Acid, Citric Acid, Propanediol, Dimethyl Isosorbide, Ethoxydiglycol, Polysorbate 20, Potassium Sorbate, Sodium Salicylate, Sodium Benzoate, Hexylene Glycol, 1,2-Hexanediol, Phenoxyethanol, Caprylyl Glycol.

($85/30g)

產品純水相，由唔同的補濕成分組成。
我地可以先由防腐系統睇起。

產品比較顯眼的防腐劑主要由
「Potassium Sorbate」、「Sodium Benzoate」、「Phenoxyethanol」三項傳純防腐劑組成。
三種都係比較安全，已經做過唔同的毒理測試或者做過唔同的人體試驗分析報告。三種的防腐劑本身亦唔需要落得多，相信佢地亦唔落得多，主因係佢產品PH<5 、 用左唔同的醇類防腐 及 產品本身存有不同吸濕成分 提高左防腐劑的效能。
所以唔顯眼的防腐劑就係由多元醇類，例如排第二位的Glycerin(甘油/丙三醇)、末位的Caprylyl Glycol(辛甘醇)等等。呢一類多數係大廠幫你複配好的防腐劑，所以唔太需要擔心防腐問題。


而入戲肉就係補濕成分。
產品的大分子由 Pseudoalteromonas Exopolysaccharides (HYADISINE® marine ingredient)。

係廠商的Presentation入面，呢隻成分係用黎取代透明質酸，同時亦有「海洋科技」的賣點。由於年紀的增長，皮膚會產生較少透明質酸，形成乾同相關紋路，所以同時有抗老的效果。
我唔反對呢一隻成分可以做到同透明質酸相關的功效，廠商都有做過研究，係人體試驗中，10%的HYADISINE®可以係20日內(每日使用2次)令到皮膚比對照組高出37.2%補水度。1%HYADISINE®使用20日後可以減少皮膚粗糙度約37%。

誠實而言，呢一隻成分係廠商報告下打羸非常多唔同有關透明質酸補水度的報告。儘管如此，透明質酸的強效係「皮膚天然存在」及「本身有一定程度的補濕能力」。換言之，即係低敏強補濕。當然，呢隻HYADISINE®可唔可以替代透明質酸大分子補濕的位子，我認為可以。

不過有另一樣要注意，HYADISINE®呢一隻成分係Solution黎，簡單黎講，即係100%HYADISINE®入面只有1%Pseudoalteromonas Exopolysaccharides。係The Ordinary配方上，呢個特點暗示左係呢隻成分打後的所有成分不會高於1%，如果佢用法根據廠商建議晒最高濃度(10%)，Pseudoalteromonas Exopolysaccharides不超過0.1% (注:1%以下的成分可不根據濃度排列)。




大分子合格，小分子補濕又如何?
天然補濕因子由唔同的元素組成，上網搵唔難，我將比較常見的列出黎。

氨基酸(Amino Acids)、PCA、乳酸(Lactate)、醣(Sugars)、尿素(Urea)、離子(Ions)。
係常用的護膚品補濕成分中，盡量搵多D呢類成分做補濕。好耐以前我提過要由先由小分子同大分子的補濕成分區分，另外要盡量複配天然補濕因子(N.M.F)為主。

係呢支成分下列幾項小分子補濕。

Algae Extract // Ahnfeltia Concinna Extract : 海藻萃取，早幾年好搶手的護膚成分。護膚品有好多唔同的海藻，但一般都能夠提供礦物質 (離子) 及 多醣 (醣) 做補濕。

Arginine//Glycine//Alanine//Serine//Valine//Isoleucine//Proline//Threonine//Histidine//Phenylalanine// Aspartic Acid :  氨基酸類補濕(氨基酸)。氨基酸本身佔最多份量(~40%)的天然補濕因子，而且部分氨基酸有抗敏抗老的功能。但注意，加得多的氨基酸好易令到產品過於厚重，所以一般唔會落得多過產品總量的1%。而多數咁多種氨基酸都會係原料供應商配比你。The Ordinary用的似乎係PRODEW® 500。此成分為天然補濕因子。

Sodium PCA // PCA : PCA納//PCA(PCA)係一般常用的天然補濕因子中吸水能力最高的一隻。PRODEW® 500本身都有提供呢一隻成分，根據返The Ordinary提供的資料，使用量不超過1%。即使係咁，但佢只要有落就可以幫手吸濕。此成分為天然補濕因子。



Sodium Lactate : 乳酸鈉，乳酸類(Lactate)補濕。常用的天然補濕因子，吸濕能力比PCA納弱少少，但依舊比甘油強。PRODEW® 500本身都有提供呢一隻成分，根據返The Ordinary提供的資料，使用量不超過1%。即使係咁，但佢只要有落就可以幫手吸濕。此成分為天然補濕因子。

Glycerin : 甘油 (醣/其它)，古典補濕成分，好平但極為有效。係傳統補濕配方必備元素。此成分為天然補濕因子。

當然仲有唔同的醇類補濕，但用量較少而且功效相近，就不再多提。

可能會有人好奇點解會有水楊酸，其實佢應該係由一隻叫Antarcticine的商品入面的防腐劑，佢入面的活性成分就係產品入面的Pseudoalteromonas Ferment Extract。而呢一隻係醣蛋白。我無咩研究呢一隻成分，但佢有做in vivo實驗，對於皮膚補濕度有一定作用，可見佢有助補濕。但對於老化問題上，佢只有In virto實驗，所以佢有可能協助解決部分老化問題，但需要再觀察。

小總結 : 產品有齊大分子補濕同小分子補濕，而小分子補濕都算多元化，但小分子補濕的含量除左甘油、植物萃取、氨基酸，其它都比一般使用量少。呢個算係其中一個缺點。

而且佢質地唔會太厚 (相比佢另一支的HA+B5)，第一係佢產品本身都有寫，第二係佢本身吸濕成分除左甘油之外濃度唔高。但質地唔厚唔代表補濕功能差，亦唔好追永個種好似有層野張住你的補濕精華。最重要係你有吸收到天然補濕因子，因為佢除左補濕，好多都可以修護皮膚，維持角質層的健康。最重要係你知道有野幫你吸緊水，再用油封住就可以。
所以乾肌未必會太喜歡個種唔厚重的質感。

如果要將佢呢支海洋補濕精華用直白的文字表達

就係一支

「大分子補濕+用甘油氨基酸離子做小分子補濕的補濕精華」

The Herb Farm — 簡介三隻真係天然的面霜

我成日話面霜假天然，賣天然但完全唔天然，咁到底係我心目中咩叫天然呢?

首先要明白天然唔代表最好，天然亦唔代表唔敏感，天然唔代表有成效。

 相反呢天然野亦可以好大機會敏感，亦同時無化學野咁多毒理測試。

ROSE FACE CREAM

Aqua (Purified Water), Prunus Dulcis (Sweet Almond) Oil, Glycerin (Vegetable Glycerin), Glyceryl Stearate, Sodium Stearoyl Lactylate, Oenothera Biennis (Evening Primrose) Oil, Alkanna Tinctoria Root (Alkanet) in Prunus Dulcis (Sweet Almond) Oil, Simmondsia Chinensis (Jojoba) Seed Oil, Cetearyl Alcohol, Butyrospermum Parkii (Organic Shea Butter), Sodium Levulinate, Sodium Anisate, Organic Aloe Barbadensis Leaf Powder 200x, Rosa Damascena (Rose) Absolute Oil, Citric Acid


呢支係主打滋潤的面霜，可預見油脂可能會比較重。
乳化劑選用的係比較天然，始終係ECOCERT用的。分別係Glyceryl Stearate 、 Sodium Stearoyl Lactylate 及Cetearyl Alcohol。Cetearyl Alcohol本身有增稠的效果，可以提供較厚重(對油肌)或者叫較滋潤(對乾肌)的感覺。而大家可能比較注意的係Glyceryl Stearate。你上去查COSDNA，你會發覺佢話「用量過多會有致敏風險」。呢句說話我係同意的(「用量過多會有致敏風險」)，因為除左水之外，大部分護膚品原料都係比率高，致敏風險高。重點在於幾多%，而研究話比我地知，呢隻成分做過測試。100%用於兔仔眼部、兔仔皮膚、並無引起敏感或輕微敏感(mildly irritating or non-irritating)。係豬的皮膚並無敏感。同時係人的皮膚都無引起敏感。基本上無人會走去100%用呢隻成分，所以可以唔洗擔心。當然怕的有好多其它ECOCERT乳化劑比你選擇。

水性補濕方面，缺乏大分子補濕及天然補濕因子。產品單以甘油、蘆薈處理水性補濕，再加以小量植物萃取協助。明顯較難照顧水性補濕的要求。

油性保濕方面。甜杏仁油、月見草油、荷荷巴油、乳木果脂係佢地主要用作保濕的原料。植物油本身含有比較豐富的脂肪酸，亦可以補充皮膚保濕用的三酸甘油酯，但始終缺乏多元化手段。對於一般油性或者中性皮膚係無咩問題，但乾性皮膚需要注意增加多少少多元化的保濕。例如分子酊、角鯊烯個一類。

植物萃取方面，佢選用左紫朱草。紫朱草係一隻含有pyrrolizidine alkaloids的植物。而pyrrolizidine alkaloids如果係不飽和會有危險，佢的代謝物會對肝有損害。而紫朱草算係有濃度比較高的pyrrolizidine alkaloids。用法上需要注意唔好太長期規律性使用，BB大肚婆都唔好用。

ROSEHIP FACE CREAM

Aqua (Purified Water), Glycerin (Vegetable Glycerin), Prunus Dulcis (Sweet Almond) Oil, Rosa Canina (Organic Rosehip) Fruit Oil, Glyceryl Stearate, Sodium Stearoyl Lactylate, Simmondsia Chinensis (Jojoba) Seed Oil, Cetearyl Alcohol, Butyrospermum Parkii (Organic Shea Butter), Althea Officinalis (Marshmallow Root) Extract, Daucus Carota Sativa (Carrot) Seed Oil, Sodium Levulinate, Sodium Anisate, Organic Aloe Barbadensis Leaf Powder 200x, Citrus Aurantium Amara (Bitter Orange), Anthemis Nobilis (Chamomile) Oil,  Citrus Aurantium Dulcis (Orange) Peel Essential Oils.Citric Acid

呢支係主打幫你保濕的面霜，應該係主打適中保濕，比係中性肌左右的人使用。

先就乳化劑黎睇，乳化劑使用的都係算比較天然的選擇，ECOCERT的產品係可以選用。防腐劑使用的係「Sodium Levulinate+ Sodium Anisate」的選擇。都係可以使用係標示無防腐劑的產品入面當防腐劑咁用。

基本標準睇完，可以睇下佢保濕是否如此好。

水性補濕方面，天然補濕因子比較缺乏。產品排第二位的係甘油，單隻份量應該唔少。甘油係一種小分子的天然補濕因子，而天然補濕因子(NMF)係皮膚經過一系列的反應後產生於角質層用於吸水的一堆成分。常見有尿素、透明質酸、甘油、胺基酸等等。補濕結構最好有細有大，佢比較缺大分子的天然補濕因子，即係透明質酸類，同時小分子的亦唔足夠，只有甘油一項。而係植物類上，有提供蘆薈呢一項補濕成分。蘆薈有多醣體，可以補濕。但總結黎講，明顯種類唔多，整體份量唔多，係濕度較低凡環境需要注意呢一部分要補足。

油性保濕方面，以植物油為主，不過不失。產品使用甜杏仁油、玫瑰果油、荷荷巴油、乳木果脂為主軸油脂組合，油脂除左荷荷巴油大部分比較厚身。四者可以分別咁提供飽和同不飽和脂肪酸。但缺乏比較多元種類的保濕成分，例如Squalene(角鯊烯)、Lecithin (卵磷脂) 、Ceramide (分子酊) 等呢類成分。單純以脂肪酸 // 三酸甘油酯去做保濕未必可以好全面咁做野，始終好多時皮膚需要的係多面，而唔係專精。

植物萃取方面，佢加入左好多唔同的植物成分，抗氧化的能力會強左。

比較少見的係Althea Officinalis，佢主要用黎做保濕，因為佢入面有種粘液，你可以幻想類似蘆薈個種粘液。

玫瑰果油廠商自己聲稱可以美白，我唔否認，但亦唔需要過分吹捧。的確係植物油的選項上，玫瑰果油係比較知名的美白油脂。係不同種類美白成分黎講，有好多比佢更天然、同時亦有更多比佢更快速有效 (維他命C、傳明酸、Chromabright等等)，而係油脂選擇上，本身植物油本身存在的多酚 (含量唔算特別多，但存在) 係美白的其中一類元素。如果單純講及植物油的脂肪酸係唔係可以美白，唔否認，有係豬仔研究過，原來Omega 6 亞油酸 (Linoleic Acid)有助令皮膚更新速度加快，形成類似果酸水楊酸類的美白作用。但亞油酸本身存在於好多的植物油當中，包括玫瑰果油、葵花籽油 (平好多清爽好多) 、 月見草油 等等等等。玫瑰果油係唔係一種必須的美白油脂呢，當然佢的好處就係有人幫你做過研究，但缺點就係要比多兩至三倍的錢。

總括黎講，呢支算係一支比較穩陣的面霜，不過不失。

什至係價錢的考慮下，The Ordinary支面霜做得比佢出色。TO防腐劑上佢的確無咁天然，亦無咁多植物油。但單純的三酸甘油酯應該足夠一般無咩保濕需求的皮膚單純作保濕使用 (係唔係好矛盾) ，當然佢缺點係少左堆植物內的養分，但你喜唔喜歡用我阻唔到你。

RADIANT FACE CREAM

Aqua (Purified Water), Coryllus Avellana (Hazelnut) Oil, Cetearyl Olivate, Sorbitan Olivate, Ribes Nigrum (Blackcurrant) Oil, Glycerin (Organic Vegetable Glycerin), Symphytum Officinalis (Comfrey Leaf), Echinacea PurpureaVitis Vinifera Seed (Grape), Achinidia Chinensis (Kiwifruit)  Extracts, Butyrospermum Parkii (Organic Shea Butter), Citrus Bioflavanoids, Flower Essence, Parfum (Essential Oils), Olea Europea (Olive) Fruit Oil, Sodium Levulinate, Sodium Anisate, Totarol, Organic Aloe Barbadensis Leaf Powder 200x, Citric Acid

呢支係主打抗氧化的面霜。當然唔係所有抗氧化係同一個Level當中，佢用的並唔係最頂級的抗氧化，我個人叫佢做二級原料，有作用，但絕對唔係我地要拎個荷巴出黎比錢買的原因 (抗氧化) 。

先就乳化劑黎講，佢用的乳化劑係比較天然的，係Ecocert的產品係絕對可以用無問題。再睇防腐劑，佢選用的防腐劑同樣係比較天然的，Totarol係天然防腐劑的選項，同時亦有抗氧化、消減暗瘡等功效。研究的報告指出，約0.000039%已經係最小抑菌濃度(對引發暗瘡的細菌)，而係0.005%濃度下，約60分鐘可以消減暗瘡細菌約98%。呢隻原料我會叫佢一級原料，因為佢係用植物某特定成分研究，發現佢有效，專登用技術拎佢地出黎單獨使用。呢類成分快速見效，濃度低，多數穩定，係應該拎荷巴比錢買的野。而填補Totarol防腐缺憾的就係「Sodium Levulinate+Sodium Anisate」，呢隻係比較新型的防腐劑，都係可以標示「不含防腐劑」的防腐劑。

再睇返一支面霜的基礎功能 — 補濕保濕。

係水性方面明顯比較缺乏。產品主要以甘油、蘆薈作為水性補濕原料。甘油係天然補濕因子的一種，好平但好有效，隨住周圍環境的水分而改變其保濕程度。係天氣比較乾無咩水分的地方，甘油的補濕能力會比較弱。蘆薈係有效的補濕成分，原因係蘆薈本身有多醣體。多醣體係一個統稱，基本上我地會話佢有補濕的效果。而佢用的係Aloe Barbadensis Leaf Powder 200x。呢隻份基本上所有蘆薈其它所有功能都會消失晒，只會留下補濕。而佢的優點係，用量少已經好足夠，因為佢1g=200g蘆薈汁。總結黎講，缺乏水性補濕因子，特別係天然補濕因子，同時亦缺乏大分子補濕劑，例如透明質酸。

係油性保濕方面，佢做得不過不失。產品的植物油種類算多，佢有榛果油、黑加侖油、乳木果脂、橄欖油。主要比脂肪酸同三酸甘油酯比你。榛果油作為主要油分，主要提供單元不飽和脂肪酸。黑加侖油主要提供多元不飽和脂肪酸，而佢的組成亦比較似月見草油或者琉璃苣油，都有比較多的GLA，一種抗發炎的omega 6。而後兩者乳木果脂、橄欖油的量比較少，乳木果有飽和脂肪酸，而橄欖油有單元不飽和脂肪酸。四種植物油有抗氧化的能力，但絕對唔係廣告所講咩好豐富的維他命或者好多 多酚。維他命你隨便搵一支維他命主打精華都多過呢堆植物油，而多酚類你直接買堆真係做多酚起家的成分就得，無記錯美國有間廠專做橄欖多酚，好正。佢比起最強個類提取型抗氧化成分當然弱，但比合成脂絕對好。

油性保濕缺點方面，佢主要都係得脂肪酸類保濕，但對於其它油性保濕成分絕對唔足夠。例如膽固醇//植物固醇、角鯊烯同分子酊呢一類。所以單純用植物油用油性保濕的面霜有個做點，就係乾肌係冬天會覺得唔足夠。而油肌就睇你本身油成點。

係額外成分之中，佢加左好多植物萃取，包括紫草、提子、奇異果呢一類。

基本上可以預見佢添加得還可以。因為佢用的乳化劑係Olivem® 1000，一般使用如果無額外的脂肪醇(XXX Alcohol)或者膠輔助，使用上會大約係10%樓下游走。而Sorbitan Olivate係隻乳化劑入面大約佔唔夠40%，即係話佢後面排的大約會係3-4%樓下。你話3%好多，但肯定無可能全部都會咁多。假設佢真係用咁多，咁真係恭喜晒。佢抗氧化的能力的確會係不俗，量大取勝。

但由於甘油的排行仲低過Sorbitan Olivate，我地可以預見佢真係無成分表見咁多。植物萃取係護膚品上主要係將佢放入溶劑，之後經過時間、熱力等因素協助，其活性成分溶入溶劑 (水、甘油、多元醇 等)，而一般萃取出黎有濃度之分 (當然技術的高低亦會確定左佢本身濃度) 。呢到只有水同埋甘油作為溶劑。假設佢係以甘油作為溶劑。4%以下的甘油要有3隻的植物萃取。假設每一隻植物萃取有40%甘油，20%植萃，40%水 (一般做法)，3隻植物萃取計埋只有大約2%，每隻有0.6%。

0.6%做唔做到好多野，其實可以接受，但無人證實到 (呢個都係唔少植萃上唔到大台原因) 。
一般上，提子萃取可以抗氧化、美白。原因在於佢有兒茶素、花青素呢一類多酚。多酚本身可以抗氧化美白 (已於上述)，消除自由基傷害。
奇異果本身有少量維他命、胺基酸類，存有其活性成分各自功效 (換言之即係無特別功效) 。

值得注意係Comfrey(紫草/康復利)

對於呢隻成分係引起過風波，有隻牌子叫Burt's Bee 有隻膏係有紫草呢一隻成分，本身佢無寫2歲以下禁用，事後被發現就急急腳寫返上去。原因係如果你係有準備懷孕的打算，或者已經有BB打算比佢用呢隻成分，一定要停手。因為會對個BB//大人係有不良影響，不過BB比較嚴重，紫草或者叫康復利入面有比較多有損害性的pyrrolizidine alkaloids。2歲樓下絕對係禁用成分。所以天然唔代表好，你真係要用燕麥或者金盞花會比較岩BB。康復力本身用黎抗過敏，對傷口癒合有良好作用。

個人建議，短期用唔係BB或者大肚婆其實係可以，始終紫草係有佢的功效。
長期用需考慮Comfrey的問題 (當護膚品日常非常規律性使用)，咁抗敏上有金盞花洋甘菊等選擇，的確可以選擇其它。

總結黎講，我覺得你喜歡賣天然的面霜，其實RoseHIP Face Cream係一個不錯的選擇。(記得係有HIP個隻!)

註 :

(1) PAs (Pyrrolizidine Alkaloids) 只有不飽和類先會有風險。
(2) 唔係每一隻植物PAs的濃度都一樣。例如康復力、琉璃苣 (不等同琉璃苣籽!) 同中國用的紫草根 濃度已經差好遠。紫草根係非常非常低PAs (不過孕婦同BB都唔太建議用)。
(3) 長期當飯食落肚的PAs先會有極度嚴重的後果。
(4) 短期突發使用其實無咩問題。

點評 左旋維C精華(1) : Obagi 左旋維他命C精華

因為我唔係好確定我搵到的所有成分表係正確，或者國家的版本不同而導致有增減成分。我只係搵到佢主要架構存在的配方比你地參考。

Propylene Glycol, Water, L-Ascorbic Acid, Alcohol, Ascorbyl Glucoside, Ethoxydiglycol, Phenoxyethanol, Sorbitol, Sodium Hyaluronate, Zinc Chloride, Calcium Hydroxide, Fragrance







首先，左旋維C的護膚品配方絕對係大同小異。大家都係參考以「溶劑//助滲」+「水」+「左旋C」為基礎配方。基本上個架構大家都係咁做，所以大家做到的野就差不多，其它多出黎的成分就係各自修行的問題。

Obagi係屬於手多的範例。
由於左旋C對於配方需求大，需要助滲多、PH低的基本要求。產品必定需求加入比較大量的溶劑，我理解。
產品選用Alcohol, Propylene Glycol同Ethoxydiglycol作為輔助助滲。先不論選材上優劣，係如此大量溶劑底下存有香精的配方代表所有容易引發刺激的成分更容易滲入皮膚。換言之刺激成分會更容易引發刺激，且傷害更大。咁佢有香精，就會有呢個問題。
Propylene Glycol的使用，你可以自行選擇喜唔喜歡呢隻成分。個人而言，我認為Propylene Glycol有可能引發刺激，而Propanediol會係比較好的使擇且用途上可大部分Replace。

Ascorbyl Glucoside係AA2G，值得注意係，AA2G最佳保存的PH範圍同左旋C並唔相同，所以使用上，如果Ascorbyl Glucoside係佢地計落去成支產品的維他命C的量，咁佢的效果會打折，原因係氧化的可能性會增加。

另一樣野需要注意係，Propylene Glycol的排行比水更前，換言之係預計上，佢比水的量更多，使用質感上會有種滑的感覺，但亦有會有人覺得好黏。

至於補濕成分，有大分子的透明質酸，亦有小分子的Sorbitol同埋Propylene Glycol的多元醇類。算係最基礎的補濕結構。

簡單總結一下 :
1.  助滲多，所有成分的滲透快加高，左旋維C可以發揮更大效果，同時香精會更易引發刺激。

2.  防腐優。苯氧乙醇算係現行上唔叫「天然防腐劑」下安全到爆炸的防腐劑 (1%樓下)。而由於大量的多元醇都會令防腐系統效能提升，算係輔助配方同時減少用防腐。

3.  基礎補濕。無咩NMF(天然補濕因子)。得一隻透明質酸，但算有大小分子結構，可以接受。

4.  我見到係COSDNA上日本版有植物萃取 (?) 唔知真定假。但係如果只係得左旋C+水+溶劑，我覺得咁的價錢，我見到由HKD $400至到1000 /30g都有。是否值得，自行理解。

5.  所有美白產品並唔會日日用一定會比昨日白，去到某一個位就完架啦。

是咁的 — 我由七月開始試左肌斷食兩個月 (中) — 肌斷食提出的理念正確嗎?

肌斷食的理念底下，有極之多的副Concept Support，形成成個肌斷食框架。
今日想同大家傾下肌斷食某部分有少少古怪的Concept 。


手工皂天然嗎 ?

無論係唔係肌斷食理念下，坊間都好多時認為一般洗面產品唔夠天然，

亦有好多化學野，所以用皂就係「Perfect池」。

我地可以先了解下我地一般用的洗面產品同 洗面皂 係設計上到底有咩分別先。

一般用的洗面產品的結構可以拆分為下列幾項 :

水 + 界面活性劑 + 防腐劑 +

色素香味 (可有可無) + 油 (可有可無) + 增稠劑 (可有可無) + 補濕成分  (可有可無) + 

活性成分  (可有可無)

你可以睇到，哇。界面活性劑，睇落去已經好化學，而且又有防腐劑。咁一定好化學，對皮膚好傷啦。不如又睇下一舊洗面皂可以點做

洗面皂的結構可以拆分為下列幾項 :

普通冷制/熱制 : 水 + 鹼 + 油 + 

色素香味 (可有可無) +  防腐劑/抗氧化劑 (可有可無) + 活性成分 (可有可無)

而有一類皂係將一般用的洗面產品用某類成分變成固體咁解，但佢本質都係一般用的洗面產品，此類不談 (因為唔係肌斷食所推崇的產品)

理論上，無論一般用的洗面產品 OR 洗面皂，你都可以加垃圾成分去支撐使用感覺，包括香精，增稠質地改變成分。

所以單純用因為坊間洗面產品有落好多「色素、香精」去攻擊坊間洗面產品係完全站不住腳。

再下一個層次，防腐劑。

防腐劑問題在於邊呢 ?

係肌斷食的Concept下，防腐劑會令到擾亂皮膚，破壞皮膚。

首先呢，即使你用清水洗面，清水都會滲入皮膚，皮膚本身的細胞含水量都會一下子上升，你擾亂皮膚 ; 你用毛巾/紙巾抹面係強行用物理性的方式去除表面老廢角質，你擾亂皮膚 ; 對唔住，你唔用防曬產品，紫外線射入皮膚引發炎症反應，你擾亂皮膚。

所以根本上並唔可以用「擾亂皮膚」去解決「為何有防腐劑的產品就是差?」呢一個問題。

所以，下一步我地要問的係「防腐劑係點樣，防腐劑會出事嗎?」

我可以答你，「防腐劑係有害防腐劑係出事」係完全正確的。因為100%濃度的防腐劑基本上99%會引致Irritation。

但現實護膚品唔會咁做，舊時代產物的防腐劑大部分有做毒理測試。

你話怕MIT，MI，Parabens呢類防腐劑? 唔緊要有大量其它防腐劑選擇。亦有大量新式防腐劑，用緊植物本身的抗菌力量做防腐。

所以重點唔係有冇用防腐劑，而係防腐劑的選擇同用量是否恰當。同樣道理，你一舊皂本身都可以加大量化學物質，我一支洗面產品可以過到Ecocert，並唔係任何情況，什至大部分情況下皂都唔夠洗面產品好。

-Coming Soon-